ئاخافتنێن عەبدوللاھ ئۆجالان د دەربارێ پەیمانا ناڤبەرا یاڤوز سولتان سەلیم و ئیدریسێ بتلیسی دە، د ناڤبەرا پارتیا وەکھەڤی و دەمۆکراسیێ یا گەلان (پارتیا دەم) و ھندەک دەردۆرێن عەلەوی دە بوو سەدەما شەرەنیخ و گەنشەیەکا توند.
گەنگەشا توند پشتی وێ یەکێ دەست پێ کر کو ئۆجالان تێکلیا دیرۆکی یا ناڤبەرا یاڤوز سولتان سەلیم و ئیدریسی بتلسی وەکی “مۆدێلەک ھەڤپەیمانیا دیرۆکی” ب ناڤ کر و دیار کر کو ئەڤ تفاق بوویە سەدەما ڤەکرنا دەریێ رۆژھلاتا ناڤین. پشتی ڤان داخویانیان، 53 رەوشەنبیر، نڤیسکار و کەسایەتێن عەلەوی داخویانیەکا ھەڤپار ب سەرناڤێ “داخویانیا رەوشەنبیرێن عەلەوی” بەلاڤ کرن. د داخویانیێ دە بەرتەک نیشانی ڤێ ئاخافتنێ ھات دان و ئەڤ ھەڤپەیمانی وەکی “کەڤنار و خویناوی” ھاتە وەسفکرن.
ھەڤسەرۆکێ پارتیا دەمێ تونجەر باکرھان د ھەڤپەیڤینەکێ دە بەرسڤەکا توند دا ڤێ داخویانیێ و نیقاشێن ل سەر گۆتنێن ئۆجالان وەکی “تێکدان” ب ناڤ کر. باکرھان دەستنیشان کر کو راستبوونا وێ نڤیسا ل سەر ناڤێ ئۆجالان ھاتیە پارڤەکرن نەھاتیە پشتراستکرن و گۆت: “گرتنا ھەڤۆکەکێ ژ نڤیسەکا نە پشتراستکری و ئافراندنا وێ تێگھیشتنێ کو ئەم ل دژی عەلەویانین تێکدانە. ھەڤسەرۆک، پارلامەنتەر و ھەڤشارەدارێن مە عەلەوی نە. سیاسەتا مە ب قاسی کو کوردە، ئەوقاس ژی عەلەوییە. کەس نکاریت مە ل سەر عەلەویتیێ بجەربینە.”
باکرھان د ئاخافتنا خوە دە بال کشاند سەر رۆلا سیاسەتمەدارێن بەرێ یێن پارتیێ کو د بن داخویانیێ دە ئیمزەیا وان ھەیە و رەخنەیێن توند ل وان گرتن. باکرھان دیار کر کو ھندەک کەس ژ بۆ بەرژەوەندیێن سیاسی و بدەستخستنا پلەیان تەڤدگەرن و گۆت: “د ناڤ ئیمزاکەران دە کەسێن کو مە ژ کۆلانان ئانین و کرن پارلامەنتەر ژی ھەنە. ھەکە رەخنەکرنا برێز ئۆجالان پەنجەرا رەوشەنبیریێ بە، بلا ببۆرن، ئێدی کەس ڤێ ھەلوەستێ قەبوول ناکە.”
د بەردەوامیا ئاخافتنا خوە دە، ھەڤسەرۆکێ پارتیا دەمێ بێیی کو ناڤ بدە، یەک ژ ئیمزەکەرێن داخویانیێ کو بەرێ د ناڤا پارتیا دەمێ دە وەکی پارلامەنتەر و وەزیر کار کربوو، راستەراست کر ئارمانج. باکرھان ئانی زمان کو گەلێ کورد بێیی جوداکاریا مەزھەبی دەرگەھ بۆ ھەموو ئالیان ڤەکریە و دیار کر: “گەلێ کورد تو کری وەزیر ژ بەر کو تو عەلەوییی. د ھەر سەردەمێ دە پارتیا مە پشتگری دایە عەلەویان و پارلامەنتەرێن عەلەوی ژ باژارێن وەکی سێرت، ئێلھ و ئامەدێ ھاتنە ھلبژارتن. ھەتا ئیرۆ چ کوردەکی نەگۆتیە ‘چما ئەڤ عەلەویە ھات و ھاتە ھلبژارتن’، جوداکارییەکا وسا د ناڤ مە دا تونەیە.”
