سەرۆک بارزانی ل دھۆکێ: مە دیرۆکەکە دەولەمەند ھەیە

سەرۆک بارزانی ل ناڤ چالاکیا شانۆیا داستانا کوردستانێ دە ل دھۆکێ گۆتارەکێ دخوینە و تێ دە ئاماژەیێ ددە، “مە دیرۆکەکە دەولەمەند ھەیە.”

ئیرۆ (چارشەمبێ، 11/9/2024) ب ئامادەبوونا سەرۆک بارزانی، شانۆیا داستانا کوردستانێ ل دھۆکێ ھات پێشکێشکرن. سەرۆک بارزانی د چارچۆڤەیا وێ چالاکیێ دە گۆتارەک خواند و داستانا کوردستانێ ب “گەلەک باش” وەسفاند و گۆت، “ئەڤ شانۆیە ڤەگێرانا دیرۆکا گەلێ کوردستانێ ب ئاوایەکی گەلەک برێکوپێک بوو.”

سەرۆک بارزانی ھەروەسا گۆت، “گەلێ کوردستانێ دیرۆکەکە گەلەک دەولەمەند ھەیە لێ مخابن ئەم دیرۆکا خوە نزانن، لەوما د جھێ خوە دەیە کو چالاکیێن ھونەری د ڤی واری دە بێن کرن.”

سەرۆک بارزانی ھەروەسا د گۆتارا خوە دە بەرپرسێن حکوومەتا ھەرێما کوردستانێ و پارتیا دەمۆکراتا کوردستانێ ژی راسپارتن کو پشتەڤانیا چالاکیێن وەسا بکن.

شانۆیا داستانا کوردستانێ کو ل دھۆک، ھەولێر و سلێمانیێ تێ پێشکێشکرن بەحسا وێستگەھێن دیرۆکی یێن کوردان ژ سەردەما کاوەیێ ئاسنگەر ھەتا 16 ئۆکتۆبەرا 2017 دکە، ڤەگێرانا خەباتا رزگاریخوازیێ یا کوردستانێیە ب گەلەک دیمەنێن خوەشک یێن ھونەری.

تەکستا گۆتارا سەرۆک بارزانی:

ب ناڤێ خودایێ مەزن و دلۆڤان

ئەز گەلەک دلخوەشم کو ب وە رە تەڤلی دیتنا شانۆیا داستانا کوردستانێ بووم. ئەز دەستخوەشیێ ل وە تەڤان دکم و سپاسیا وە تەڤان دکم. تشتەکێ گەلەک باش بوو و ڤەگێرانا دیرۆکا گەلێ کوردستانێ ب ئاوایەکی گەلەک برێکوپێک بوو.

مە دیرۆکەکە دەولەمەند ھەیە لێ مخابن ئەم دیرۆکا خوە نزانن، لەوما د جھێ خوە دەیە کو چالاکیێن ھونەری د ڤی واری دە بێن کرن.

راسپاردەیا من ژ بۆ ھەڤالێن مە ل حکوومەتێ و پارتیێ ژی ئەوە کو پشتەڤانیا چالاکیێن وەسا بکن.

من دو تێبینی ھەنە.یا یەکێ؛ بەحسا چەکێ برنۆ ھات کرن کو قاشۆ لێن فەلد بوو، لێن فەلد چەکەکی ئنگلیزییە، برنۆ نینە. وێ پەیڤێ راکن ژ بەر کو نە راستە. ئەو چەکێ کو ب من رە بوو و من وەرگرتبوو برنۆ بوو، لێن فەلد نەبوو و کالیبەرا وێ 7.92 بوو.

تێبینیا دویێ؛ دەما ھوون دبێژن “ژ باب و باپیرێن خوە فێر بوونە کو سۆزێن خوە ب جھ نەیینن”، بەحسا باب و باپیرێن وان نەکن. ببێژن ئەم ژ باب و باپیرێن خوە فێر بوونە کو سۆزێن خوە ب جھ بینن، لێ نابێژن ئەو ژ باب و باپیرێن خوە فێر بوونە کو سۆزێن خوە ب جھ نەیینن. ببێژن وان سۆزا خوە ب جھ نەئانی لێ نەبێژن ژ باب و باپیرێن خوە فێر بوونە.