تێکچوونا پەکەکێ سەرکەتنا گەلێ کوردە!!!
بووبێ ئەسەر
ب سالان مە گۆت و نڤیسی کو پەکەکە رێخستنەکە کو ژ لایێ داگیرکەران ڤە ھاتیە دامەزراندن دا کو ھەمی ھێژائیێن کوردان ل ھەرچار پەرچان تێک ببە.
ب ڤێ ئارمانج و پرۆژەیا کو داگیرکەران ژ بۆنا وان دەستنیشان کربوون، کارێ خوە پێک ئانین و ھێژی ھەتا کو ژێ بهێت دێ پێک بینە. خەرابی و ھلوەشاندنا کو پەکەکێ کرییە دەھ قاتان ژ یا داگیرکەران مەزنترە. ژ بەر کو وان مەژیێ کوردان تێک برن و روحیەتا کوردستانی کوشتن.
ب دەھان ھەزار خۆرتێن کوردان د بەر ھیچێ دە دانا کوشتن. ب سەدان رەوشەنبیر و سیاسەتمەدارێن کوردان چ کوشتن و چ ژی بێ دەنگ کرن. گەلەک ھونەرمەند و بیرمەندێن کوردان بەرێ کرن زلامێن خوە، دوورە ژی بێ روومەت و قیمەت کرن.
ل سەرانسەرێ ئەورۆپایی ژ بۆنا کوردان وەکە تەرۆریست و خەراب نیشان بدە، چ ژ دەستێ وان ھات کرن و ھێژ دخوازن بکن، لێ ئێدی ملەتێ کورد هشیار بوویە.
ژ بەر کو عەڤدللا ب خوە گۆتبوو؟ “ھەتا کو ئەز و پەکەکە ھەبن دێ بارزانی نکاربە ببە دەدولەت”. ئارمانجا وی ب ڤێ، یانی کورد دێ نەبن دەولەت. گۆتنێن عەڤدللا د گەلەک واران دە راست ژی بوون. ئەز دبێژم کو د ناڤا پەکەکێ دە یێ ھەری راست و درست عەڤدللا ب خوە بوو کو وی تم ھەر تشتێن خوە ڤەکری دگۆت، لێ مریدان ئەو ب ئاوایەکی دن شرۆڤە دکرن و پێشکیشی گەلێ کورد دکرن.
یانی پەکەکە ل سەر ئەساسێ خوینا جوانێن کورد، ب دەرەو و بۆختانان رۆژ ب رۆژ ب پێش کەت. ھەر چقاسی ئەڤ رەوش ژ لایێ گەلەکان دھات زانین و گەلەکان دنڤیسین ژی بالا پرانیێ نە دکشاند.
ژ بەر عەڤدللا و ئاقلمەند ئانگۆ خوەدیێ وی باش زانیبوون کو ئال ھەبوونە. لەورا وان چ جاران ئالایێ کوردستانێ قەبوول نەکرن و بلند نەکرن. ھەتا گەلەک جاران ئەو شەوتاندن و ئاڤێتن ناڤا ھەریێ.
پشتی ھلوەشاندنا رەژیما سووری و رەڤا ئەسەد. ب ھاتنا ئەحمەد شەرع و دەستھلاتا وی. بوویەرێن نوو ل رۆژئاڤایێ کوردستانێ روو دان. دەستھلاتا سووری یا نوو ل سەر داخوازا ترکان خوەست کو کوردان تونە بکە. د وارەکی دە پەکەکە ژی ژ وان رە بوو ئالیکار.
لێ پەکەکە و داگیرکەرێن مە حەسابا دەستھلاتا باشوورێ کوردستانێ و بارزانیان نەکرن. یا ژی ئەو زێدە گرینگ نەدیتن. باوەریا وان ئەو بوو کو چ بخوازن دێ بکن. یەک ژ ڤێ ژی ئەو بوو کو ل رۆژئاڤایێ کوردستانێ، ل سەر دەستێ ئەحمەد شەرع ل گەل ترکان خەلاسکرنا ئانگۆ قەداندنا کوردان بوو.
