مە ژ نەورۆزا 2026ێ چ فێم کر؟؟؟
بووبێ ئەسەر
ملەتێ کو ل سەر کۆکا خوە مەزن نەبە، د گەلەک واران دە کێمانی ب کەس و کەسایەتیێن وی ملەتی رە پەیدا دبە. ژ بەر ڤێیە کو ژ خوە و ژ ملەتێ خوە پتر، ژ ملەت و پێشەڤانێن ملەتێ سەردەست حەز دکە. وان ژ خوە مەزنتر و باشتر دبینە.
ھەگەر زارۆکێن ملەتەکی ب دیرۆک و چاندا خوە مەزن نەبن، ئەوێن پتر خوە نێزیکی چاند و دیرۆکا گەلێ سەردەستێ خوە بکە و پشتی دەمەکێ ژی دێ ژێ باوەر بە کو ئەو یا وییە ژی. ژ بەر کو سەردەست وێ فێری وان دکە.
ھەگەر ملەتەک ب هشیاریا خوەیا نەتەوەیی مەزن نەبە، وێ رۆژ ب رۆژ ژ گەلێ خوە، ژ زمان، ھەبوون و رۆژێن خوەیێن نەتەوەیی دوور بکەڤن. ئەڤ ژی دبە سەدەما خوە ژ بیرکرنێ یا وەکە نەتەو. لۆما ژی پتر خوە نێزیکی سەردەستێن خوە دکە. وان ژ خوە پتر دپارێزە و خوەدی ل وان دەردکەڤە. وەکە دەوشیرمەیێن کو خوە ترک دحەسبینن.
چ دەما داگیرکەر، وەلاتەکی داگیر دکە، مەژی، عادەت و تۆرەیێن ئینسانێن وی وەلاتی ژی داگیر دکن کو وەکە ملەت خوە ژ بیر بکە. ب عادەت و تۆرەیێن خوە مەزن نەبە. لۆما ژی ئەڤ زێدەتری سەد سالانە کو ھەرچار داگیرکەرێن مە، تشتێن من ل ژۆر بەحس کرن، ئانیە و تینە سەرێ گەلێ مە.
لێ ژ بەر کو ئەم کورد ملەتەکی قەدیم و مەزنین، دکارین ئەوقاس سال ل ھەمبەر ھەمی قەدەغەیان، بەر خوە بدن، مە دا و ددن. ئەم کەتن لێ خەلاس نەبوون، جەژن و عادەتێن مە ل مە قەدەغە کرن، لێ مە د ھەر فرسەتان دە، چ ب دزی و چ ژی ب ئەشکەرەیی ئەو پیرۆز دکرن کو نەیێن ژ بیر کرن.
ب لێدان و ئێشکەنجەیان، ب زۆر و زەحمەتیان، مە وەکە ملەتێ کورد، ھەتا کو ژ مە ھات، ھەتا کو مە کاریبوو، مە نەھشت ئەو عادەت و تۆرەیێن مە وەندا ببن.
مە گەلەک جاران ئاگرێ نەورزێ د مالێن خوە دە پێ دخست. د دلێ خوە دە پێخست. د زیندانێن داگیرکەراندە، ب پێخستانا فندەکێ مە نەورۆز پیرۆز دکر. ل گوندان رۆژا نەورۆزێ ئەم خۆرت و کەچێن گوندان، مە جلوبەرگێن خوەشک ل خوە دکرن. خوە بەرا بنیا گوند ددان و گۆڤەند دگەراند. شاھی و خوەشی ب ھەڤرە پیرۆز دکرن بێ کو ئەم ناڤێ نەورۆزێ ب ناڤ بکن و ژ مە گەلەکان ژی نزانیبوون ئەو نەورۆزە.
لێ ئیرۆ ب سایا ئازادیا باشوورێ کوردستانێ، ڤەکری و ب ئەشکەرەیی کورد جەژنا خوەیا نەتەوەیی نەورۆزێ ل سەرانسەری کوردستانێ و ل جیھانێ ب گرسەیێن مەزن پیرۆز دکن. ئەڤ ژی مە فێری وێ یەکێ دکە کو ئێدی خەتا نەتەوەیی گەش و خورت دبە.
ئیرۆ نە وەکە دۆهییە کو ھەر پارتی و تەڤگەر ب ئالایێن خوە دەرکەڤن کۆلانان. ئیرۆ ئالایە رەنگین نە تەنێ ل قادێن پیرۆزکرنا شاھیان بلند دبە. ئەو ژی ب مە ددە ئیسپاتکرن کو کورد رۆژ ب رۆژ ل نەتەوەبوونا خوە ڤەدگەرن. روحیەتا نەتەوەیی بەرز دبە، وەلاتپەروەری گەش دبە. ب ڤێ بلندبوون و گەشبوونێ تێ فێم کرن کو ئازادی و سەرخوەبوونا کوردستانێ نێزیک دبە.
