ھەر چەند پەکەکە، یان ژی وەکە ئەو خوە ب رێڤەبەریا تەڤگەرا ئاپۆیی خوە پێناسە دکە، خوە ھلوەشاندبە ژی، ئەو دەست ژ پێ لیستنا ب ھەڤسەنگیا ھێزێ یا ل ھەرێمێ بەرنادە. قادەکا دن کو ئەو دخوازە هەلمەتێ لێ بکە رۆژھلاتێ کوردستانێ و ئیرانە. پەکەکە، ب ناڤێ پژاک، دخوازە تەڤلی پێڤاژۆیا تێکلداری ئیرانێ ببە و ل ور ھەبوونەکا سیاسی ئاڤا بکە. واتە، ئەو دخوازە پرۆژەیا ئەنتەگراسیۆنێ یا ئۆجالان، کو ژ بۆ سالا 2025ێ ھاتیە ئامادەکرن، ل رۆژھلاتێ کوردستانێ بەلاڤ بکە. ژ بۆ ڤێ یەکێ گاڤەکا پرئالی دایە دەستپێکرن. پەکەکێ ناسنامەیێن 24 گەریلایێن کو د دەھ سالێن داوی دە د شەر و پەڤچوونان دە ژیانا خوە ژ دەست دانە ب مەراسیمێن تایبەت راگەھاندن.

چما ونداھییێن کو 19 سالن نەھاتنە ئەشکەرەکرن نھا تێنە ئەشکەرەکرن؟

د 5ی مژدارێ دە، ھەپەگێ ناسنامەیا 9 جوانێن ژ رۆژھلاتێ کوردستانێ ئەشکەرە کر. پشترە، د 9ی مژدارێ دە، ناڤێن 15 جوانان، کو ھەمی ژ باژارێ ماکوو نە، ھاتن ئەشکەرەکرن. دەما کو مرۆڤ ل دەم و دابەشکرنا ڤان داخویانیان دنێرە، مرۆڤ دکارە ببینە کو شێوەیەکی نازک یێ ئەندەزیاریا جڤاکی ھەیە.

د ناڤ ناسنامەیێن ھاتینە وەشاندن دە کەسێن کو د سالا 2011ێ دە ژییانا خوە ژ دەست دایی ھەنە. میناک، رەشید ئەزنەد (چاڤرەش گابار)، کو ناڤێ وی ھاتیە ئەشکەرەکرن، د سالا 2011ێ دە ل حەفتەنینێ ژییانا خوە ژ دەست دایە. ئەڤ تام 15 سالان بەرێیە. چما ناڤێ وی  ھەتا نها نەھاتیە ئەشکەرەکرن؟ پەکەکە ب گشتی دەرەنگکەتنا ئەشکەرەکرنا ناڤێن جوانان ب “شەرت و مەرجێن شەری” ڤە گرێ ددە. لێبەلێ، ژ بۆ رەشید چ بەهانەیەکا وسا تونە. ژ بەر کو حەفتەنین ل باشوورە و ب نووچەیێن ل ور ب ھێسانی دگهن دەست وان. واتە، ژ سالا 2011ێ ھەتا 2015ێ د ناڤبەرا پەکەکێ و دەولەتا ترکیێ دە ئاگربەست ھەبوو. لێ ئەو نەھات راگھاندن.

ب ھەمان ئاوایی، ناڤێ ئێریش وەلات (محەمەد محەمەدزادە)، کو د سالا 2007ێ دە ل قەندیلێ ژییانا خوە ژدەست دایی، بالکێشە. ئەو ل قەندیلێ ل کێلەکا ناڤەندا پەکەکێ بوو. ئەڤ تام پشتی 19 سالان دهێت راگەھاندن. ب راستی، چاڤکانیێن پەکەکێ دبێژن کو محەممەدزادە سیخوور بوو و د بن ئیشکەنجەیێ دە ژییانا خوە ژ دەست دایە، لێ ژ بەر کو ئەم نەکارینە ڤێ ئاگاھیێ پشتراست بکن، ئەم دێ نھا تشتەکی تەکەز ل سەر ڤێ یەکێ نەبێژن.

