ئۆجالان: پرسگرێکا مەنە ب کۆمارێ رە، ب نەبوونا دەمۆکراسیێ رەیە
شاندەیا ئیمرالیێ یا پارتیا وەکهەڤی و دەمۆکراسیێ یا گەلان (دەم پارتی)، دەربارێ هەڤدیتنا رۆژا 27ێ ئادارێ یا ب رێبەرێ پهكهكێ عهبدوللا ئۆجالان رە داخویانیەک بەلاڤ کر. ئۆجالان د پەیاما خوە دە بال کشاند سەر گەشەدانێن ل هەرێمێ و دەستنیشان کر کو ئێدی سەردەما تێکۆشینا چەکداری ب داوی بوویە.
شاندەیا ئیمرالیێ یا دەم پارتیێ، نرخاندنێن عهبدوللا ئۆجالان یێن د هەڤدیتنا داوی دە ب رایا گشتی رە پارڤە کرن. ئۆجالان گۆت: «دڤێ ئەم ب ئاوایەکی تەنگ نێزیکی ڤێ پرسگرێکا مەزن نەبن کو ئەم هەول ددن چارەسەر بکن. ژ بەر کو ل سەر رۆژهلاتا ناڤین پلانێن هەگەمۆنیک یێن کوور هەنە. هەر چەند لگەل رەوشا غەدار یا ل سووریەیێ هن پێشکەتنێن ئەرێنی هەبن ژی، نها شەرێ ب ئیرانێ رە د رۆژەڤێ دەیە. پشتی شەرێ ب ئیرانێ رە سێ خەت دەرکەتنە هۆلێ. یا یەکەمین خەتا ئامهریكا-ئیسرائیلێ یە. یا دویەمین ب پێشەنگیا بریتانیایێ خەتا هن هێزێن ناڤنەتەوەیی و هەرێمی یە کو ئارمانجا وان پاراستنا ستاتویا هەیی یە. یا سێیەمین خەتا دەمۆکراسی و ژیانا هەڤبەشە کو ئەم ب رێیا پێڤاژۆیا ئاشتی و جڤاکا دەمۆکراتیک وێ خەتێ دپارێزن. گەشەدانێن ل ئیرانێ جارەکە دن نیشان دا کو پێڤاژۆیا کو ل ترکیەیێ تێ مەشاندن مافدار و گرینگە».
هەروها ئۆجالان گۆت: «تو پرسگرێکا مە ب کۆمارێ رە تونەیە. پرسگرێکا راستین ئەڤە کو کۆمار نەدەمۆکراتیکە. دەمۆکراسی تەکانە چارەسەرییە کو دکارە کۆمارێ خورت بکە».
ئۆجالان ئاماژە ب وێ ژی کر، «وەکە کو من د بانگا خوە یا 27ێ سباتێ دە دیار کر، سەردەما تێکۆشینا چەکداری ب داوی بوویە. ڤەگەرا بۆ رابردوویێ ئێدی نە ممکونە. پێڤاژۆیا کو ئەم تێ دەنە، ب کۆمارا دەمۆکراتیک رە ڤەگوهەزتنەک بەر ب ئاشتیێیە. ئەڤ پێڤاژۆیا کو ئەم هێڤی دکن ب سەر بکەڤە، کۆمار دێ دو قات بهێزتر بە.»
د بەشەکە دن دە ئۆجالان گۆت: «بەشداربوونا کۆمارێ دڤێ ل سەر بنگەها ناسنامە، ئازادیا فکر و رامانان، ئازادیا رێخستنبوونێ و ئازادیا ژنان بە. ئەڤ قادێن ئازادیێ نە تەنێ ژ بۆ کوردان ژ بۆ هەر کەسی دەرباس دبن».
د داویێ دە ئۆجالان دەستنیشان کر، «چارەسەریا ئەنتەگراسیۆنا دەمۆکراتیک ل سەر بنگەها فەراسەتەکە جڤاکپارێز هاتیە ئاڤاکرن. ژ بۆ چارەسەریا جڤاکپارێز، دەمۆکراتیککرنا ئاڤاهیێن جڤاکی ب ئاوایەکی تەڤاهی و کۆلەکتیف هەوجەیە».
