فشارێن ل سهر ههرێما كوردستانێ دێ زێده بن
سمكۆ عهبدولعهزیز
حەفتیا بهێت دێ نە حەفتیا بریارێن مەزن بیت، بەلکو دێ حەفتیا دوبارە جێگیربوونا سیاسی بیت. ل بەغدا هێزێن سەرەکی د وێ چەندێ دگەهن کو ئیراق کەفتیە د قۆناغەکا نوو دا کو تێدا مەلەفێن نەفت، ووزە و وەبەرهێنانێ گەلەک گرنگتر لێ هاتینە ژ ههڤركیێن ئایدیۆلۆژی یێن كلاسیك.
لەوما حکومەتا فیدرال دێ بزاڤێ کەت پێشڤەچوونەکێ د مەلەفێ نەفتێ دا ب دەست ڤە بینیت و شیانێن خۆ د رێڤەبرنا دەولەتێ دا ژ لایێ ئابووری ڤە نیشان بدەت، چونکی شەرعیەتا سیاسی د قۆناغا بهێت دا دێ ب شیانێن حکومەتێ بۆ دابینکرنا جێگیرییا دارایی هێتە پیڤان نەک ب شیانێن وێ بۆ بەلاڤکرنا درویشمان.
بەلێ ل هەرێما کوردستانێ، ئالۆزییا راستی نە ب ئاڤاکرنا حکومەتێ یە، بەلکو ڤەگەراندنا شیانێن دانوستاندنا کوردی یە. دیرۆکا سیاسی یا کوردی دیار دکەت کو هێزا کوردان ل بەغدا و دەڤەرێ بلند دبوو هەر دەما کو هێزێن کوردی نێزیکی هەلوێستەکێ ئێکگرتی دبوون و لاواز دبوو هەر دەما کو دوبەرەکییا ناڤخۆیی درێژ بکێشابا.
و یا چاڤەرێکری یە کو د حەفتیا بهێت دا فشارێن نەراستەوخۆ زێدەتر ببن چ ژ لایێ بەغدا ڤە یان ژ لایێ لایەنێن هەرێمی و نێڤدەولەتی ڤە، بۆ پالدانا هێزێن کوردی بەرەڤ لەزکرنێ د لێکگەهشتنان دا. ئەڤە نە ژبەر حەزژێکرنا وان بۆ کوردانە، بەلکو ژبەر هندێ یە کو دەڤەر د قۆناغا دوبارە رێکخستنا رێرەوێن ووزە و بازرگانیێ دا دەرباز دبیت و کەس ناخوازیت بۆشاییەکا سیاسی د ناڤ دەڤەرەکێ دا هەبیت کو خودان پێگەههکێ جیۆپۆلۆتیکی یێ گرنگ بیت وەک هەرێما کوردستانێ.
ئەز چاڤەرێی توندوتیژییەکا ئەمنی یا مەزن ناکەم، بەلێ ئەز چاڤەرێی بلندبوونا فشارێن سیاسی، ئابووری و راگەهاندنێ دکەم. چونکی شەرێ بهێت دێ شەرێ دیارکرنا پێگەهـ و رۆلی بیت: ئەرێ دێ هەرێم ئەکتەر و ههڤپشك بیت د گوهۆرینێن هەرێمی دا یان دێ بیتە گۆرەپانەک کو بکەڤیتە بن کارتێکرنا بریارێن کەسێن دی؟
حەفتیا بهێت چارەنووسێ ئیراقێ یان هەرێما کوردستانێ ئێکلایی ناکەت، بەلێ رەنگە ئاراستەیێ هەیڤێن بهێت دیار کەت د چارچۆڤهیێ وەرچەرخانێن مەزن دا، ئەکتەرێن سیاسی ژبەر لاوازییا شیانێن خۆ دۆراندنێ ناکەن، بەلکو ژبەر درەنگ تێگەهشتنا وان بۆ دەلیڤا مێژوویی و نەدانا بریارا گونجای د دەمێ گونجای دا، دۆرانێ دکەن.
