گەلۆ ما مەزلووم عەبدی چوویە ئیمرالیێ؟ ئیحتیمالا سەردانا ئەنقەرێ و داخویانیێن ل سەر ترکیەیێ راستن؟
مەزلووم عەبدی ژ بەرنامەیا “مزیج” تەلەڤیزیۆنا “ئەلعربیە”رە، کو ل عەرەبستانا سعوودییە، ئاخڤی. داخویانیا عەبدی گەلەک ھوورگولیێن بالکێش دحەوینە، لێ شیرۆڤەیێن وی یێن ھەری بژارتی ل سەر تێکلیێن ب ترکیەیێ رە و ئیحتیمالا سەردانا ئەنقەرێ نە.
د ھەڤپەیڤینا خوە دە، مەزلووم عەبدی گۆتنێن پر بالدار و ب شەرمۆک پەسندار ل ھەمبەر ئەحمەد شەرع و ترکیەیێ ب کار ئانین. د ھەمان دەمێ دە، د 11ێ گولانێ دە، وی ھەڤپەیڤینەک دن دا رۆناھی تیڤی، کو سەر ب مەدیایا پەکەکێ یە. د ڤێ ھەڤپەیڤینێ دە، عەبدی زمانەک سڤک و بێبەرپسیاری و ئالۆز ب کار ئانی. وی بانگا چالاکیێ ل سەر خوەپێشاندانێن ل حەسەکێ ل سەر تابلۆیان کر، گۆت “رۆژەڤێن گرینگتر ھەنە”، و ب تایبەتی رەوشا ل حەسەکێ وەکی نۆرمال و ئاسایی نیشان دا، ژ خوەپێشاندەران خوەست کو چالاکیێن خوە راوەستینن.
دەما کو ئەڤ ھەر دو ھەڤپەیڤینێن شاھین تێنە لێکۆلین کرن، ئەو ژ ھەڤپەیڤینێن وی یێن سالێن بەرێ پر جوودا نە. عەبدی زمانەک ب تایبەتی بالدار د دەربارێ ئەنتەگراسیۆنا لگەل شامێ دە ب کار تینە. ژ بلی ڤێ، د ھەردو ھەڤپەیڤینان دە، وی ھەما بێژە ھەڤۆکەک ژی ل سەر ماف و ھەبوونا کوردان نەگۆت. ئالیەکێ دن یێ نەئاسایی یێ داخویانیا عەبدی ئەو بوو کو وی ھەرێما کوردستانێ وەکی باکورێ ئیراقێ ب ناڤ کر، بێیی کو قەت پەیڤا باشوورێ کوردستانێ یان ژی ھەرێما کوردستانێ ب کار بینە.
مەزلووم عەبدی وەکی بەرێ، نەمازە ژ ئادارێ ڤر ڤە، ئەوقاس زێدە د مەدیایێ دە نەخویایە؛ ل شوونا وی، کەسێن وەکی ئیلھام ئەحمەد و سیپان حەمۆ(دەروێش) دەرکەتنە پێش. عەبدی، کو پشتی دەمەک درێژ دوبارە د مەدیایێ دە خویا دکە، ب راستی ژی وەکی لەشکەرەکی پیادە یێ سیاسەتا “ئەنتەگراسیۆنێ” تەڤدگەرە.
گەلۆ عەڤدللا ئۆجالان د ڤێ گوھەرتنا بەربچاڤا عەبدی دە رۆلەکێ دلیزە، و ب تایبەتی ژی سەردانا مەزلووم عەبدی یا ئیمرالیێ رۆلەکێ دلیزە؟
وەکی خەباتکارێن دارکا مازی، مە بەرێ کادرۆیێن پەکەکێ یێن کو چوونە ئیمرالیێ ئەشکەرە کرن.
ئەرێ، مەزلووم عەبدی د ئادارێ دە چوو ئیمرالیێ و ب ئۆجالان رە جڤیا. ئەو ب تەنا سەرێ خوە نەچوو؛ ئەو ب ئیلھام ئەحمەد رە چوو و ل ور ب رایەدارێن دەولەتا ترک رە ژی جڤیا. دبە کو عەبدی، د ھەڤپەیڤینا خوەیا لگەل تەلەڤیزیۆنا ئەلعەرەبیە رە، گۆتبوو “ھەر تشت موومکنە”، و رایا گشتی ژ بۆ ڤێ ئاگاھیێ کو دێ پاشێ دەرکەڤە ھۆلێ ئامادە کریە.
مەزلووم عەبدی ژ تەلەڤیزیۆنا ئەلعەربیە رە وھا گۆت: “مەزلووم عەبدی، فەرماندارێ گشتی یێ ھەسەدێ، د بەرسڤا پرسا پێشکێشکارێ دە، “ئەم دکارن وە د دەمەک نێزیک دە ل ئەنقەرێ ببینن؟”… گۆت، “چما نە بە؟ ھەر تشت موومکنە.” و ئاخافتنا خوە وھا دۆماند: “ئەم تەرجیح دکن کو تێکلیێن خوە لگەل ترکیەیێ ب رێیا شامێ بمەشینن. ئەڤ ژ بۆ مە چێترینە؛ ژ بەر کو ئالیەکی وێ یێ نەتەوەیی و زەلال ھەیە. مە ئەڤ یەک د جڤینا خوە یا داوی دە لگەل برێز ئەحمەد شەرع پارڤە کر.
