سەرۆکێ ھەرێما کوردستانێ و وەزیرێ دەرڤەیێ ئیتالیایێ ل رۆمایێ جڤیان
سەرۆکێ ھەرێما کوردستانێ نێچیرڤان بارزانی، د چارچۆڤەیا سەردانا خوەیا فەرمی یا ژ بۆ وەلاتێ ئیتالیایێ دە، ئێڤارا سێشەمێ (19ێ گولانا 2026ێ) ل رۆمایا پایتەخت لگەل جیگرێ سەرۆکێ ئەنجوومەنا وەزیران و وەزیرێ دەرڤە و ئالیکارێ ناڤدەولەتی یێ ئیتالیایێ ئانتۆنۆ تاژان جڤیا. د ڤێ ھەڤدیتنا ئاستبلند دە، پەیوەندیێن پرئالی و گەشەدانێن داوی یێن ل ھەرێمێ ھاتن نرخاندن.
د دەستپێکا جڤینێ دە، سەرۆکێ هەرێما کوردستانێ نێچیرڤان بارزانی ب ناڤێ ھەرێما کوردستانێ و ئیراقێ سپاسی و رێزێن خوە گھاندن حکوومەت و گەلێ ئیتالیایێ. بارزانی بال کشاند سەر پشتگریا بەردەواما رۆمایێ یا د وارێن سەربازی و مرۆڤی دە و تەکەز کر کو رۆلا ئیتالیایێ د پاراستنا ئەولەھی و ئارامیا ھەرێمێ دە پر گرنگ و بنرخە.
ژ ئالیێ خوە ڤە، وەزیرێ دەرڤەیێ ئیتالیایێ ئانتۆنۆ تاژان ئامادەبوونا وەلاتێ خوە ژ بۆ بەرفرەھکرنا ھەڤکاریێن پرئالی لگەل بەغدا و ھەولێرێ نیشان دا. تاژان گرینگیەکە مەزن دا پێگەهێ ھەرێما کوردستانێ و ب فەرمی راگھاند کو وەلاتێ وی کوردستانێ وەکی “فاکتۆرەکێ سەرەکی یێ ئارامیێ” د رۆژھلاتا ناڤین دە دنێرە و پشتگریا رۆمایێ یا بۆ ھەرێمێ دێ بەردەوام ببە.
تەوەرەکی دن یێ گرنگێ جڤینێ، نرخاندنا رەوشا ئالۆزا رۆژھلاتا ناڤین و باندۆرێن وێ یێن ل سەر ھەرێمێ بوو. ھەر دو ئالی ل سەر گرنگیا کێمکرنا ئالۆزیان، پاراستنا ئاشتیێ و پەیداکرنا ئارامیا ھەرێمی ھەڤنەرین بوون و داخوازا ھەولدانێن زێدەتر د ڤێ چارچۆڤەیێ دە کرن.
ھێژایی گۆتنێیە کو سەرۆکێ ھەرێما کوردستانێ نێچیرڤان بارزانی، رۆژا یەکشەمێ (17ێ گولانا 2026ێ) ب سەردانەکە فەرمی گھیشتبوو رۆمایێ. تێ چاڤەرێکرن کو د چارچۆڤەیا ڤێ گەشتا دیپلۆماتیک دە، بارزانی لگەل سەرۆککۆمارێ ئیتالیایێ، بەرپرسێن بلندێن حکوومەتا وی وەلاتی و ھەروسا رایەدارێن پایەبلندێن دەولەتا ڤاتیکانێ ژی زنجیرەیەک جڤینێن جودا جودا ئەنجام بدە.
