د چارچۆڤەیا رێکەفتنا ھەسەدێ و شامێ دە ھێزێن ئەولەھیێ ل سەر رێیا M4ێ بەلاڤ دبن
د چارچۆڤەیا جیبجیکرنا خالێن رێکەفتنا د ناڤبەرا ھێزێن سووریەیا دەمۆکراتیک (ھەسەدێ) و حکوومەتا شامێ دە، ھێزێن ئەولەکاریا ھوندرین ل سەر رێیا ناڤدەولەتی یا M4ێ و دەڤەرێن جودایێن پارێزگەھا حەسەکێ دەست ب بەلاڤبوونێ کرن.
پێڤاژۆیا بەلاڤبوونا ھێزێن ئەولەھیێ ل پارێزگەھا حەسەکێ و ب تایبەتی ل خالێن سەرەکی یێن کەتنە باژارێ قامشلۆیێ دەست پێ کریە. د ڤێ چارچۆڤەیێ دە، ھێزێن ئەولەکاریا رێیان و ھێزێن ناڤخوەیی ل سەر خەتێن سەرەکی یێن تل تەمر – قامشلۆ و عاموودێ – قامشلۆ، ھەر وھا ل سەر رێیا ناڤدەولەتییا M4ێ ھاتنە بجھکرن.
ھێزێن ئۆپەراسیۆنانێن سەر ب ئاساییشێ ڤە، یێن کو تەڤلی ھێزێن حکوومەتێ بوونە، ب ھەڤاھەنگی و ھەڤکاریا ھێزێن ئەولەکاریا ناڤخوەیی ل سەر ڤان رێیێن ستراتەژیک خالێن کۆنترۆلێ یێن ھەڤبەش ئاڤا کرنە.
بریارە کو د رۆژێن پێش دە ئەو ئەندامێن ئاساییشێ یێن تەڤلی سیستەمێ بوونە، جلووبەرگێن فەرمی یێن ھێزێن ناڤخوەیی یێن حکوومەتێ ل خوە بکن و وەکی یەک ھێزا ھەڤبەش ئەرکا خوەیا ئەولەھیێ ل ھەرێمێ ب جھ بینن.
ئەڤ پێنگاڤ و تەڤگەرا نوویا ھێزێن ئەولەکاریێ د چارچۆڤەیا جیبجیکرنا خالێن رێکەفتنا 29ێ چلەیێ دە تێ کو د ناڤبەرا فەرمانداریا ھەسەدێ و حکوومەتا شامێ دە ژ بۆ ئاساییکرنا رەوشا ناڤچەیێ ھاتبوو ئیمزەکرن.
