سەرۆکێ دهزگهها بارزانی: ئەمێ د هەر شەرت و مەرجی دە ل کێلەکا خەلکێ خوە یێ ل رۆژئاڤایێ کوردستانێ بن
سەرۆکێ دەزگەها بارزانی یا خێرخوازیێ مووسا ئهحمهد ئامارێن هەری نوو یا چالاکی و ئالیکاریێن دەزگەهی یێن ل رۆژئاڤایێ کوردستانێ ژ رایا گشتی رە راگهاند. ئهحمهد دەستنیشان کر، ئالیکاریێن وان سەکتۆرێن پەروەردە، تەندورستی و خوارنێ ل خوه دگرن.
سەرۆکێ سەرۆکێ دەزگەها بارزانی یا خێرخوازیێ مووسا ئهحمهد ئیرۆ 27ێ چلەیێ ل قامشلۆ د کۆنفەرانسەکە رۆژنامەڤانی دە هوورگلیێن خەباتێن مرۆڤی یێن ل هەرێمێن جودا یێن رۆژئاڤا ئەشکەرە کرن. ل گۆری ئامارێن داوی، خزمەتێن دەزگەهێ ب ڤی رەنگینە:
165 بارهلگر و 115 کارمەند ل قادێ نە
ل گۆری داخویانیێ، هەتا نها 165 بارهلگرێن تژە ئالیکاریێن مرۆڤی گهیشتنە باژار و باژارۆکێن رۆژئاڤایێ کوردستانێ. ژ بۆ دابەشکرنا ڤان ئالیکاریان، 115 کارمەندێن دهزگهها بارزانی د چارچۆڤەیا 12 تیمێن مەیدانی دە ب ئاوایەکی هەموەخت ل دەڤەرێن جودا خزمەتێ پێشکێش دکن.
58 هەزار کەس و 22 جورەیێن ئالیکاریێ
دانەیێن داوی نیشان ددن کو 9 هەزار و 180 مالبات (ب گشتی 57 هەزار و 955 کەس) ژ ئالیکاریێن جیهێرەنگ سوودمەند بوونە. د ناڤ ئالیکاریان دە 22 جورەیێن وەکی خوارن، دۆشەک، بەتانی و پێدڤیێن ناڤمالێ هەنە کو ل 82 دبستانان هاتنە بەلاڤکرن.
سۆتەمەنی و خوارنا گەرم
د سەکتۆرا ئەنەرژیێ دە، دهزگهها بارزانی 145 هەزار و 177 لیترە مازۆت و نەفت گهاندیە 108 دبستان و 8 مزگەفتان. د هەمان دەمێ دە، 9 هەزار و 330 دانێن خوارنا گەرم ل 15 دبستان و 3 مزگەفتان هاتنە بەلاڤکرن. مووسا ئهحمهد دیار کر کو ئەو پلان دکن رۆژانە 3 هەزار دانێن دن یێن خوارنێ ژی ئامادە بکن.
تەندورستی و ئافراندنا دەرفەتێن کار
تیمێن تەندورستیێ یێن دهزگهها بارزانی و تیمێن خوەبەخش، ل 34 دبستانێن جودا خزمەتا بژیشکی و دەرمان پێشکێشی 2 هەزار و 749 کەسان کرنە.
ژ ئالیەکی دن ڤە، دەزگەهێ گرانی دایە پشتگریا ئابۆریا مالباتێن ل هەرێمێ ژی. د ڤێ چارچۆڤەیێ دە، ژ بۆ 289 کەسێن ل هەرێمێ د پێڤاژۆیا ڤەگوهاستن و بەلاڤکرنا ئالیکاریان دە دەرفەتا کارا دەمکی هاتیە ئافراندن.
د داویێ دە، مووسا ئهحمهد تەکەز کر کو ئەڤ خەبات بەشەک ژ ئەرکێ نشتمانی و مرۆڤی یێ دەزگەها بارزانی یا خێرخوازیێ یە و ئەوێ ل سەر پەیاما سەرۆک بارزانی یا ژ بۆ پشتگریا لیقەومیان بەردەوام بن.
