1200 مالباتێن عەفرینێ ژ حەسەکێ ڤەدگەرن سەر جھ و وارێن خوە

ئیرۆ شەمیێ، 9ێ گولانا 2026ێ، کاروانەکی نوو و مەزن یێ کۆچبەرێن عەفرینێ ژ باژارێ حەسەکێ بەر ب ھەرێما عەفرینێ ڤە ب رێ کەت. ئەڤ کاروانێ نوو کو ژ 1200 مالباتان پێک تێ، د چارچۆڤەیا ھەولدانێن فەرمی یێن ژ بۆ ڤەگەراندنا خەلکێ رەسەن بۆ سەر ئاخا وان تێ برێڤەبرن.

جیگرێ پارێزگارێ حەسەکێ، ئەحمەد ئەل-ھیلالی، د داخویانیەکێ دە پشتراست کر کو ئامادەکاریێن تەکنیکی و ئەولەھیێ ھاتنە تەمامکرن دا کو 1200 مالباتێن عەفرینی ب سلامەتی بگھیژن مالێن خوە. ژێدەرێن خوەجھی ژ حەسەکێ ژی راگھاندن کو ژ سەرێ سبەھێ ڤە لڤ و تەڤگەرەکە مەزن ھەبوو و مالبات ب کەلووپەلێن خوە ڤە ئامادە بوون.

ئەڤ پێنگاڤ وەکی بەردەوامیا کاروانێن بەرێ تێ دیتن؛ ھەر وەکی د 14ێ نیسانا بۆری دە ژی کاروانەکی دن کو ژ 800 مالباتان پێک دھات، ژ باژارێن قامشلۆ و حەسەکێ ڤەگەریابوون عەفرینێ. زێدەبوونا ھەژمارا مالباتێن ڤەدگەرن نیشان ددە کو پێڤاژۆیا ڤەگەرێ کەتیە قۆناغەکە لەزتر و پلانکری.

ڤەگەرا ڤان کاروانان ب ئاوایەکی فەرمی د چارچۆڤەیا رێکەفتنا 29ێ چلەیا 2026ێ دە پێک تێ کو د ناڤبەرا ھێزێن سووریەیا دەمۆکراتیک (ھەسەدێ) و حکوومەتا شامێ دە ھاتبوو ئیمزەکرن. ل گۆری ڤێ رێکەفتنێ، ئاسانکاریێن پێویست تێن کرن دا کو تەڤاھیا کۆچبەرێن عەفرینێ یێن ل ھەرێمێن جودا دمینن، ب ئاوایەکی کۆمی ڤەگەرن سەر وارێ باب و کالێن خوە.