یا ھەری گرین ژی ئەوە و یا نایێ فێمکرن ژی ئەڤە: ھەما ھەما ھەمی پارتیێن ژ خوە رە دبێژن ئەم کوردستانی نە، لێ ھەزار مخابن ژ بۆنا بەرژەوەندی، یەکرێزیا گەلێ خوە ژی چ گاڤێن بەربچاڤ ناهاڤێژن. پرانی تەنێ د گۆتن و نڤیساندنێ دە دمینە.
ھەگەر ب راستی ئەم یەکتیا مالا کورد دخوازین: دڤێت بەرژەوەندیا شەخسان و پارتیان ئەم ھەتا ئازادی و سەرخوەبوونا کوردستانێ بدن ئالیەکی دا کو بکاربن ب ھەڤ رە کار و خەباتێن ژ بۆنا ئازادیا گەلێ خوە بکن.
ئەو ژی پێویستە کو د بن کۆنەکی نەتەوەیی دە، جھێ ھەمی پارتی، کەس و کەسایەتان ھەبە. ھەگەر ب راستی ژی ئەم باوەرن کو ژ بلی یەکتیەک نەتەوەیی ئەم دێ نکاربن کێشەیا خوە چارەسەر بکن، وێ گاڤێ ئەم مەجبووری ھەڤن کو ب ھەڤرە بن. ب ھەڤرە کار بکن. کۆنێ خوە یێ نەتەوەیی ڤەکن و د بن دە جھێ خوە بگرن دا کو ئەم ژ بندەستیێ ئازاد ببن.
دڤێت ئێدی دەست ژ لیستک و فێلبازیێن وەکە سالێن بەری ھەشتیێ بێ بەردان. ب ئاوایەکی مەعوول، ب نەرینەکا نەتەوەیی ب موتەوازیەکا ئینسانێ دڤێت ئەم نێزیکێ ھەڤ ببن دا کو بکاربن ل گەل ھەڤ کار بکن.
وەکە رێبەر و سەرکێشێن وەلاتێ خوە دڤێت ئەم ل گەل کێمانیان ژی ب دەستێ ھەڤ بگرن. د یەکتیەکا نەتەوەیی دە، ژ دەرڤە مایینا هندەک پارتی و کەسایەتان، ئەو نابە یەکتیا نەتەوەیی. لێ دکارە ببە یەکیتیا پارتی و هندەک تەڤگەران. ھەلبەت ئەو ژی باشە.
وەکە مە گەلەک جاران گۆتیە و نڤیسیە کو دڤێت کورد ببن یەک. ئەڤ ب سەرێ خوە نەرینا ملەت و گەلێ کوردە ژی. لێ چما پێک نایێ؟ ئەو جھێ پرسیە کو دڤێت ھەرکەس ژ خوە و ژ بەرپرسێن خوە بپرسن.
ب قاسی ئەز دزانم ھێژ پارتیێن مەیێن کوردستانی، ب سایا سال مەزنێن رێڤەبرێن خوە، ل گۆر بیر و رایێن وان کو ئەو ژی ژ سالێن 1970 مانە، تەڤدگەرن. لۆما ب باوەری، ب فکر و نەرینێن وێ دەمێ ئەم دێ نکاربن ببن خوەدیێ خوە و سیوانەکا نەتەوەیی یا ل گۆر شەرت و مەرجێن ئیرۆ…
ئیرۆ خەباتێن یاسایی ئانگۆ ئەشکەرە ل پێشە: لۆما دڤێت ئەم ژی ل گۆر ڤێ رەنگ و دەنگێ خوە دیار بکن کو ئەم ل کونە، ب کێ رە دکارن بەشداری ناڤا خەباتێن دەمۆکراتیک ببن. یا ھەری گرینگ و فەرز ژی ئەوە کو دڤێت کوردێن باکورێ کوردستانێ ببن خوەدی یەک تەمسیلێ دا کو بکاربن مافێ گەلێ خوە ب یەک دەنگی بپارێزن.
ژ بۆنا دەرخستنا ئالتارناتیفەکا وەھا ژی دڤێت ئەم ھەڤ قەبوول بکن، ل گەل کێمانی، شاشی و ھێژایێن خوە دڤێت ئەم ب ھەڤرە کار بکن دا کو ببن ئالتارناتیفەک ل باکورێ کوردستانێ…
