ئارتێشا عەرەبی یا سووریەیێ ژ دەردۆرا حەسەکەیێ تێ ڤەکشاندن

ئارتێشا عەرەبی یا سووریەیێ ژ دەردۆرا حەسەکەیێ تێ ڤەکشاندن و ھێزێن سووریەیا دەمۆکراتیک (ھەسەدێ) ل چیایێ قەزوانێ تێن بنەجھکرن.

ل گۆر ئاگاهیان، ئیرۆ رۆژا شەمبی 31/1/2026ێ، د چارچۆڤەیا وێ لھەڤکرنا کو ھاتیە ئیمزەکرن دە، ھێزێن ئارتێشا عەرەبی یا سووریەیێ ژ شەڤا بۆری (ئەینی، 30/1/2026ێ) ڤە دەست ب ڤەکشینا ژ چەپەرێن ل دەردۆرا پارێزگەھا حەسەکەیێ کریە.

ئاگاهی ددن خویانکرن، ئارتێشا عەرەبی یا سووریەیێ ھێزێن خوە ڤەکشاندنە دەڤەرا شەدادییێ. ھێزێن سووریەیا دەمۆکراتیک (ھەسەدێ) ل چیایێ قەزوانێ، ل باشوورێ حەسەکەیێ، تێن بنەجھکرن.

چیایێ قەزوانێ (عەبدلعەزیز) ل باشوورێ رۆژئاڤایێ حەسەکەیێ جھەکێ جوگرافی یێ ستراتەژیکە و کۆنترۆلکرنا وی ژ ئالیێ ھەسەدێ ڤە سەردەستیەکا لەشکەری یا زێدەتر ل سەر دەڤەرێن باشوورێ وی باژاری ددە وێ.

کورتیا لھەڤکرنا ھسد و حکوومەتا سووریەیێ

فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی شەڤادی (ئەینی، 30/1/2026ێ) ھوورگلیێن ستراتەژیک یێن لھەڤکرنا لگەل حکوومەتا نوو یا شامێ ئەشکەرە کرن. مەزلووم عەبدی ئەشکەرە ژی کر کو، ئەڤ پێنگاڤا وان ژ بۆ پووچکرنا پلانێن قرکرنا گەلێ کورد ھاتیە ئاڤێتن. خالێن ھەری گرینگ ژی ئەڤن:

– ھێزێن لەشکەری: ھێزێن سووریەیا دەمۆکراتیک (ھەسەدێ) دێ ببە بەشەک ژ وەزارەتا بەرەڤانیێ یا سووریەیێ، لێ وەکی لیوا و یەکینەیێن لەشکەری دێ ل دەڤەرێن خوە بمینن.

– دۆزا ئەولەھیێ: ھێزێن ئەولەھیێ دێ ببن بەشەک ژ وەزارەتا ناڤخوەیی یا سووریەیێ و دێ ئەرکێ پاراستنا ناڤ باژاران وەربگرن؛ ئارتێشا سووریەیێ دێ نەچە ناڤ چ باژار و گوندێن کوردان.

– برێڤەبرن و زمان: پەروەردە ب زمانێ کوردی ل دبستان و زانینگەھان دێ هێت فەرمیکرن. کارمەندێن رێڤەبەریا خوەسەر دێ ببن کارمەندێن دەولەتێ و برێڤەبرنا دەڤەرێ دێ د دەستێ خەلکێ دەڤەرێ دە بە.

– رەوشا کۆبانیێ: دۆرپێچا ل سەر کۆبانیێ دێ هێت راکرن و ئەو ھێز دێ ژ ھوندر بۆ دەردۆرا وی باژاری هێن ڤەکشاندن.

گارانتیا ناڤنەتەوەیی: ئامەریکا و فرانسا ل سەر وان ھوورگلیان ھایدارن و دێ وەکی گارانتیکەرێن سیاسی بمینن.

مەزلووم عەبدی تەکەز ژی کر کو، ھەر چەند ئەو لھەڤکرن ل ئاستا ھەمی داخوازێن وان نینە ژی، لێ ئەو ژ بۆ پاراستنا دەستکەفتیان د ڤێ قۆناغێ دە چێترین ڤەبژارک بوو.