بووبێ ئەسەر

دەما ل وەلاتێن کۆلۆنی سیاسەت بخەتمە، سیاسەتمەدار ئەرکێ خوە نەینن جھ، وێ گاڤێ رەوشەنبیر، نڤیسکار، دیرۆکزان، مامۆستە و کەسێن خوە وەکە پێشکێشێن مللەتی دبینن، ب ھەڤرە کارەکی دکن، دا کو وەلاتێ وان ژ بن زلما داگیرکەران بهێت ئازادکرن. ژ بۆنا ملەت بێ ئەلتەرناتیف نەمینە، ب کارێ سیاسی ڤە رادبن.

ل باکورێ کوردستانێ ژی پێشیا سیاسێتێ خەتمیە. گاڤەکێ ژی ب پێش ناکەڤن. سەدەما ڤێ خەتماندنێ ژی سالمەزنێن مۆدێلا سالێن 1970یێ یێن ئایدۆلۆژیکن. ڤێ خەتماندنێ نابینن، لێ تم ژی پەسنێ خوە ددن کو وەکە ب سەر کەتبن. نە یەکتیا ناڤا مالا کورد پێک تینن، نە رێڤەبریێ ددن جوانان، نە ژی ئەرکێن خوە یێن نیشتیمانی پێک تینن. ژ کەسێن ڤێ رەوشێ دبینن، دبێژن و دنڤیسینن ژی دغەیدین و دخوازن وان د  جڤاتێ دە بێ باندۆر بھێلن. ب ڤی کاری ژی د ھندەک واران دە ب سەر ژی کەتنە و دکەڤن.

دەما رەوشا سیاسی یا باکورێ کوردستانێ ھاتبە ڤێ قۆناغێ، وێ ھندەکێن دن کو ب ئەسلێ خوە نە سیاسی نە، ئانکو رەوشەنبیر و پێشەیی، ھونەرمەند و ھتد دێ دەست باڤێژن برینا کوردان و ژ بۆنا دەرمانکرنا برینێ دێ دەرمانەکی پەیدە بکن.

نھا ل باکورێ کوردستانێ ژی رەوش ئەڤە. سالمەزنێن کەتنە سەرێ کانیان ھەمی ژی مۆدێلا کەڤنن، نەخوەشن، ژ خوە پێڤە کەسێن دن ناعەجبینن، نابینن و پێشنیارێن رەوشەنبیران گوھداری ناکن. دەما تو ڤێ رەوشێ ژ خەلکێ رە ڤەدکەی، ژ تە دغەیدن، عاجز دبن ھەتا ئێدی ل گەل تە ژی نەما قسە دکن. ڤێ ژ بۆنا  کو تو ئەشکەرەکرنا بێدەنگی و نەیەکرزیا وان نەبێژی و نەنڤیسینی، دکن.

پرانیان سیاسەتمەدارێن مۆدێلا سالێن حەفتێیان ژی، ژ کوردستانیبوونێ پتر، شەخسی و مالباتی دفکرن. ژ بەر ڤێیە کو ل باکورێ کوردستانێ، یەکتی و یەکرێزیا ناڤا مالا کورد پێک نایێ. پرانیا کەسێن وەھا ژی د ناڤا یەک پارتیێ دە یەکتیا خوە پێک ئانین کو دەنگ ژ کەسێن راست و درست دەرنەکەڤە.

دەما کو رەوشا باکورێ کوردستانێ ھاتبە ڤێ قۆناغێ، ھەلبەت دێ ھندەک رەوشەنبیر و بەشێن جڤاتێ یێن جڤاکی و مەدەنی و یێن پێشکەتی دێ ب ھەڤرە ھەول بدن کو پێشی ل وێ خەتماندنێ ڤەکن. د ڤردە وێ ناکۆکیەک نوو بێ دەستپێکرن کو ئەو ژی دێ سیاسەتمەدارێن مۆدێلا کەڤن و کەسێن دخوازن ل گۆر دەمێ مللەتێ خوە ب رێخستنی بکن، ل ھەڤ کەڤن. ھەتا دێ ھندەک سەرۆک و رێڤەبر ل دژ تەڤگەرێن نوو ژی دەرکەڤن.

ئەز گھشتم وێ باوەریێ کو دڤێت پارتیێن مە یێن سیاسی یان دڤێت یەکتیەکا ب ھەڤرە ل سەر خەتا نەتەوەیی ئاڤا بکن، یان ژی دڤێت ھەرکەس ئێدی ل مالا خوە روونێن. جۆک خەتمیە، ژ بۆنا حەرکاندنا ئاڤێ دێ هندەکێن دن، کەس، کەسایەتی و رەوشەنبیرێن گەل، ب قەزمە و بێران پێشی ل حەرکاندنا ئاڤێ ڤەکن. ژ بەر کو جڤاتا باکورێ کوردستانێ یا نھا د پێشیا پارتیێن سیاسی دە نە.

