شەیخموس ئۆزەنگن

چیرۆکا سدیق تۆرون و مالباتا وی

ژ زلما رەش بەر ب خەونێن سەرکەفتی دە.

ھندەک کەسایەتی ھەنە کو چیرۆکا ژیانا وان نە تەنێ سەرکەفتنە، لێ روومەت، بەرخوەدان و دلسۆزیا نەتەوەیی یە. مالباتا سدیق تۆرون (محەمەد سدیق تۆرون / سید تۆرون) یەک ژ وان مالباتێن ھێژایە کو د رۆژێن ھەری دژوار دە ژی، ب خیرەت و حەزکرنا وەلات، خەونێن خوە ل سەر ئاخا دوور ژی ئانینە جھ.

د سالێن 1990ێ دە، دەما کو رۆژێ چار-پێنج کورد ب دەستێ دەولەتا ترک و سازیێن ھەڤالبەندێن وێ دھاتن رەڤاندن و قەتلکرن، زلم و دەستدرێژیا لەپێن تاری درێژی سەر مللەت و وەلاتێن مە دکر؛ د سالێن 1993-1994ێ دە، دەولەتا ترک ب سازیێن کوردکوژ یێن خوە رە، راسەری م. سدیق تۆرون و مالباتا وی ژی بوو. دەست دانین سەر شیرکەتا وی، کۆچکێن وی و مال و ملکێ کو ژ زارۆکتیێ ڤە ب خوێدان و خیرەتا خوە بەرھەڤکر بوو. سدیق تۆرون مەجبوور ما ب پەرەیێ ھندک ترکییەیێ تەرک بکە و بەرێ خوە بدە ئەمەریکا.

ئەو ژ زلما ترکان رەڤیا و پشتی دەمەکێ ل ئاتلانتا، پاشێ ژی ل کالیفۆرنیا، نەوالا ناپا ب جھ بوو. دخوەست کو خەونێن خوە ل ور پێک بینە. وی دگۆت: “ھەر دەولەتا ترکان نەھشت کو ئەز ل کوردستانێ خەونێن خوە بینم جھ؛ ئەزێ ل ڤر ئاخەکێ بکرم، کو بشبهە ئاخا کوردستانێ و خەونێن خوە بجیھ بینم.”

د سالا 2002یێ دە، ب پشتگریا خانما خوە ناجیە، ئەردەکی بەرفرەھ (نێزیکی 4200-4300 دۆنەم) ل نەوالا ناپا ب 200 ھەزار دۆلاری کری. ئاخەک دارستانی، کۆرت و کاش بوو، گەلەک کەسان دگۆتن “نەبە کو تو ل ڤر تشتەکی مەزن ئاڤا بکی”. لێ سدیق تۆرون و مالباتا وی دەست ب خەباتێ کرن. ناڤێ جھێ خوە کر “کوردستانا پچووک”. دارێن فێقی، تەبا و کەڤرێن ژ بنگۆل، مێردین، ئامەد و دەڤەرێن دن یێن کوردستانێ ئانین و ب دەستێ خوە دەست ب ئاڤاکرنا خەونا خوە کرن.

ئیرۆ ل وێ جۆتگەھێ (چەولکێ):

ب ھەزاران دارێن زەیتوونێ (زێدەتری 10-12 ھەزار)، رەزێن تریان، دارێن توو، گووز، قەیسی و گەلەک فێقیێن دن ھەنە.

کارگەھا روونێ زەیتێ و شەرابا “م.س. تۆرون” ئاڤا کریە.

ئاڤاکرنا پرتووکخانەیەک کوردی ژی ددۆمە، ھەتا مەھەکێ دێ ئەو ژی بقەدە. ھەموو کەڤرێن ئاڤاھییا پرتووکخانێ ژ باکورێ کوردستانێ برینە.

دو وارگەھێن مێڤانان، رێیێن درێژ یێن گەرێ (70-80 میل) کو ل سەر وان ناڤێن قازی محەمەد، مستەفا بارزانی، سەیید رزا، ئەحمەد کایا، یلماز گونەی و زێدەتری 200 ناڤێن کوردی ھەنە.

مووزەیەک چاندنیێ و دیرۆکێ، بیرئانینێن نەمروود، ھەولێر، ئامەد، دێرسم و زۆزانێن کوردستانێ.

جھێن نەتەوەیی یێن کو ھشمەندیا ملی، کەڤنەشۆپی و روومەتا کوردان پێشکێش دکن.

ژ بەر کو نێزیکی ھۆلیووودێیە، ریکلام و مێڤانێن وی زێدە بوون. سدیق تۆرون؛ وەک دیپلۆماتەکی کورد و لۆبیێ کوردستانێ، ژ مێڤانێن خوە رە بەحسا زلما ل سەر کوردستانێ، ھێژاییێن مللەتێ کورد و دیرۆکا وەلاتێ مە دکە. بالا گەلەک کەسایەتیێن ئەمەریکی، د ناڤ دە لیستکڤانێن وەک شۆن کۆنری و کلینت ئیستۆد، کشاند. ھەر سال فەستیڤالا توویا یا ناڤنەتەوەیی ل ور تێ لدارخستن و ب ھەزاران کەس سەرەدانا “کوردستانا بچووک” دکن.

ئیرۆ کوردستانا بچووک، ب ھەموو سەرکەفتنێن خوە ل نەوالا ناپا ل ھێڤیا دۆست و دلخوازێن خوەیە. ئەڤ نە تەنێ جۆتگەھەکە؛ ئەڤ شەھادەتا بەرخوەدانێ، دلسۆزیا نەتەوەیی و سەرکەفتنا کو ژ ئاخا وەلات دوور ژی دکارە وەرە ئاڤاکرنە.

وەی تو مالباتا تە ھەر سەرکەفتی بن، کەک سدیق تۆرون و خانما تە ناجیە!

ئەڤ چیرۆک نیشان ددە کو ھەرچەند زلم و دەستێن تاری ھەول بدن ژی، خەونێن مللەتەکی کو ب حەزکرنا ئاخ و روومەتێ مەزن دبە، نکارن وەرن تونەکرن!

کوردستانا بچووک ئیرۆ ل کالیفۆرنیایێ، وەک ھێڤیەکێ و نیشانەکێ ژ بۆ ھەموو کوردان، ب سەربلندی رادوەستە.