ئیلھام ئەحمەد ئیدیعا کر کو وان لگەل ئۆجالان ھەڤدیتن نەکریە

ھەڤسەرۆکا دەستەیا تێکلیێن دەرڤەیا رێڤەبەریا خوەسەر یا رۆژئاڤا ئیلھام ئەحمەد، ئیدیعایێن دەربارێ “ھەڤدیتنا وان یا لگەل عەبدوللاھ ئۆجالان ل گراڤا ئیمرالیێ” ب پارڤەکرنەکا ل سەر حەسابا خوەیا مەدیایا جڤاکی X رەد کر.

مالپەرا مە «دارکا مازی» د نووچەیەکە خوە یا 12ێ گولانێ دە ئاگاھیا کو فەرماندارێ گشتی یێ هەسەدێ مەزلووم عەبدی و یەک ژ رێڤەبەرێن رۆژئاڤا ئیلھام ئەحمەد د مەھا ئادارێ دە سەردانا ئیمرالیێ کرنە، ب رایا گشتی رە پارڤە کربوو. پشتی نووچەیا مە، گەلەک دەزگەھێن مەدیایێ ئەڤ نیقاش خستن رۆژەڤا خوە و ل ترکیەیێ نیقاشەکە گرینگ یا د ڤی واری دە دەرکەت ھۆلێ. لگەل مەزنبوونا نیقاشان، رێڤەبەریا رۆژئاڤا ب ئاوایەکی نەراستەراست ژ دلبخوین دارایێ رووداوێ رە داخویانیا “ھەڤدیتن چێنەبوویە” دا چێکرن. لێ تەڤی ڤێ یەکێ ژی، گاڤا نیقاش بەردەوام کرن، ڤێ جارێ ئیلھام ئەحمەد بخوە داخویانی دا.

ئیلهام ئەحمەد د داخویانیا خوە دە ئەڤ ئیفادە ب کار ئانین:

“د رۆژێن داوی دە نووچەیێن ب ڤی رەنگی بەلاڤ بوونە کو قاشۆ مە لگەل برێز عەبدوللاھ ئۆجالان ل ئیمرالیێ ھەڤدیتنەک و جڤینەک پێک ئانیە. ئەم دخوازین ژ بۆ رایا گشتی ب ئەشکەرەیی دیار بکین کو ئەڤ نووچە ب چ ئاوایان نە راستن. چ ھەڤدیتن نەهاتینە ئەنجامدان و ئیحتمالا ھەڤدیتنەکە وھا ژی نە د رۆژەڤێ دەیە.”

تێ دیتن کو داخویانیا ئیلهام ئەحمەد ب فکارێن سیاسی ھاتیە دایین. ئیلهام ئەحمەد ھەر چەند گۆتبە “نە د رۆژەڤێ دەیە” ژی، ئەڤ یەک راستیێ نیشان نادە. ژ بەر کو ئەو بەریا نھا، د 3یی گولانا 2025ێ دە، ئانگۆ بەریا کۆنگرەیا هلوەشاندنا پەکەکێ، یەک ژ وان کەسان بوو کو تەڤلی تەلەکۆنفەرانسا د ناڤبەرا ئۆجالان و کادرۆیێن پەکەکێ دە بووبوو. ئۆجالان د ڤێ ھەڤدیتنێ دە گۆتبوو ئیلھام ئەحمەد: “ئەزێ تە ببینم.”

5 مەھان پشتی ھەڤدیتنا مەھا مژدارێ، ئەحمەد و عەبدی سەردانا ئیمرالیێ کربوون و ل ور ھەڤدیتنەکە گرینگ پێک ئانیبوون. ژ بۆ کو ل ترکیەیێ نەرازیبوون چێنەبە و د سەرێ رایا گشتی یا کورد دە پرسیار دەرنەکەڤن، ئەڤ ھەڤدیتن مینا نهێنیەکێ تێ پاراستن. تێ دیتن کو پەکەکە ژ بۆ ئەشکەرەبوونا ھەڤدیتنێن داوی، ھێدی ھێدی د مەدیایێ دە زەمینەکێ ئامادە دکە. فەرماندارێ هەسەدێ مەزلووم عەبدی ژی د ھەڤپەیڤینا خوەیا لگەل ئەل-مۆنتۆرێ ئەڤ ئیفادە ب کار ئانیبوون: “زەمینا سەردانا ئەنقەرەیێ و ھەڤدیتنا لگەل ئۆجالان ئامادەیە، دبە کو د دەمەکێ نێزیک دە بهێتە ئەنجامدان.”