پەرینجەک دبێژە: “رەجەب تەییب ئەردۆگان و دەولەت باخچەلی ژ بۆنا پرۆژەیا کوردستانا مەزن رازی بوونە”. گەلۆ پەرینچەک چما وەھا گۆت؟ ژ بەر کو خەتەرەکە مەزن ل پێشبەری گەلێ کوردە. ژ بۆنا بەرێ وێ بدە ئالیکی دن کو کورد ل سەر وێ نەسەکنن یان نەبینن. ژ بەر ڤێ، نەجامێری ئەڤە ئاڤیت ئۆرتێ دا کو رۆژەڤا کوردێن باکورێ کوردستانێ بگوھەرە.
تشتێ پەرینجەک و یێن وەکە وی کو زلامێن دەولەتا کوورن، دبێژن. دڤێت مرۆڤ بەرۆڤاژی بخوینە دا کو فێم بکە. ژ بەر کو زلامێ دەولەتا کوور ب نڤیسێن خوە ئاواتا د دلێ کوردان دبێژن!. لێ د ئەسلێ خوە دە پرانیا نڤیسێن وان ژ بۆنا دەولەتا وان نامە ئانگۆ سیگنالن. لۆما دڤێت ناڤەرۆکا نڤیسێن کەسێن وەھا، مرۆڤ ژ خوەندنا بەرۆڤاژیکرنا وێ دە، تێ دگهێژە کو پلانەکە خەتەر ل ھەمبەر کوردانە. ل گۆر باوەریا من ئەو خەتەر ژی دێ ل سەر دەستێ دەمێ بێ کرن کو ئەڤ ژی دێ لۆزانا دویەمین بە.
گەلەک گرینگە کو ملەتێ کورد و ب تایبەتی کوردێن دەنگێ خوە ددن دەمێ، دڤێت ھایا وان ژ گۆتن و کریارێن پارلەمانتارێن دەمێ یێن ترک و مامۆستەیێن عەبدوللا ئۆجالان ژی ھەبن. نھا ئەو ب ھەر ئاوایی و یەک ب یەک ژ بۆنا ترکبوونا کوردان ل سەر دەستێ دەمێ چێببە، کارێن بەرفرەھ دکن.
مخابن سیاسەتمەدارێن مە پارتی و سەرۆکێن پارتیێن کوردستانی ئەڤە ھێژ فێم نەکرنە. فێم نەکرنە کو دۆغو پەرنجەک و یێن وەکە وی هەرتم رێکێ نیشانێ ئاقلمەندێن دەولەتێ ددن دا کو ئەو ژی پێک بینن.
واتە یا راست ئەوە کو دەولەت ل گەل ھەمی کادرێن خوە، ڤالا ناسەکنە و دێ نەسەکنە ژی. ھەر چقاسی باکورێ کوردستانێ بێدەنگ ژی کربن. لێ تم د شکێ دەنە کو ھەگەر چرووسکەک ئاگری پێبکەڤە، دێ ئەو چرووسک وان بشەوتنە.
ژ بەر ڤێیە کو ھێژ ژی کاربدەستێن وان ل سەر کارن. کارێ وان ب تەمامی تێکبرنا کوردانە. لێ گەلۆ ئەم وەکە سیاسەتمەدار و پارتیێن کوردستانی چقاسی ژ ڤێ رەوشێ ئاگەھدارن؟
ئەز نە باوەرم کو پارتی و سیاسەتمەدارێن مە ھای ژ پلان و پرۆژەیێن وان یێن تونەبوونا کوردان ئانکو ژناڤبرنا وان، تونە بن. ھەیە ل ب روحەکا وەلاتپەروەری ل سەر مەسەلێ کوور و دوور نافکرن. ھەگەر وسا بفکریبانە دا ژ بۆنا پێشیلێگرتنا وێ کەڤنە ناڤا ھندەک ھەولدانان.
ئەز ب خوە نھا چ ھەولدانێن رێگریکرنا ل خەتەریێن پێشبەری گەلێ مە نابینم. ھەموو پارتی، سەرۆک و رێڤەبرن مە یێن سالمەزن ژ حالێ خوە رازینە. ھەر یەک ژ وان، ب خوە باوەرن کو دێ بکاربن چەند ریھسپیان بکن ھەڤال ئانگۆ ئالیگرێن خوە.
