پەرڤین بولدان وێنەیێ خوەیێ نوو لگەل دەمیرتاش وەشاند: ھشیاریا “ژیریا دەستکرد” دا
پارلامەنتەرا پارتیا وەکھەڤی و دەمۆکراسیا گەلان (دەم پارتی) پەرڤین بولدان، نووترین وێنەیێ خوە و ھەڤسەرۆکێ بەرێ یێ ھەدەپێ سەلاحەدین دەمیرتاش کو د گرتیگەھێ دە ھاتیە کشاندیە، ژ رایا گشتی رە پارڤە کر. بولدانێ لگەل وەشاندنا وێنەیی، ھشیاریەکە گرینگ ل سەر بەلاڤبوونا وێنەیێن سەختەیێن کو ب تەکنۆلۆژیا ژیریا دەستچێکری ھاتنە چێکرن، بەلاڤ کر.
پەرڤین بولدان ئیرۆ (سێشەم، 2یێ خزیرانا 2026ێ) ل سەر حەسابا خوە یا تۆرا جڤاکی یا “X”ێ وێنەیەکی نوویێ روونشتنا خوەیا لگەل سەلاحەدین دەمیرتاش وەشاند، کو د دەما سەرەدانا وێ یا داویێ یا بۆ زیندانا ئەدرنەیێ دە ھاتیە گرتن. بولدانێ د پەیاما خوە دە نڤیساندیە: “وێنەیێن سەرەدانا من یا داویێ بۆ جەم سەلاحەدین دەمیرتاشێ عەزیز ژ نوو گھیشتن دەستێ من. ژ کەرەما خوە رە بلا کەس باوەریێ ب وان وێنەیان نەیینن کو ب ژیریا دەستچێکری ھاتنە چێکرن. سلاڤ و رێز.”
ئەڤ رووناککرن و ھشیاریا توندا پارلامەنتەرێ پشتی وێ یەکێ تێ کو د دەمێن داوی دە، چەند وێنەیێن سەختەکری یێن سەلاحەدین دەمیرتاش د تۆرێن جڤاکی دە بوون سەدەما نیقاشان. د وان وێنەیان دە وسا نیشان ددا کو گوھەرتنەکە پر مەزن، پیربوون ئان ژی نەخوەشی ب سەر رەنگ و روویێ دەمیرتاش دە ھاتیە؛ لێ بەلێ پاشێ ب راپۆرکرنا پسپۆران ئەشکەرە بوو کو ئەو دیمەن نە راستن و ب رێیا ژیریا دەستکرد ھاتنە چێکرن.
سەلاحەدین دەمیرتاش ژ مەھا مژدارا سالا 2016ێ ڤە د گرتیگەھا باژارێ ئەدرنەیێ یێ ترکیەیێ دە گرتییە. تەڤی کو دادگەھا مافێن مرۆڤان یا ئەورۆپایێ چەند جاران بریارێن قانوونی یێن ژ بۆ ئازادکرنا وی یا بێشەرت و مەرج دەرخستنە ژی، ئەنقەرەیێ ئەڤ بریار پێکنەئانینە و دەمیرتاش ھەتا نھا ژی د گریتیگەهێ دە یە.