دوهی ئەم بێ خوەدی بوون، ب تەنا سەرێ خوە بوون. ھەر پیرۆزکرنەکا نەورۆزەکێ دە مە بەدەلێن مەزن ددان. ژ بەر پیرۆزکرنا نەورۆزێ، مە تەعدا و ئێشکەنجەیێن ھۆڤانە ددیتن. ب سالان د زیندانێن داگیرکەراندە دماین. ئالایا کوردستانێ ب کێ رە بھاتا گرتن ب سالان د زیندانێ دە رادزان. لێ ئیرۆ ل کۆلانێن باکورێ کوردستان، ترکیە و ئەورۆپا ب ئالایا رەنگین تێنە خەملاندن.
د دەمێن بەرێ دە ل ھەمبەر ھەمی ئێش و ئازارێن دھات سەرێ گەلێ مە، مە دیسا ب دزی و د قونجکێن تاری دە ل گۆر شەرت و مەرجان، نەورۆزا خوە پیرۆز دکر.
لێ ھەر تشتەک وەکە خوە نامینە. ژ بۆنا کوردان ژی ئازادیا باشوورێ کوردستانێ یا کو ب سایا تەکۆشینا بارزانیان، ھاتە ئازاد کرن. ئەو ئازادی ژ بۆنا ھەمی کوردان بوو ھێز و قاوەت. وێ ھێز و قاوەتێ ھەمی ئیمکانێن کو ھەبوون، ژ بۆنا ھەمی کوردێن ھەر چار پەرچان ل گۆر ئیمکانێن دەست ددا ب کار ئانین و تینن. ھەگەر نە ئەو بانا مە ئیرۆ ل چ قادەکا باکورێ کوردستانێ و ل ترکیێ ئالایێن کوردستانێ نەددیتن. ژ بەر کو ئەو ئالا ب دەستێن کەمالیستێن کورد ھاتبوو قەدەغەکرن…
دیسا ب سایا ئازادیا باشوورێ کوردستانێ، کورد ژ بێخوەدیتیێ ھاتن رزگارکرن. ئێدی ل کو و ل کیژان پەرچێ کوردستانێ کورد تەعدا، ئێشکەنجێ ببینن، دەستھلاتیا باشوورێ کوردستانێ و ب تایبەتێ بارزانیێن کو ئیرۆ ژ ھەمی کوردان رە بوونە وەکە باب، خوەدی ل وان دەردکەڤن. وان دپارێزە. د قادێن ناڤنەتەوەیی دە ژ ھەمی کوردان رە دبن پالپشت.
لەورا نھا ل وەلاتێن ئەورۆپا نەورۆز ب سەرپەرەشتیا رەڤەندا کوردستانی و تەنێ ب ئالایا کوردستانیان تێ پیرۆزکرن. روحیەتا کوردەواری د ناڤا کوردان دە گەش دکە. ب ڤێ گەشبوونێ ژی رۆژ ب رۆژ ئالایا نەتەوەپەروەریا کورد بلند دبە. ئاھا چ دەمێ ئەو خەت، ئەو باوەری و ئەو زانین د ناڤا کورداندە گەش و بلند ببە، ئەڤ ب مە ددە زانین کو ئازادی و سەرخوەبوونا کوردستانێ نێزیکە.
ب ڤێ ھشمەندیێ ئێدی کوردان ژی فێم کرن کو خەلاسی و ئازادیا وان د ڤێ رێبازا ب خوینا پێشمێرگەیان ھاتبوو نڤیسینێ دەیە. ئەو رێبازە کو دێ کوردان ژ ھەمی تەنگاسیان و ل ھەر چار پەرچان ئازاد بکە.
ژ بەر ڤێیە کو ئێدی کورد و کوردستانی ژی خوەدی ل رێبازا خوە دەردکەڤن، دخوینن و ددن خوەندنێ. ژ بەر کو ئێدی کورد گھشتنە ئاستا خوەدی ل خوە دەرکەتاندنێ. کوردان فێم کرن کو ژ براتیا کوردان پێڤە چ برایێن مەیێن دن تونە نە. کورد تێ گھشتن کو ئێدی رێ و رێبازەکا وان ھەیە کو خەلاسیا خوە د وێ دە دبینن.
بەرێ ل باکورێ کوردستانێ د خوە پێشاندنێن ھەدەپەدەمێ دە تە نەوێریبوو ئالایا کوردستانی ھلدی. تە نەوێریبوو بەحسا بارزانیان بکی. لێ ئەم دبینن د مەش و خوە پێشاندانێن وان دە ژی ئالایا کوردستانێ تێ بلندکرن. ئێدی پرانیا وان ژی رێبازا پیرۆز ناسکرنە و دکن. سەرۆک بارزانی وەکە سەرۆکێ خوە دبینن. ئەڤ ژی ب سایا سیاسەتا کوردستانی یا بارزانیان و سەرۆک مەسعوود بارزانی بوو کو ھاتیە ڤێ مەرحەلێ…
نامەیا نەورۆزا 2026ێ، یەکتی و یەکرێزیا ھەمی کوردستانیان بوو کو ئێدی ئەڤێ رۆژ ب رۆژ گەش ببە. ئێدی ھەر نەورۆزەک دێ ژ یا بەری خوە خورتر و مەزنتر ببە…
