ئهرد نه ب تنێ رووبهرهكێ هاتییه پێڤان ب كيلۆمهتران، بهلكو بیردانكهكه مرۆڤ رامانێ ددهتێ و ئهرد ژی ناڤ و ناسنامهیێ ددهته مرۆڤی. دهمێ نیشتمان ژ دهست دچیت، كێشه ژ گۆڕینا سنۆران دهست پێ ناكهت بهلكو ژ وی دهمى دهست پێ دكهت دەما خهلكێ وێ ژ وێ بیردانكا وان ب ئهردی ڤه گرێ ددهت بهێنه جوداكرن، داكو نشتیمان ببیته ئهردهكێ ڤهكری بۆ پرۆژهیێن خهلكێ دی.
شنگال نه ب تنێ ململانێیا ئیدارهكرنا جهی یان شهڕێ سهر پۆست و كورسیهكێ یه، بهلكو كێشهیا پهیوهندییا كویر يا مرۆڤی یه ب ئهردێ وێ ڤه: ئهرێ دێ وهك پارچهیهك ژ بیردانكا نهتهوهیی یا كوردستانی مینیت، یان دێ كارهساتا 2014ێ بیته خالا دهستپێكێ بۆ جۆگرافیایهكا سیاسی یا جودا ژ كوردستانێ؟
ههر پرۆژهیهكێ ببیتە ئارمانج داكو دهست ب سهر ئهردهكی دا بگریت، پێدڤییه ل پێشیا ههمی تشتان پێناسهیهكا نوو بۆ خهلكێ وێ بكهت. شنگال ناهێته جوداكرن ژ كوردستانێ ههتا وى دهمێ ئێزدی خۆ ب كورد ببینیت و ناهێته ڤهگوهاستن بۆ گزیڕتهكا سیاسی یا سهربهخۆ تا شنگال و لالش و شێخان د هۆش و بیردانكا وان دا وهكی پشكهك ژ بیردانكهكا نهتهوهیی یا ئێکگرتی ئاماده بن.
پشتی كارهساتا 2014ێ، پارتیا كاركهرێن كوردستانێ (پهكهكێ) ب تنێ ب هێزا چهكدار ل وێرێ نهڕاوهستیا، بهلكو سیستهمێ وان یێ ڕاگههاندنێ ههوڵ دا زۆرداریێ ل سهر شرۆڤەکرنا كارهساتێ بكهت. ئهڤ بوێرا سهربازی یا ئالۆز ب كورتی ب دو چهمكێن ئهخلاقی دهرئێخست: پهكهكه «قورتالكهر»ه و پارتیا دیموكراتا كوردستانێ (PDK) ئهو بوو يا جهـ هێلاى.
ئهڤ ئاخفتنه زێدهتر گازییا ئێش و برینێ دكهت نهك عهقلی، چۆنكى مرۆڤێ بریندار ههر دهم ل كهسهكی دگهڕیت دا تاوانێ بێخێته سهر. ب ڤی ئاوایی دهمهكێ سهربازی بوو بڕیارهكا ئهخلاقی یا بــــهردهوام، پاشان ئهڤ بڕیارا سهر پارتیهكێ بوو بڕیار ل سهر پهیوهندییا ئێزدییان ب كوردستانێ ڤه.
بهلێ پارتی نه نهتهوه یه و خهلهتییا ڕێكخستنهكێ ناسنامهیا مللهتهكی ژ ناڤ ناكهت. سهركرده دهێن و دچن و پارتی دهێنه دادگههكرن، بهلێ مێژوو ل سهر ئێک كارهساتێ ناهێته ئاڤاكرن، چهند ژی يا دژوار و تاڵ بێت.
ل ڤێره، ئاخفتنا موراد ئیسماعيل دهركهفت وهك ئهلقهیهك د ناڤبهرا برینا دهروونی و پرۆژهیێ سیاسی دا. وی جوداهییا ئۆلی یا ئێزدییان ژ ئۆلهكا دێرین د ناڤ نهتهوهییا كورد دا ڤهگوهاست بۆ بناغهیهكێ ناسنامهیهكا نهتهوهیی یا جودا، كو پێدڤی ب ههبوونا بڕیار و مهرجهعیهتهكا سیاسی یا سهربهخۆ ههیه كو بریارێ بدهت شنگالێ ژ كوردستانێ.
مهترسییا ڤێ هزرێ نه د فهخرا ئێزدییان دا یه ب ئۆلا وان، چونكى ئهو مافهكێ بنهڕهتی یه. بهلكو مهترسی ل وێرێ یه كو جوداهییا ئۆلی بهێته ڤهگوهاستن بۆ جوداهییا نهتهوهیی و پشتى هنگێ ڤهقهتیانا نهتهوهیی ببیته پرۆژهیهكێ جۆگرافی. ناسنامه ب تنێ هزرهكا ههلاویستی نامینیت، بهلكو ئهو دێ ل ئهردهكی گهڕیت دا نوێنهراتییا وێ بكهت و سهلتهنهكێ كو ب ناڤێ وێ باخڤیت و دهما دهێته گۆتن كو ئێزدی مللهتهكێ جودانه ژ كوردان، پرسیارا ل دووڤ دا ئهڤه یه: پا بۆچییه شنگال ب كوردستانێ ڤه بهێته گرێدان؟
ب ڤی ئاوایی دهست ب جوداكرنا جۆگرافیایێ ژ ناڤخۆیا زمان و ئاخفتنێ دهێته كرن.
