لەشکەرێن ترک ل ھەرێما بەرواری بالا دەست ب ئێریشەکا نوو کرن. ل دەردۆرا گوندێ کێستە دگەرن، زەند و ملێن خوە دھەژینن، د ناڤبەرا گوندێن بابیرێ و بەلزانە دە بنکەیێن کۆنترۆلێ دانینە. بەرواری بالا، ئەڤ خاکا د ھەمبێزا بەھدینان دە، کو گوند و زۆزانێن ھەری خوەشێن کوردستانێ لێ نە، ژ ئالیێ ئارتێشا ترک ڤە ھاتیە داگیرکرن. خەلکێ دەڤەرێ عاجزە، جوانێن کورد دوھ ب شەڤ ل گوندێ کێستە ئالایێ کوردستانێ بلندکرن.

پەکەکە بەرپرسە ژ لەشکەرێن ترک یێن ل بەرواری بالا

پەکەکە، ھەپەگە و ھەموو پێکھاتەیێن وێ کو ب سالان ژ ڤێ ھەرێمێ رە دبێژن “ھەرێمێن پاراستنا مەدیا، قادێن گەریلا” دەنگێ خوە دەرناخن، گولـلەیەکێ ژی ناهاڤێژن لەشکەرێ ترک. ما نە ھوون بوون وە دگۆت، ئەڤ دەر “ھەرێمێن گەریلانە، قادێن پاراستنا مەدیانە”، لێ ئیرۆ یەک فیشەکێ ژی هوون نکارن بتەقینن. ما نە ھوون بوون وە دگۆت ئەم ژ بۆ پاراستنا خەلکێ ل ڤرین، پا کا ھوون؟ ترک ھاتن وە ژی بازدا چییایێ گارە.  بێ کو کەجەکە ژ ڤێ رەوشا تێ دە شەرم بکە بانگ ل “گەلێ باشوورێ کوردستانێ” دکە و دبێژە ل دژی داگیرکەریێ سەری ھلدن. ئەڤ ھەلوەستا پەکەکێ خیانەت، بێروومەتی و نەوێرەکییە. د سالا 1985 دە دەما مەعسووم قۆرکماز ھێژ دژیا پەکەکە ل ڤی گوندی بوو. پشتی سالێن 1990 ل دەردۆرا ڤی گوندی ب دەھان کامپ ھاتن ئاڤاکرن و ھەر کەسێ کو دچوو وی گوندی د بنکەیێ کۆنترۆلێ یا پەکەکێ رە دەرباس دبوو. پەکەکێ ئەو گرێ کو 30 سالان د دەستێ خوە دە گرتبوو، بێیی کو 30 دەمژمێران بپارێزە رادەستی ھێزێن چەکدارێن ترک کر و رەڤییا. ئەڤ راستییا ھەرێمێیە.

پەکەکێ نە خوەست پێشمەرگێ کوردستانێ زنارێ کێستە بگریت

د 23 نیسانا 2021 دە ئارتێشا ترک ل ھەرێما بەرواری بالا و مەتینا ئۆپەراسیۆنەک دابوو دەستپێکرن. د دەمژمێرێن دەستپێکێ یێم ئۆپەراسیۆنێ دە کو زنارا کێستە، دۆلا زەندورا، ھرۆر ھەتا سەری زێری گرت. سینۆرێ قەشوورا و بەرواری ژۆری ژ ھەڤ ھات قوتکرن. ھێژ ئۆپەراسیۆنێ دەستپێ نەکری ھێزێن پێشمەرگە پەیامەک ژ پەکەکێ رە شاندبوو و گۆتبوون “ژ ھەرێمێ دوور بکەڤن دا کو ئەم وەرن ب جھ ببن، دا کو ئارتێشا ترک نەیێ.” لێ پەکەکێ چ کر و چ گۆت؟ وان گۆت “ئەم دێ ھاتنا پێشمەرگە وەکە راگەهاندنا شەر بحەسبینن” و ھاتنا پێشمەرگە رەد کر. چ بوو، پەکەکێ کو ھێزێن پێشمەرگە قەبوول نەکر، ئەو ناڤچە ژ بۆی ئارتێشا ترک ھشت. دەما کو ھێزێن پێشمەرگە نەکارین بگھن، حکوومەتا ھەرێما کوردستانێ داخواز ژ ھێزێن پاسەوانێن سینۆرێ ئیراقێ کر کو بێن ل ھەرێمێ ب جھ ببن. د گولانا 2021 دە ل کەلا قومریێ ب جھ بوون. ئەگەر حکوومەتا کوردستانێ ئەڤ گاڤ نەهاڤێتا، نھا ل کەلا قومریێ ئارتێشا ترک ھەبوو. ئیجار ھەگەر ئیرۆ ل بەرواری ژۆری ئالا ترکا یان ژی ئالا ئیراقێ ھەبە، پەکەکە سەبەبە و بەرپرسیارە.

ئەگەر پێشمەرگە بچوویا گوندێ کێستە، دا پەکەکە ب مایین و مووشەکان ئێرشی پششمەرگەیان کت و ب دەھان پەشمەرگەیان شەھید کت. لێ پەکەکێ یەک فیشەکێ ژی بەرنادە لەشکەرێ ترک.

