ئەز ل گۆر تەجروبەیێن خوەیێن سیاسی کو ئەز ژ سالا 1972یێ دە د ناڤا سیاسەتا کوردستانێ دە مە، گھشتم وێ باوەری کو کێشەیا مەزن یا کوردێن باکورێ کوردستانێ ئەوە کو سەرۆکێن پارتیان تێنە مەزنکرن و دبێژن ژ بلی وان ژیان نابە. ژ بلی سەرۆک کەس تو تشتەکی نزانن. سەرۆک ھەر تشتە. سەرۆک چ بێژە راستە و ل دژ دەرکەتاندن نە کار و حەدێ ئەندامانە.
ل گۆر باوەریا من ئەڤ ژی ب زاناتێ ژ لایێ داگیرکەران کەتیە ناڤا مە و ھاتیە پەژراندن کو سەرۆک نایێن رەخنەکرن. دەما رەوش ئەڤ بە دێ سەرۆک ژی ھەر تشتەکی ل گۆر بەرژەوەندیا خوە و مالباتا خوە ب رێڤە ببە. ژ بۆنا وی/ێ چ لازم و پێویست بە دێ وێ بکە.
ھەتا کو ئەم کورد خوە ژ ڤێ رەوشێ ئازاد نەکن و سەرۆکێن پارتیێن خوە ژی وەکە خوە نەبینن، ھوون باوەر بکن ئەم دێ تم ھێسیر و رەبەنێ بەردەستێ سەرۆکان بن. ل گۆر من دڤێت ئەم ڤێ رەوشێ بگوھەرن و ب ئاوایەکی دەمۆکراتیک کارێ رێخستنیا خوە بمەشینن ئەم دێ وەکە کورد ب ھەڤرە ب سەرکەڤن.
دیسا ل گۆر باوەریا من یێن ناخوازن یەکتی و یەکرێزیا ناڤا مالا کورد پێک بێ، سەرۆک و سەرۆکاتیا پارتیان ب خوە نە. رێخستن یان پارتی ل گۆر رێ و رێبازێن سەرۆکان تێنە مەشاندن. لێ دەما سەرۆک نەیێن رەخنەکرن، ل دژی شاشی و کێمانیێن وان ھەلوەستێن راست نەیێن گرتن، ئەو ژی دێ ھەر وەکە خوە بکن و تەڤبگەرن.
ئەڤ نایێ وێ واتەیێ کو دڤێت ئەم ژ سەرۆکێن خوە حەز نەکن، قیمەت و روومەتان وان نەگرن. نا بەرەڤاژی وێ دڤێت ئەم ب ھەڤرە قیمەتێ بدن وان دا کو ئەو ژی رێ و رێبازن د بەرژەوەندیا گەل دە بن پێشکێشی مە و گەلێ مە بکن.
ژ بەر کو سەرۆک کلیلا ب کارئانینا مەکینەیێ یە. دەما مەکینەیێ کار کر دێ بمەشە و ب مەشا خوە ژی ھەچی کەسێن ل سەر رێیان مانە دێ ھلگرە ناڤا خوە. لۆما ژی سەرۆک و سەرۆکاتی گرینگە. لێ نە وەکە ئەم کورد ڤێ دکن.
ئەم کورد سەرۆک دکن تابوو، دبن حەیرانێ وان و دکەڤین وێ باواریێ کو ئەو ژ ھەمی ئەندامێن خوە و گەل زانەتر و ھێژاترن. ئاھا شاشیا ئەم دکن ئەڤە. دەما ئەم سەرۆکەکی وەھا مەزن ژی دکن ئێدی ئەم بێ واتە دمینن. ھەمی تشت دبە سەرۆک و وی/ێ چ گۆت ئەوە.
دەما کو سەرۆکەک ژی، وێ ھێزێ، وێ حەزکرنێ و وێ باوەریێ دبینە، خوە وەکە ئەژدەرگەھەکی دزانە و دکەڤە رەوشا کو ئێدی ھەر تشت ئەوە. دەما ھەر تشت ئەو بە ژی ئەم وەکە ئەندام دبن مریدێ وی کو چ بێژە، بێ موناقەشە ب جھ تینن.
لۆما گھشتم وێ باوەریێ کو نەیەکرێزی و نە ل ھەڤکرنا مە ژ بەر ھەلوەست، کریار و بوویەرێن سەرۆکانە کو ئەم نکارن ببن یەک. ئەز سۆز ددم ملەتێ کورد کو ئیرۆ ل باکورێ کوردستانێ سەرۆکێن وان پارتیێن مەیێن ژ خوە رە دبێژن ئەم کوردستانی نە، وەرن با ھەڤ و بریارا یەکتیێ ب ھەڤرە بگرن ئەڤ مەسەلە حەل دبە. لێ ناکن.
