کەرکووک د 16ێ جۆتمەھا 2017ێ دە ھات داگیرکرن. د ئۆپەراسیۆنا ب سەرۆکاتیا قاسم سلێمانی دە، پاسدارێن شۆرەشا ئیرانێ، ھێزێن حەشدا شەعبی یێن شیعەیێن ئالیگرێن ئیرانێ، حیزبووللاھا لوبنانێ و ئارتێشا ئیراقێ بەشدار بوون. ھەشت سال ل سەر ڤێ بوویەرا دلشەوات دەرباس بوون، ھێ وەکە دووھ ل بیرا کوردان دە مایە.

ب ڤێ داگیرکرنێ رە، ل گۆری بریارەکا یەنەکێ ، ژ سەدی 51 یا ئاخا کوردستانێ رادەستی ھێزێن شیعە ھات کرن.

پاشێ ئەشکەرە بوو کو د ناڤبەرا ھادی عامری، سەرۆکێ حەشدا شەعبی کو ل ئیراقێ ت پۆستەک فەرمی نەبوو، و سەرۆکێ یەنەکێ بافل تالەبانی دە پەیمانەک نەھ خالی ھاتیە چێکرن.

9 خالێن رێکەفتنا خیانەتێ

ل گۆری راپۆر و گۆتارێن بەرپرسان، د 16ێ جۆتمەھێ دە، پشتی نیڤا شەڤێ قاسم سلێمانی، فەرماندارێ ھێزا قودسێ یا سپاھا پاسدارێن شۆرەشا ئیرانێ، و ھادی عامیری سەرۆکێ حەشدا شەعبی، ل کەرکوکێ لگەل بافل تالابانی، کورێ سێکرتەرێ گشتی یێ یەنەکێ جەلال تالەبانی یێ رەحمەتی، ھەڤژینا وی ھێرۆ تالەبانی، و برازایێ وی لاھوور شێخ جەنگی و رێڤەبەرێ ئیستیخباراتا یەنەکێ جڤیان.

د جڤینێ دە، لھەڤکرنەک ھات کرن کو بیرێن پەترۆلێ و بالافرگەھا ل کەرکوکێ دێ رادەستی ھێزێن ئیراقی و حەشدا شەعبی وەرن کرن، و ھێزێن پێشمەرگەیێن گرێدایی یەنەکێ دێ ژ ڤان دەڤەران ڤەکشن.

خالێن لھەڤکرنێ وھا بوون:

1. ھێزێن ئیراقی دێ ژ نوو ڤە ل دەڤەرێن ناکۆکی ل سەر بجیھ ببن، و ھێزێن پێشمەرگە دێ ڤەکشن.

2. تەڤی کەرکوکێ، دێ 17 باژار و نەڤچەیێن کوردستانێ رادەستی حکوومەتا ناڤەندی هێن کرن.

3. ل کەرکوکێ دێ رێڤەبەریەک ھەڤبەش ھەبە. 15 تاخێن کوردان، دێ ژ ئالیێ کوردان ڤە هێن برێڤەبرن، و 25 تاخ ژی دێ ژ ئالیێ پێکھاتەیێن دن ڤە هێن برێڤەبرن.

4. حکوومەتا ناڤەندی دێ جھێن ستراتەژیک یێن ل کەرکوکێ کۆنترۆل بکە، د ناڤ دە بارەگەھا لەشکەری یا K1، بالافرگەھ و زەڤیێن پەترۆلێ.

5. ڤەکرنا بالافرگەھا سلێمانیێ.

6. مووچەیێن کارمەندێن سڤیل ل سلێمانیێ و کەرکوکێ ژ ئالیێ حکوومەتا ناڤەندی ڤە دێ هێن دایین.

7. مووچەیێن پێشمەرگە ل سینۆرێ سلێمانیێ دە دژین دێ ژ ئالیێ حکوومەتا ناڤەندی هێن دایین.

8. ھەلەبچە، سلێمانیێ و کەرکوکێ دێ وەکە ھەرێمەک ژ نوو ڤە هێن تەنزیم کرن.

9. ژ بۆ ڤێ ھەرێما نوو حکوومەتەک دێ هێن ئاڤاکرن.

بافل تالابانی ژی ئەڤ پەیمان قەبوول کر، کو ژ ئالیێ پارلامەنتەرێ گۆران مەسعوود حەیدەر ڤە ھاتە ئاشکەرەکرن. سەرۆکێ نھایێ یەنەکێ، بافل تالابانی، تەڤلی وەشانا سی ئێن ئێن یا ئەمەریکی بوو و گۆت، “بەلگەیا کو ژ ئالیێ 38 ژ 50 ئەندامێن رێڤەبەریا یەنەکێ ڤە ھاتیە ئیمزەکرن ل دەست من دایە” و قەبوول کر کو کەرکووک ب رێیا ڤێ پەیمانێ ھاتیە فرۆتن. وی ھەر وھا لیستەیا ئیمزەیێن کو د دەستێ وی دە بوون نیشان دا.