لەشکەرێن ترک نە ژ دوھۆک و نە ژی ژ ئامێدیێ نەچوونە قادا ئۆپەراسیۆنێ

چاپەمەنیا پەکەکێ و ھندەک نڤیسکارێن وێ وسا نیشان ددن کو لەشکەر ژ دەریێ سینۆرێ خابوورێ دەرباس دبن، ژ دوھۆک، ئامێدیێ دەرباس دبن و دچن کێستە، شێلادزێ و نزارێ مەتینی. تشتەکی وھا تونە. ئەڤ لەشکەر ژ خەتا سینۆر یا کو پەکەکێ دایە ترکیەیێ تێن قادا ئۆپەراسیۆنێ. ئەڤ لەشکەر ل سەر رێیا قلەبان،ئەلکێ و چەلێ دەرباس دبن. ژ ور بەلاڤی ھەرێمێ دبن. جھێن کو ئەڤ رێیێن جوتساید لێ ھاتنە چێکرن و ھەرێمێن کو ھێزێن چەکدارێن ترکیێ بارەگەھێن دایمی لێ چێکرنە، ھەموو د دەستێ پەکەکێ دە بوون و ئەو ژی ژ ھێزێن چەکدارێن ترکیێ رە ھشتن.

تونێلێن شەری یێن موراد قارەیلان ل کو نە؟

کەسێ دەستێ قەرایلان نەگرتییە ھەگەر بخوازە ئۆپەراسیۆنێ بسەکنینە بلا ب فەرمۆت. بلا بچە زۆزانێن جۆلەمێرگێ، دەشتا فاراشینێ و رێیێن تێن باشوور کەمینان دەینە و پێشیا ئۆپەراسیۆنێ بگرە. ھەکە تو نەکاری وسا بکی، قەد چ نەبە ل گوندێ ئارووش و ئاشووتێ رێگریێ ل دژمنی بکە. لێ بەلێ جەپەرێ شەری یێ قەرایلان ئەکرانێن (شاشە) تەلەفزیۆنێ نە. قارایلان ل سەر تەلەفزیۆنێ کەت و جوتا ژ دژمنی ناھێلە. لێ د کەتوار دە یەک ژ وان ناکە، تەنێ دبێژن بلا گەلێ باشوورێ کوردستانێ ل دژی کۆلۆنیالیزمێ تێبکۆشە. پەکەکەیا کو ژ بۆ دژی کۆلۆنیالیزمێ شەری بکە، ژ بۆ ڤێ یەکێ چەک ھلگرت، لێ نھا دبێژە بلا گەل شەر بکە. گەلێ باکورێ کوردستانێ 40 سالن ل پێشبەری پەکەکێ تێدکۆشە، نھا ژی پەکەکە دخوازە ل پشت گەلێ باشوورێ کوردستانێ خوە ڤەشێرە.

بلا پەکەکە فەرمۆتە پێش و شەری بکە. کا قارایلانێ کو دگۆت مە کەلێن بن ئەرد ئاڤاکرنە؟ کا تە دگۆت شەرێ تونێلا دێ سەرکرفتنێ بینە؟ ھەموو دەرەوێن قارایلان ئاشکەرە بین کو تونەل جھێ خوە ڤەشارتن و مشک کوشتنێ نە. شەرڤانێن تونەلێ ل کو نە، چما لەشکەرێن ترک نادن سەکناندن؟ دڤێت یەک رابە و ببێژە قارەیلان ئەی فەرماندارێ بێشەرم، تە و پارتیا تە 30 سالن چیایێن مەتینا و بەرواری ژۆری کۆنترۆل کرین، گەلۆ چما تو ناپارێزی.

بایک، قارایلان و رێڤەبەریا پەکەکێ-کەجەکێ بەرپرسیارن ژ ونداکرنا دەستکەفتیێن کوردان

کەجەکێ داخویانیەک دا و تێ دە دیار کر کو پەدەکە ژ خوینا کور و کەچێن کوردان بەرپرسیارە. ئیجار کی بەرپرسیارێ عەفرین و سەرێ کانیێ یە؟ گەر ئیرۆ لەشکەرێن ترک ل بەرواری ژۆری، کێستە، کانیماسێ، سینیا، کورێ ژارۆ، سۆرا سگێرێ ب ئارامی دگەرن، ما نە پەکەکە بەرپرسیارە. چ ئەلاقەیا ڤێ ب بارزانی و پەدەکێ رە نینە.

پەکەکێ تەنێ ژ بۆ درێژکرنا تەمەنێ پارتیا خوە کورد و ئاخا کوردان رادەستی داگیرکەران کر.

ھەلوەستا پەکەکێ یا ل باشوورێ کوردستانێ، ھەلوەستەکە کو دەستکەفتیێن گەلێ باشوورێ کوردستانێ ل سەر سێنیەکا زێری پێشکێشی ئارتێشا ترک دکە، ھەلوەستەکا خیانەتێ یە.