کۆنفەرانسا یەکیتیا نەتەوەیی یا کوردێن باکور: “یەکیتی ژ بۆ مە مەجبووریەتە”
کوردێن باکور د کۆنفەرانسەکە بەرفرەھ و دیرۆکی دە ل سەر پێویستیا یەکیتیا نەتەوەیی جڤیان. د کۆنفەرانسا ب ناڤێ “کوردێن باکور یەکیتیا خوەیا نەتەوەیی نیقاش دکن” دە، بانگ ل ھەموو ھێزێن سیاسی ھات کرن کو ناکۆکیێن ناڤخوەیی بدن ئالیەکی و ل سەر ستراتەژیەکە نەتەوەیی یا ھەڤپار ل ھەڤ بکن. د کۆنفەرانسێ دە ھات دەستنیشانکرن کو د سەدسالا نوویا رۆژھلاتا ناڤین دە، یەکیتی تەکانە گارانتیا پاراستنا ھەبوون و دەستکەفتیێن گەلێ کوردە.
لدارخستنا ڤێ کۆنفەرانسێ د سالڤەگەرا “کۆنفەرانسا یەکرێزی و یەکھەلوەستی”یا پارتیێن رۆژئاڤایێ کوردستانێ (26ێ نیسانا 2025ێ) دە، وەکی پەیامەکە خورتا پشتگریێ ھات نرخاندن. بەشداران دیار کرن کو مینا مەرتالا پۆلا یا ل کۆبانی و پاراستنا رۆژئاڤا، دڤێ ئیرۆ ژی درووشمەیا “گەلێ کورد یەکە” ببە بنگەھا تەڤگەرا سیاسییا ل ھەر چار پارچەیێن کوردستانێ.
د ئەنجامنامەیا کۆنفەرانسێ دە بال ھات کشاندن سەر ھەولدانێن دیرۆکی یێن رێبەرێن کورد. ھات ب بیر خستن کو ب سایا ھەولدانێن برێز مام جەلال “پرۆتۆکۆلا 1993ێ” ل شامێ ھاتبوو ئیمزەکرن و د سالا 2013ێ دە ژی ب بانگا برێز عەبدوللاھ ئۆجالان و دەستپێشخەریا برێز مەسعوود بارزانی، کورد گەلەکی نێزیکی کۆنگرەیا نەتەوەیی ببوون. بەشداران تەکەز کرن کو ھەر چەند دەستوەردانێن دەرڤە ھەتا نھا رێ ل یەکیتیێ گرتبن ژی، ئیرۆ فەرسەندێن دیرۆکی ژ بۆ گھیشتنا ڤێ ئارمانجێ ژ ھەر دەمێ زێدەترن.
کۆنفەرانسێ بال کشاند سەر کریزێن ل وەلاتێن جیران ژی:
ل ترکیەیێ: داخواز ھات کرن کو پێڤاژۆیا ئاشتیێ ژ گۆتنێ دەرکەڤە و ببە خوەدی چارچۆڤەیەکە یاسایی. ھات گۆتن کو دڤێت ناسنامەیا کورد د دەستوورا بنگەهین دە وەرە مسۆگەرکرن و گرتیێن سیاسی سەربەست وەرن بەردان.
ل ئیرانێ: کۆنفەرانسێ پشتگریا خوە ژ بۆ ھەولدانا شەش پارتیێن رۆژھلاتێ کوردستانێ یا ژ بۆ ئاڤاکرنا “ئەنیەکە ھەڤپار” راگھاند و داخواز کر کو جیھان ڤێ داخوازا رەوا ناس بکە.
د داویا کۆنفەرانسێ دە ھات دەستنیشانکرن کو پارچەبوون ھەر تم رێ ل بەر کۆمپلۆ و قرکرنێ ڤەکریە. بەشداران بانگ ل ھەموو پارتیێن سیاسی کرن کو بەرژەوەندیێن تاکەکەسی و پارتیزانی دەینن ئالیەکی و ل گۆری ئیرادەیا گەلا ژ بۆ یەکیتیێ گاڤان باڤێژن. “یەکیتی نە تەنێ تەرجیحەکە، ژ بۆ سەدسالا نوو بەلکو مەجبووریەتەکە ژیانییە.”