“ھەلوەستا دەولەتا سووریەیێ ل سەر ڤێ مژارێ (ناڤبەینکاریا لگەل ترکیەیێ) ئەرێنییە. گەر ھوون بپرسن کا ئەحمەد شەرع د نێرینێن ھەڤبەش دە رۆلەک لیستیە؛ ئەرێ، مە ئەڤ ب وی رە نیقاش کر.”
“ئەز دکارم ببێژم کو نھا د ناڤبەرا مە دە جورەیەک ئاگربەست ھەیە. ژ ئالیێ ترکیەیێ ڤە راستەراست ھێز یان بەرپرسێن مەیێن د رێڤەبەریێ دە ھەدەف نەگرتنە. د ناڤبەرا مە تێکلی ھەنە. ژ بۆ نھا، ئەز دکارم ببێژم کو ئەڤ تێکلی د ئاستا ئەولەھیێ-ئیستخباری دە نە . لێبەلێ، ئەم ھەول ددن کو ڤێ یەکێ بگھینن ئاستەک فەرمی، سیاسی.”
پرس: ما ئەم دێ د دەمەک نێزیک دە مەزلووم عەبدی ل ئەنقەرێ ببینن؟
-چما نەبە؟ “ھەر تشت موومکونە.”
سەردانا مەزلووم عەبدی یا ئیمرالیێ
مەزلووم عەبدی د 24ێ چلەیا 2026ێ دە گھیشت سلێمانیێ. د مەدیایێ دە ھات راگھاندن کو عەبدی لگەل کورێن تالەبانی و نوونەرێ تایبەتێ ئامەریکایێ تۆم باڕاک ل سەر ڤێ پێڤاژۆیێ جڤیا. بێ گومان، سەردانا عەبدی ئالیەکی دن ژی ھەبوو. ئەو لگەل رێبەرێن پەکەکێ سەبری ئۆک، بەسێ ھۆزات و دووران کالکان ژی جڤیا. زاخۆ زاگرۆس، ئالدار خەلیل و سیپان حەمۆ ژ رێڤەبەریا رۆژئاڤا ژی د جڤینێ دە ئامادە بوون. د ڤێ جڤینێ دە، ژ ئۆجالان تەعلیمات وەرگرت و ھات گۆتن کو مەزلووم عەبدی و ئیلھام ئەحمەد دێ بچن ئیمرالیێ. عەبدی چوو رۆژئاڤا و ژ ور، ب رێیا کو ژ ئالیێ ترکیەیێ ڤە ھاتیە ئامادەکرن، چوو ئیمرالیێ.
ل گۆری چاڤکانیێن پەکەکێ، ئۆجالان ب توندی رەخنە ل مەزلووم عەبدی و ئیلھام ئەحمەد گرتنە و گۆتیە، “وە ئەز فێم نەکرم” و ل گۆری ھەمان چاڤکانیان، وی ب تایبەتی ژ ئیلھام ئەحمەد رە گۆتیە، “من ل ڤر ب دەولەتێ رە پەیمانەک چێکر؛ ئەگەر ئەز ل ڤر نەبووما، تو ژی دا یان وەکی کەچێن ل حەلەبێ هێیە گرتن، یان ژی دا خوە د ئاڤاھیەکێ دە ئاڤێژی. من تو رزگار کری.”
تێ راگھاندن کو ئۆجالان ژ عەبدی رە گۆتیە، “تە دخوەست دەولەتەکێ ب ھەڤکارییا ئیسرایلێ ئاڤا بکی، لێ ئەو نەچوو سەری، و لێ بنێرە، تو دیسا ڤەگەری جەم من. نھا ئەز تە عەفوو دکم دا کو بکاری ئەنتەگراسیۆنێ سەربخی. قەی نەبە ڤێ جارێ، ھێژایی ڤێ ئەرکێ بە و بسەرکەڤە.”
عەبدی ھەر وھا لگەل رایەدارەکی دەولەتێ ھەڤدیتنەک کورت کر. جڤین ب گرانی ل سەر چاوانیا پێکانینا سەرکردایەتیێ بوو. ھەر دو د ھەمان رۆژێ دە ژ ئیمرالیێ ڤەگەریان رۆژئاڤا.
واتە، راستیا کو داخویانیێن عەبدی یێن ل سەر ئەحمەد شەرع د دو ھەڤپەیڤینێن وی یێن داوی دە ئەوقاس نەرم بوون نە ژ بەر رەوشا راستین یا ل قادا سییاسەتێ بوو، لێ ژ بەر کو ئۆجالان نھا رۆژانە رۆژئاڤا کۆنترۆل دکە ئەڤ نیرین وھا گۆھەرین. ژ نھا پێڤە مەزلووم عەبدی دێ رۆژئاڤا ل گۆری فەرمانێن ئۆجالان کوردان ئەنتەگرەیی دەولەتا عەرەبی یا سووریێ بکە و ل سەر خەتا ئۆجالان کوردان ژ نرخ و دەستکەفێن نەتەوەیی دوور بخە.
