خوەندەکارێن دبستانان ل باژارێ قامشلۆیێ یێ رۆژئاڤایێ کوردستانێ، د بەرتەکەکا توند دە دژی بریارا داوی یا حکوومەتا سووریەیێ یا دەربارێ کێمکرنا وانەیێن زمانێ کوردی دە، دەرگەھێن پۆلان گرتن و دەست ب چالاکیا بایکۆتێ کرن.
خوەندەکاران بریارا شامێ یا کو تەنێ 3 دەمژمێران ژ بۆ دەرسا کوردی تەرخان دکە، وەکی “بێدادی و بچووکخستنا ناسنامەیا نەتەوەیی” پێناسە کرن و راگھاندن کو ھەتا زمانێ کوردی ل سووریەیێ وەکی زمانەکی فەرمی یێ دویەم نەیێ ناسکرن، ئەو ڤەناگەرن پۆلێن خوەندنێ.
“زمان نە تەنێ وانەیەکە، ناسنامەیا مەیە”
د داخویانیا گرسەیی دە کو ژ ئالیێ نوونەرێن خوەندەکاران ڤە ھات خوەندن، بریارا نوویا وەزارەتا پەروەردەیێ یا سووریەیێ ب تەمامی ھات رەدکرن. خوەندەکارێن کو د داخویانیێ دە خوە وەکی “جوانێن بەرخوەدێرێن جڤاکێ” دان ناسین، بال کشاندن سەر رۆلا بنگەھین یا زمانێ دایکێ و وھا گۆتن:
“زمان نە تەنێ وانەیەکا ئاسایییە د بەرنامەیێ دە؛ زمان دەنگ، ھەبوون و ناسنامەیا مللەتییە. ما ممکونە کو ناسنامەیا گەلەکی د ناڤ 3 دەمژمێرێن ھەفتانە دە بێتە پاراستن؟ ئەم ل دژی فێربوونا زمانێن بیانی نینن، لێ ئەم قەت قەبوول ناکن کو زمانێ مەیێ دایکێ ببە مژارەکا ڤەبژێرک یان ژی دویەمین.”
داخوازا سەرەکی: ناسکرنا فەرمی و ھەڤپار
داخوازا سەرەکی یا خوەندەکار و چالاکڤانان ئەوە کو زمانێ کوردی ل سەرانسەرێ سووریەیێ بکەڤیتە چارچۆڤەیا دەستووری و ل کێلەکا زمانێ عەرەبی د ھەموو قۆناغێن پەروەردەیێ دە وەکی زمانەکی فەرمی جھ بگرە.
خوەندەکاران ب درووشما ناسکری “بێ زمان ژیان نابە” پەیامەکە زەلال دا دەستھلاتداران و تەکەز کرن کو ئەوێ رێ نەدن چ کەسی دەرباسی پۆلان ببە ھەتا کو ئەڤ بریارە ب تەڤاھی نەیێ بەتالکرن.
ئەڤ چالاکیا بایکۆتێ و ھەلوەستا خوەندەکاران نیشانا قۆناغەکا نوویا رووبرووبوونێ یە د ناڤبەرا نفشێ نوویێ ھەرێمێ و سیستەما پەروەردەیێ یا کو شام ھەول ددە ل ھەرێمێ بسەپینە.