د یەکتیەکە وەھا دە دبە کو چەند دەنگێن نەرازیبوون دەرکەڤن، لێ تالی ئەڤێ ھەرە سەری و ئەم دێ ب ھەڤرە ببن خوەدی ھێزەکە یەکگرتی یا نەتەوەیی. کی چ دبێژن بلا بێژن، کێشە ئانگۆ پرۆبەلەما مەیا باکورێ کوردستانا مەزن سەرۆک و سەرۆکاتییە.
پرانیا سەرۆکان ژی ناخوازن ژ وی مەقامی بێنە خوارێ. ھندەک ژ وان ب تەجروبەیێن خوە و ھندەک ژ وان ب زانەبوون و تێگھشتنێن خوە ببن رێنیشاندەرێن جوانێن خوە، دێ پتر بەرھەمدار بن. لێ ناکن و دڤێت ھەر ئەو سەرۆک بن.
ژ بەر کو ناڤێ سەرۆکاتیێ مەزنە و ناخوازن دەست ژ وی ناڤی بەردن. ھندەک سەرۆکێن پارتیێن مەیێن کوردستانی ل باکورێ کوردستانێ ھەنە کو ھێژ نزانن ب رێک و پێک زمانێ خوە کوردیا دەلال ب کار بینن. ھندەک ھەنە نزانن بەلاڤۆکەکێ بنڤیسینن. ھندەک ھەنە نزانن باخڤن و رەوشا کوردستانێ یا ئیرۆ بشۆپینن. لێ سەرۆکن.
ب دەھان ئەندامێن وان یێن ژ وان زانەتر ھەنە، لێ ئەو سەرۆکن. چما ژ بەر کو ئیرۆ نە دۆهییە. ئیرۆ د سیاسەتێ دە پەرێن کێ ھەبن ئەو ل پێشن. کەس رەوشا وان ناپیڤن، ناکۆلن زانین و تێگھشتنا وی/وان دزانن، لێ ژ بەر خوەدی پارەنە ئەو سەرۆکن و د سەرۆکاتیێ دە جھ دگرن. ھەلبەت ھندەک ئیستیسنا نە تێدە.
ئەو سەرۆکێن کو ئەندامێن وان ھەر تشت دانە وان ژی، فێم ناکن کو ئەو سەرۆک دکارە رۆژەکێ ئەندام و وەلاتێ خوە ژ بۆنا بەرژەوەندیا خوە یا مالباتی و شەخسی پێشکێشی دەولەتێ بکە.
ئاھا بنێرن ئیرۆ عەڤدللا ئۆجالان چ دبێژە یەک ئەندامێن وی نکارن و ناخوازن ل دژ وی گۆتنەکێ بێژن. چ دبێژە و چ بریارێ ددە ھەر ئەو ژ بۆنا تەماما ئەندامێن وی دەرباس دبە. کەس نکارە ل سەر رامان و فکرێن وی باخڤە یان موناقەشە بکن. ھەمان رەوش د ناڤا پارتیێن مەیێن کوردستانی دە ژی ھەیە…
ژ بەر ڤێ ئەز دبێژم پێویستە ئەم ئەو کەسێن خوە وەکە ئەندام و کەسایەتەکی کوردستانی دبینن، دڤێت ئەم ڤێ رەوشێ ژ نوو دە ب ھەڤرە موناقەشە بکن. دڤێت ئەم ب ھەڤرە وی مافی نەدن سەرۆکان کو ئەو ھەر تشتە و ئەو خوەدی ھەمی بریارە. بالا خوە بدێ یەک دبە سەرۆک ئێدی نەما وی مەقامی بەرددە. ھەتا کو ئەو ھەبە ھەر دێ ئەو بە. ئەڤ ژی ب سەرێ خوە کارەسەتەکە.
لێ ھندەک سەرۆک ھەنە، ب کەد و خەباتێن خوە، ب تەکۆشەری، فکر و رامانێن خوە، بوونە سەمبۆلێن گەلێ خوە و تالی ژی بوونە جانۆگریێن گەلێ خوە. ھندەک ژ وان ھێژ ساخن و ژ بۆنا ئازادی و سەرخوەبوونا گەلێ خوە تێدکۆشن کار و خەباتێ دکن، دڤێت ئەم وان ژ بیر نەکن و وان ژی نەخن ناڤا یەک کەفەنی…
ب ڤێ وەسیلەیێ ئەز کۆنگرەیا 2یەم یا پارتیا وەلاتپارێزێن کوردستانێ و ھلبژارتنا برێز مستەفا ئۆزچەلک کو ژ نوو دە بوو سەرۆک و ھەمی ئۆرگانێن وێ پیرۆز دکم.