ھەزار جاران مخابن کو ھێ ژی سەرۆک و رێبەرێن پارتیێن کوردستانی یێن سال مەزن و نە دووربین، ڤێ نابینن. ھەر یەک ژ وان ب چەند مریدێن خوە پەسنێ خوە ددن، دەردکەڤن گەر و سەیرانان. سەرەدانا ھەڤالێن خوە یێن ل ئەورۆپا دکن، کێف و گەرا خوە دکن. ب تەمەنێ خوەیێ مەزن پێشکێشکاریا بەرنامەیێن شەڤان دکن. ب ڤێ ژی رێگریێ ل جوانان دکن و ڤانا ھەموویان وەکە خەباتێن ژ بۆنا ئازادیا گەل ددن نیشاندان. ھەر وەھا د ھەر ھلبژارتنەکە ل ترکیێ و ل باکورێ کوردستانێ ژی بەر ب پارتیا ل سەر ناڤێ کوردان کو دخوازە کوردان بکە ترک ئانگۆ دەمێ ڤە درەڤن.
ژ بەر کو پرانیا پارتی و سەرۆکێن وان ھەر ئەزئەزی دفکرن، نکارن خەتەریا ل پێشبەری گەلێ خوە ببینن ئان بخوینن. فێم ناکن کو نھا ژ بلی ئەنیەک نەتەوەیی، چ چارەسەریا مە وەکە کوردێن باکورێ کوردستانێ تونەیە.
ژ بەر کو ئەم نکارن ھێزێن خوە د بن کۆنەکا نەتەوەیی دە بکن یەک. کاربدەستێن ترک ژی ل گەل عاقلمەندێن خوە پرۆژەیێن تونەکرنا کوردان، ل سەر دەستێ پەکەکێ-دەمێ ب کار تینن.
ئەم گاڤ ب گاڤ وەندا و تونە دبن. زمان ل بەر سەکەراتێ یە، ھێژاییێن مە یێن نەتەوەیی رۆژ ب رۆژ وەندا دبن و بوونە. عادەت و تۆرەیێن مە ھەما ھەما نەمانە. ل باکورێ کوردستانێ سیاسەت ژی مرییە.
زارۆک ئانگۆ جوانێن باکورێ کوردستانێ بێ کو ھای ژ خوە ھەبن، رۆژ ب رۆژ بەر ب ترکبوونێ ڤە دچن. ھەگەر ئیرۆ ھندەک تشت ل سەر لنگان مابن ئەو ژی ب سایا سالمەزنانە. ھەگەر وان ژی کۆچا خوە کرن، ئێدی چ تشتەکی مە نامینە.
ژ بەر ڤێ دڤێت سیاسەتمەدارێن مە، نڤیس و گۆتنێن کەسێن وەکە پەرینچەک باش و راست بخوینن. ئەو دزانین کو چ کرنە و دکن. یێن وەکە وی ھەمی کلیلێن دەولەتا کوورن. لێ مخابن یێن مە ڤێ نابینن…
سەرۆک، رێبەر و سەرکێشێن پارتیێن ژ خوە رە دبێژن: ئەم کوردستانی نە ڤێ دبینن لێ بێ دەنگن. یێن ب دەنگ ژی ھێزا وان تونەیە. لۆما نھا تشتا ھەری فەرز ئەوە کو ئەم رۆژەکێ بەری رۆژەکێ ل سەر خەتا نەتەوەیی ھێزێن کوردستانی د بن کۆنەکا نەتەوەیی دە بکن یەک.
ھەتا کو ئەڤ پێک نەیی ئەم وەکە کوردێن باکورێ کوردستانێ ئازادیێ نابینین. دێ ھەر باشوورێ کوردستانێ ژی د خەتەریێ دە بە. خورتبوونا باکورێ کوردستانێ، دێ ببە پاراستنا باشوورێ کوردستانێ. داگیرکەرێن مە ڤێ باش دزانن، لێ ئەم نزانن و فێم ناکن کو ئەم ل بەر قەداندنێ نە…