نھا ھندەک حازری ھەنە. ھندەک ژ رەوشەنبیران قەزمە و بێر ھلگرتنە دا کو وێ خەتماندنێ ڤەکن کو ئاڤ بحەرکە. لێ دێ چقاسی ب سەرکەڤن، د رۆژێن پێشدە ئەم دێ ب ھەڤرە ببینن. دەما پارتیێن سیاسی و یێن ژ خوە رە دبێژن، ئەم کوردستانینە ب ئەرکێن خوە ڤە رانەبن، ھەلبەت دێ ھندەک دەرکەڤن کو کارێن سیاسی ژی بکن.

لێ ھێژ ژی ھندەک سەرۆک و رێڤەبرێن پارتیێن مە یێن سیاسی و کوردستانی ڤێ نابینن. ژ کەس، کەسایەتی و نڤیسکارێن ڤێ ددن زانین ژی عاجزن. ھەڤالتی و دۆستانیا وان ژی رۆژ ب رۆژ کێم دبە. لێ فێم ناکن کو ئەڤ رەوش وەھا نامەشە. یان دڤێت زووترین دەمێ ئەو یەکتیەکا ل سەر خەتا نەتەوەیی ئاڤا بکن، یان ژی دێ ھندەک ژ بلی وان ڤی کاری بکن.

ژ بەر کو گەلەک سەرۆک و رێڤەبرێن پارتیێن کوردستانێ ھنگێ خوە مەزن دبینن کو نەما دکارن دۆستێن خوەیێن نێزیک ببینن و ژ رەخنەیێن رێھەڤالێن خوە ژی عاجزن. یا دڤێت ئەندام تەنێ ژ سەرۆک و رێبەرێن خوە رە ل چەپکان بخن یان ژی ھێدی ھێدی یێن رەخنەیان دکن، ب سایا وان سەرۆک و رێبەران ژ جڤاتێ دوور دکەڤن. ژ خوە مالوێرانیا مەزن ژی ئەڤە.

پارتیەکا کو ئارمانجا وێ ئازادیا کوردستانێ بە و دەرکەتبە سەر رێ، بێ نڤیسکار، رەوشەنبیر و رەخنەگران دێ د نیڤا رێ دە ئاسێ بمینە. وەکە رەوشا نھا یا پارتیێن مەیێن سیاسی کو چ رەخنەیان ل سەر خوە قەبوول ناکن.

ھندەک ژ سەرۆک و رێڤەبرێن پارتیێن کوردستانی، ب ڤێ ژی دخوازن پێشی ل کەسێن راستیێ دبێژن و دنڤیسینن بگرن، دا کو ھەر تشت وەکە وان ببە و ھەرە. نە رێ ددین کو تو ل گەل وان قسە بکەی و نە ژی نڤیسێن تەیێن رێنیشاندانێ دخوینن و فێم دکن.  لێ فێم ناکن کو ئەڤ ژی مالوێرانیەکە ب سەرێ خوە یان ژ چاندا پەکەکێ تێ و ھاتیە. تێ ناگھێژن کو ئەوێن ھەتا ھەتایێ نە سەرۆک و رێڤەبر بن. نھا ئەڤ ژ وان رە دقەدە لێ سبە دێ چ ببە دێ ب چاڤێن خوە ببینن.

دڤێت بهێت زانین کو ئاڤ تم رێیا خوە دبینە و ھەر دحەرکە. ئاستەنگیێن پێشیا خوە رادکە، رێیەکا نوو ژ خوە رە ڤەدکە.ق رش و کالێن کو ب بەر وێ کەتبن ژی ل قراغەیێ دھێلە و دھەرە…

نھا رەوشا باکورێ کوردستانێ ژی وەھایە. ئەڤ خەتماندن، دێ ب سایا رەوشەنبیر و بەشێن جڤاتێ یێن سڤیل بێ ڤەکرن. ژ بەر کو ئێدی پارتیێن مەیێن سیاسی و کوردستانی ب سەرۆک و رێڤەبرێن خوەیێن مۆدێلا کەڤن، نەما دکارن ب ئەرکێ خوە ڤە رابن. لۆما ژی دێ ژ نھا و پێ دە رەوشەنبیرێن کورد ب گشتی بکەڤن ناڤ کارێ سیاسی کو ل گۆر داخوازێن گەل و مللەت سیاسەتەکە ئاقلانە بدن دەستپێکرن. گاڤێن دێ بێنە ئاڤێتن و ب ڤی ئاوایی ھەرە، نە دەمەکە زێدە دوور دێ فاتحا ل سەر روحێ گەلەکان بێ خوەندن.

لەورا تشتێ عاجیل و گرینگ ئەوە کو زووترین دەمێ پارتیێن مەیێن سیاسی و کوردستانی یەکتی و یەکرێزیا مالا کوردا ئاڤا بکن دا کو سیاسەتمەدار، رەوشەنبیر و شەخسیەتێن سڤیل ب ھەڤرە ببن خوەدی ئەلتەرناتیفەکا نەتەوەیی کو پێشیا رێیا ئاڤا خەتماندی ڤەکن کو ئاڤ ئێدی بحەرکە.