بووبێ ئەسەر
ئەز گازی مللەتێ خوە یێ بێ دەولەت دکم. دقیرم ب دەنگەکی بلند، دکم ھاوار، ب دەنگەکی ب ئێش، دکم گازی، ب دەنگەکی خەمگین دبێژم کوردنۆ خوەدی ل وەلاتێ خوە دەرکەڤن.
ژ بۆنا چێکرن و بسەرخستنا تشتێن باش، دڤێت بنگەھێن ئەساسی بێنە ئاڤێتن. ھەگەر ئەساس خرابە بت، گاڤێن ژ بۆنا ئاڤێتنێ باش چێنابە.
ھندەک کوردێن خاین و خوەفرۆش ئێدی ژ بەر کریارێن خوەیێن ل دژی گەلێ خوە، بێھنا گەنی کەتیە لاشێن وان. ژ بەر بێھنا خوە یا گەنی مەجبوور دمینن کو ژ ناڤا خەلکێ درەڤن و خوە دسپێرێن داگیرکەران.
وەکە رەوشا یەنەکێ یا نھا و سەرۆکێ وێ یێ کو ستێرنێ وی د دەستێ داگیرکەران دەیە. ئێدی ژ گەندەلیێ، ژ تالان و دزیێ، ژ بەربەریبوون و زلما ل گەلێ کورد کرنە و دکن، گەنی بوونە. لۆما ژی نکارن ژ بەر وێ بێھنا گەنی د ناڤا گەل و پارلەمەنێ وێ دە بسەکنن.
ل گۆر من باش بوو کو ب خوە ژ پارلەمانا کو ب خوینا پێشمەرگەیان ھاتیە ئاڤاکرنێ، دوور خستن. یان دا وێرێ ژی وەکە خوە گەنی کن. لێ نھا دۆر ھاتیە کو پارلەمەنا کو ب پرانیا بەشداران ھاتە ڤەکرن. دڤێت ئێدی ئەو ژی ئەرکا خوە بینە جھ.
وەکە پارلەمەنەکێ دەمۆکراتیک پرانیا ب دەستخستنا پارلەمەنان، دڤێت کارێ خوە بکە دا کو ئێدی رێیا پاراستن و گاڤێن بەرب سەرخوەبوونێ بێنە ئاڤێتنێ.
دڤێت مللەتێ کورد نەترسە و ل سەر لنگان بن. ژ بۆنا پاراستنا ئەردا خوە، نامووسا مللەت و خەلکێن خوە، خوە ل دۆر بارزانیان بجڤینن. وان ب ھێز و ب قاوەتر بکن دا کو ئەو ژی چ ل کوردستانێ و چ ژی د قادا ناڤنەتەوەیی دە مافێ کوردان یێ رەوا بپارزن. ماف و پاراستن، خوەدی ل خوە و گەلێ خوە دەرکەتاندن، ب ھێزێ قاوەتێ دبە. ئەو ژی خەلک، گەل و ملەت دکارە ڤێ بدە بارزانیان.
بارزانیێن کو ئەڤە زێدەتری سەد سالانە کو ژ بۆنا ئازادی و سەرخوەبوونا کوردستانێ شەری دکن. ب قاسی چەمێ فرات و دیجلەیێ خوین ژ بۆنا کوردستانەکا ئازاد و سەربخوە رژاندن. کوردستانا ئیرۆ کو ل باشوورێ کوردستانێ ب دەست خستنە، وێ نەکن قوربانا یەکی وەکە بافلێ کو ستێرنێ وی د دەستێ داگیرکەران و ب تایبەتێ یێ ئیرانێ دەیە، بەردە.
رۆژ ھاتیە کو دڤێت ئێدی خەلک و ئەندامێن کو ھەتا نھا لگەل یەنەکێ و جەلالیان باوەر بوون، ڤێ باش بزانبن کو دێ باوەریا وە یا ھوون ببن خوەدی دەولەتەک سەربخوە و ئازاد، بنپێ دکە. ژ سالا 1966ێ ھەتا ئیرۆ ڤێ یەنەکێ و ب تایبەتی جەلالیان نەھشتنە و ناخوازن ملەتێ کورد بگهیژە ئازادی و سەرخوەبوونا خوە.
باب و کالکێ بافل چاوا نکاریبوو پشتا بارزانیان ئەردێ بدن و کوردان بکن کۆلێن داگیرکەران، وێ قەت بافل و برایێ خوە قوباد ژی نکاربن ئارمانجا باب و کالێ خوە یا تونەبوونا بارزانیان و بندەستیا کوردان بینن جھ.
گازی و ھاوارا من ژ گەلێ من رە ئەوە کو نەترسن و نەکەڤن تایا مرنێ. بزانبن کو ھەتا بارزانی ھەبن دێ کورد ب تەمامی و باشوورێ کوردستانێ ب تایبەتێ دێ گهن مافێن خوەیێن رەوا. دێ ئازادی و سەرخوەبوونا ملەتێ خوە راگھینن دا کو رۆھنیا خوە بدە پەرچێن دن ژی.
زێدەیی سەد سالانە کو بارزانی شەرێ چار داگیرکەران کربوون و دکن، لێ قەت تێک نەچوون. ژ بەر کو نەتەوەیی دفکرن. لۆما دبێژم: ژ بەر خوەڤەکشاندنا ژ پارلەمەنا کوردستانێ یا نەڤیێ ئیبراھیم ئەحمەدێ ل سەر بیر و رایا ب لیستکێن ل گۆر داخوازن داگیرکەران دێ چ جاران ب سەرنەکەڤە. وێ سەرکەتنیا گەلێ کورد، پێشمەرگەیێن قەھرەمان و بارزانیێن نەتەوەپەرەست بە.
کوردێن وەلاتپارێز، کوردێن وەلاتحەز، کوردێن دلسۆزێن گەلێ خوە ڤێ باش بزانبن، تێکچوون یان ژ ھۆلێ راکرنا بارزانیان تێ واتەیا کو دێ ئەڤە ببە ژ ھۆلێ راکرنا ھەرچار پەرچێن کوردستانێ. ھەگەر ھوون ناخوازن وەکە کۆلە و بندەستان بمینن، دڤێت ھوون ژی ئێدی ھەلوەستێن خوە ئەشکەرە بکن.
د ڤێ رەوش و ئالۆزیێن زیز دە، بێدەنگبوونا، نڤیسکار، رەوشەنبیر، ھونەرمەند و ھەمی بەشێن ژ وەلاتێ خوە حەز دکن، نە رەوایە. لۆما دڤێت ئەم ھەمی ب ھەڤرە ب یەک دەنگی بقیرن و بێژن:
بەسە ئێدی ژ دەستێن خاین، خوەفرۆشێ نۆکەرێن داگیرکەران. ب ھێز و قاوەتێن خوە، ب بیرەوەری و مەژیێن خوەیێن کوردستانی، خوە ل دۆر بارزانیان بجڤینن دا کو ئەم ژی ببین خوەدی دەولەتا خوە… بێ دەولەتێ مرنە، خوەلیسەرییە. کۆلەتی و رەزیلییە.
دڤێت ئێدی ھوون ئەندامێن ڤی مللەتێ قەدیم، ب دەنگ و رەنگێن خوە ببن پاراسڤانێن گەلێ خوە. ببن دیوارەکی ژ پۆلا کو خاین و خوەفرۆشێن کورد ئێدی ل وی دیوارێ ئاسێ بمینن.
یان کوردستان یا نەمان.