لێ بارزانیان و ب تایبەتی سەرۆک بارزانی رێ نەدان دژمنان کو وەکە خوە بکن. جەنابێ سەرۆک ب گۆتن و تێبنیێن خوە، کوردێن ھەرچار پەرچان ھەمبێز کرن و خوەست ب یەک دەنگی، ھەلوەست و ل گەل ئالا کوردستانێ، ل ھەمبەر داگیرکەران راوەستن. ھەر وەھا ژی بوو.
ب دیپلۆماسیا ناڤنەتەوەیی، دانووستەندنێن لگەل دەولەتێن مەزن، سەرۆک بارزانی رۆلەک مەزن و ئەرکەکی پێویست ئانی جھ و خوەست جیھان بزانبە کو کورد نە بێخوەدی نە.
کوردێن سەرانسەرێ جیھان و کوردستانێ ب ھەمی ھەلوەستێن خوە، ب یەک دەنگ و ئالێ ل ھەمبەر داگیرکەران راوەستیان و خوەدی ل برایێ خوە دەرکەتن. د ھەمی خوەپێشاندانێن وان دە تەنھا ئالا کوردستانێ ھەبوو و دوورشمێن وان یەک بوو.
کوردستانیان ب ڤان خوەپێشاندانێن خوە ھم ھێزا سەرۆکێ خوە رێزدار مەسعوود بارزانی د قادا ناڤنەرتەوەیی دە خورت کرن، ھم ژی ئالێن پەکەکێ، داخواز و دورشمێن وان بنەرد کرن. کوردان ل سەران سەرێ جیھانێ یەکتیا خوە پێک ئانین.
ئێدی جیھان ژی فێر بوون کو کورد نە بێخوەدی نە. فێر بوون کو ئێدی سەرۆکەکی کو ھەمی کوردان ھەمبێز بکە ھەیە. فێربوون کو ئەو سەرۆک دێ تەنھا ژ بۆنا بەرژەوەندیا گەلێ کورد ب ھەمی ھێز و قاوەتا خوە کار بکە دا کو کوردان ژی بکە خوەدی دەولەتا وان. ئەو ژی سەرۆک مەسعوود بارزانییە…
لۆما دبێژم کو تێکچوونا پەکەکێ سەرکەتنا گەلێ کوردە. بێدەنگکرنا پەکەکێ ب دەنگکرنا کوردانە. لاوازبوون و تێکچوونا پەکەکێ ئازادی و سەرخوەبوونا گەلێ کورد ل ھەر چار پەرچانە.
دڤێت ملەتێ کورد ئێدی ڤێ باش فێر ببن کو یێن مافێ وان دپارێزە نە پەکەکەیە، بەلکو خەت و رێبازا بارزانیە. ھەگەر ئیرۆ نە ب وان دیپلۆماسی و تەڤگەرێن بارزانیان و کوردستانیبوونا وان با، ھم دا رۆژئاڤا ژناڤچیت و ھم ژی دا ئەو داخوازا کو کوردان تونە بکە هێتە جھ.
ھەگەر ئیرۆ ل سەرانسەرێ جیھانێ ب یەک ئالا و ھەلوەستێ کورد رابوونە سەر لنگێن خوە، ب سایا وێ رێبازا پیرۆز و بناغێ وێ یێ گران رێزدار سەرۆک مەسعوود بارزانییە. گۆتنەکا کوردان یا خوەش ھەیە کو دبێژە: “ھەتا من خوە ناس کر، من مالێ خوە خەلاس کر.”
ھەتا ھندەک کوردان ژی بارزانی و رێبازا پیرۆز ناسکرن، مال و زارۆکێن خوە خەلاس کرن. لێ دڤێت کورد ئارام بن، بێھنفرەھ بن. تالییا تالی کورد دگهیژن مافێ خوە یێ رەوا. تەنھا تشتێ لازمە ئەوە کو کورد خوە ل گۆر خەتا بارزانیانی یا نەتەوەیی بکن یەک. ژ بۆنا پەکەکەیا کو ئەوقاس وێرانی ب سەر کوردان ئانییە، بنەرد ببە دڤێت ل گەل ھەڤ کار بکن.
رۆژێن خوەش د کوردستانەکا ئازاد و سەربخوە دە نێزیکە…
بژی کورد و بژی کوردستان
