تەڤی رێکەفتنا شام و ههسهدێ، دۆرپێچا ل سەر کۆبانێ هین ژی بەردەوامە
باژارێ کۆبانێ 23 رۆژێن ل سەر هەڤە کو د بن دۆرپێچەکە گران یا هێزێن حکوومەتا دەمکی یا سووریێ دە یە. تەڤی رێکەفتنا ناڤبەرا ههسهدێ و حکوومەتا دەمکی، دۆرپێچ نەهاتیە راکرن و ژیانا دەهـ هەزاران وەلاتیان د بن مەترسیێ دەیە.
دۆرپێچکرنا کۆبانێ د 18ێ چلەیا 2026ان دە دەست پێ کر. تەڤی کو د 29ێ هەمان مەهێ دە ل شامێ د ناڤبەرا هێزێن سووریەیا دەمۆکراتیک (ههسهدێ) و حکوومەتا دەمکی یا سووریێ دە پەیمانەک ژ بۆ راکرنا دۆرپێچێ هاتبوو ئیمزەکرن، لێ هەتا نها هێزێن حكوومهتا دەمکی رێ نادن کو پێدڤیێن بنگەهین دەرباسی باژێر ببن.
رەوانگەها سووری بۆ مافێن مرۆڤان (سۆهر) راگهاند، ل دەرمانخانەیێن باژێر کێماسیەکە پر گران یا دەرمانان هەیە، ب تایبەتی دەرمانێن نەخوەشیێن کرۆنیک یێن مینا شەکر، زەختا خوینێ و نەخوەشیێن دل. ل گۆری راپۆرێ، هێزێن ل سەر خالێن کۆنترۆلێ دەست داتینن سەر وان دەرمانێن کو هەول تێ دایین ژ حەلەبێ دەرباسی کۆبانێ بێن کرن.
ژ بەر تێکچوونا رەوشا تەندورستیێ و نەبوونا خزمەتگوزاریێن بژیشکی، ل گوندەوارێن رۆژهلاتێ کۆبانێ ژنەکێ ژیانا خوە ژ دەست دا. هات راگهاند کو ژ بەر دۆرپێچێ، مالباتا وێ نەکاری وێ د دەما پێویست دە بگهینن نەخوەشخانەیێ.
پشتی کو د 18ێ مەهێ دە کەهرەبە ب تەمامی هاتبوو برین، دوهـ سێشەمێ ب هەڤاهەنگیا خاچێ سۆر خەتا کەهرەبێ یا باژێر هات چێکرن. لێبەلێ، نها د ناڤا رۆژێ دە تەنێ 2 ساعەت کەهرەبە تێ دایین. ئەڤ یەک بوویە سەدەم کو پۆمپێن ئاڤێ نەخەبتن و پرانیا تاخێن باژێر هین ژی بێ ئاڤ مانە.
دۆرپێچێ باندۆرەکە گران ل ئابۆریا باژێر کریە و بهایێن کەلووپەلان گەلەکی بلند بوونە کو کیلۆیەک فرنگی گهیشتیە 40 هەزار لیرەیێن سووری، و لیترەیەک مازۆتا گەرمکرنێ گهیشتیە 5 دۆلاران (50 هەزار لیرە)، د هەمان دەمێ دە سۆتەمەنی ل باژێر نەمایە و تەنێ ب رێیا قاچاخچیتیێ پەیدا دبە.
ژنەکە کۆچبەرا ل کۆبانی ژ بۆ سۆهرێ وها ئاخڤی: “ژ بۆ مە، مرن ژ ڤێ ژیانێ چێترە. تشتەکی مە نینە؛نە چای،نە شەکر ئوونە ژی ئاڤ.”
رەوانگەها سووری بۆ مافێن مرۆڤان بانگەکە بلەز ئاراستەیی جڤاکا ناڤدەولەتی و حكوومهتا دەمکی کر کو بەرپرسیاریا ژیانا خەلکێ سڤیل بگرن سەر خوە و دەملدەست دۆرپێچا ل سەر کۆبانی راکن، دا کو کارەساتەکە هین مەزنتر روو نەدە.