رێکەفتنێ دەریێ داگیرکرنا کوردستانێ ڤەکر

ئەڤ پەیمان ب تەنێ ل سەر کەرکوکێ سینۆردار نەبوو. ئەو ل سەر دابەشکرنا ھەرێما کوردستانێ بۆ دو بەشا و ھلوەشاندنا ستاتویا وێ بوو. پلانەکا بەرفرەھ و قرێژ دھات لیستن، و ھێزێن کو کەرکوک داگیر کرن دەست ب پێشڤەچوونێ کرن بەر ب ھەولێرێ ڤە ب رێیا پردێ رە و یێن کو دھۆکێ داگیربکن ژی ب رێیا سحێلا کەتن ئێرشێ. ئارمانج گرتنا ھەولێرێ بوو.

پلان مەزن بوو، لێ ھەلمەتا دیپلۆماتیک یا ناڤنەتەوەیی یا تەڤگەرا سیاسی یا بارزانی و بەرخوەدانا لەشکەری یا پێشمەرگەیان ل ئەنیێن پردێ و سحێلا د 20ێ جۆتمەھێ دە ئەڤ پلانێن خایینانە ژ ناڤ برن. ئێرشا جەپھێ داگیرکەر ب بەرخوەدانەکا داستانی ھاتە پووچکرن. تەنێ بەشەک ژ پەیمانا نەھ خالی یا د ناڤبەرا یەنەکێ و شیعەیان دە ھاتە بجیھانین.

سەرۆکێ یەنەکێ کۆسرەت رەسوول: ئەڤ خیانەتەکا دیرۆکییە

ھات راگھاندن کو ل گەل مالباتا تالابانی، ت بەرپرسێن پلەبلندێن یەنەکێ بەشداری جڤینێ نەبوونە. فەرماندارێ ھەرێما کەرکوکێ کۆسرەت رەسوول، کو پشتی وەفاتا مام جەلال  بوو سکێرتەرێ گشتی یێ دەمکی یێ یەنەکێ، پەیمانا مالباتا تالابانی لگەل ئیرانێ وەکی خیانەت ب ناڤ کر و گۆت؛ “راستە کو ھندەک ئەندامێن یەنەکێ تەڤلی رەفێن بەغدایێ بوونە. ئەڤ خیانەتەکا دیرۆکییە. ئیرادەیا مە نایێ شکاندن.”

کۆسرەت رەسوول دو رۆژان پشتی بوویەران داخویانیەک دا و گۆت، “بەرپرسیاریا کارەساتا کەرکووک و خورماتوویێ د ستوویێ زھنیەتا پاشڤەروویا د ناڤ یەنەکێ دەیە.”

پارێزگارێ کەرکووک رەحمەتی نەجمەدین کەریم، کو ل ھەمبەر رێکەفتنا خییانەتێ بەرتەک نیشان دا، بانگ ل رایا گشتی کر کو بەرخوەدانا چەکداری بکن و دیار کر یێن 16ێ جۆتمەھێ خییانەت کر، خییانەت کارەکی پر ھێسانە.

جەعفەر شێخ مستەفا، فەرماندارێ وێ دەمێ یێ ھێزێن 70 پێشمەرگە و کەسایەتەکی پایەبلندێ یەنەکێ ژی دیار کر کو د ناڤ یەنەکێ دە کۆمەک ھەیە کو لگەل حکوومەتا ئیراقێ و حەشدا شەعبی د ناڤا تێکلیدا نە و ئەڤ کۆم دخوازە سلێمانی، ھەولێر و دوھۆکێ رادەست بکە، مینا کو کەرکووک رادەست کریە. مستەفا گۆت کو کۆما یەنەکێ یا کو بەحسا وێ تێ کرن دخوازە حەشدا شەعبی و ئارتێشا ئیراقێ ھەتا سلێمانیێ بینە.

خیانەت بەردەوام دکە…

ھەر وھا تێ زانین کو پەکەکە راستەراست د خیانەتا کەرکوکێ دە بەشدار بوو. پەکەکێ ب ھەڤرێزیا لگەل یەنەکێ و حەشدا شەعبی، ھێزێن خوە ژ دوزخورماتو و ھەرێمێن دەردۆرا کەرکوکێ ڤەکشاند کامپێن سلێمانی و مەخموورێ. پشترە، ب تایبەتی د چاپەمەنیا ترکیێ دە، کامپانیایەک مەزن دا دەستپێکرن دا کو بوویەرێ ڤەشێرە. پەکەکێ بەشداریا خوە د خیانەتا کەرکوکێ دە ڤەشارت، و رەفەراندووما سەرخوەبوونا کوردستانێ یا د 25ێ ئیلۆنێ دە ئارمانج گرت. پەکەکە نھا ژی ھەمان سیاسەتێ ددۆمینە.

خیانەتا 16ێ جۆتمەھێ نە تەنێ ل کەرکوکێ، ل سەرانسەرێ ھەرێما کوردستانێ ئەنجامێن پر خەراب چێکر. یەنەکێ ھەڤکاریا خوە لگەل ئەنیا شیعە و تێکۆشینا خوە یا ژ بۆ دەستھلاتداریێ ل کوردستانێ، ب پشتگریا ڤی جەپھا دژە کورد، ددۆمینە.

وێنەیا کو د سالڤەگەرا ھەشتەمین یا خیانەتا کەرکوکێ دە دەردکەڤە ھۆلێ ئەڤە: دڤێت خیانەتکار بهێن دادگەهرکرن و دڤێت تاوانبار بهێن زیندانیکرن. گەر حەساپ نەیێ پرسین، ئەڤ خەتا خییانەتکار دێ د ھەر دەرفەتێ دە زرارێ بگھینن دەسکەت و کەرامەتێن کوردستانێ.