بازرگانێ ئیفلاسبوویی و دەفتەرا ناسنامەیان یا پەکەکێ

چ قەومی کو پشتی 19 سالان ئەڤ کەسە هاتن بیرا پەکەکێ و ناڤێن وان راگهاندن؟ سەدەما راستین ئەڤە: ژ بەر کو پەکەکە نھا پێدڤی دبینە کو ل رۆژھلاتێ کوردستانێ ل سەر بنگەھا خوین، قوربانی و شەھیدان پرۆپاگاندایێ بکە.

گۆتنەکا مەزنان ھەیە دبێژە، “بازرگانەکی ئیفلاسبوویی دەفتەرێن کەڤن تەڤلیھەڤ دکە” پەکەکە، مینا ڤی بازرگانی، دەما کو پێدڤی بکە د سجیلێن کەڤن دە دگەرە، کەسەکی کو ژیانا خوە ژ دەست دایە لێ ب فەرمی نەھاتیە راگھاندن دبینە، و دووڤ را وان ژ بۆ کارتێکرنا ل سەر هەست و سۆزێن گەلێ کورد بکار تینە.

وان ل باکورێ کوردستانێ ژی ھەمان تشت کر. دەما کو گەلێ کورد بەرتەک نیشانی بانگا ئۆجالان یا ژ بۆ ئەنتەگراسیۆنێ و تەسفیەکرنا بێدەنگ یا رۆژئاڤا دای، وان ب دەھان کەسێن کو ب سالان ب فەرمی کوشتنا وان نەھاتبوو راگھاندن ژ نشکا ڤە راگھاندن. وان ل باژاران مەراسیم و بیرئانین ئۆرگانیزە کرن. واتە، وان ھەول دا کو بنگەھا خوە ژ ھێلا سیاسی ڤە بینن جەم ھەڤ، دیسا ب بکارئانینا لاشێن جوانان.

پەکەکە دخوازە ھەناسەکێ بدە پژاکێ؟

د ڤان دەمێن داوی دە، ژ پارتی، سیاسەتمەدار و رەوشەنبیرێن رۆژھلاتێ کوردستانێ و ھەر وەھا ژ رایا کوردی ڤە رەخنە ل پەکەکێ و پژاکێ ھاتنە کرن. ب راستی، پەکەکێ بوویەرێن رۆژئاڤا و ب تایبەت بەرخوەدانا کۆبانی، ب پرۆپاگاندەیەک سەرکەکەفتی ل رۆژھلاتێ کوردستانێ بکار ئانی و لاینگر ب دەست خستن. ب رێیا کەنەکێ، پەیامێن “یەکیتیا کوردان” ژ دەردۆرێن سیاسی و سڤیل یێن رۆژھلاتێ کوردستانێ ل ئەورۆپایێ رە ژی راگھاند، وێنەیەکێ ئەرێنی یێ کوردی پێشکێش کر. لێبەلێ، پێڤاژۆیا ئەنتەگراسیۆنێ یا کو ب سالا 2025ێ دەست پێ کر، و پشترە پۆلیتیکایێن پەکەکێ یێن کو بوون سەدەما ھلوەشاندنا رۆژئاڤا، ئیماژێ وێ ھەژاند بوو.

ب تایبەتی، ئێرشێن ئەمەریکا و ئیسرایلێ یێن ل سەر ئیرانێ و ھەلوەستا پژاکێ راستیا پەکەکێ و پژاکێ ژ گەلێ رۆژھلاتێ کوردستانێ رە زەلالتر کر. داخویانیێن سەرۆکێن پژاکێ ئەمیر کەریمی و رێوار ئاودانان، کو پارتیێن دن یێن رۆژھلاتێ کورد ئارمانج کرن، و  ڤەگۆتنا ئەنتەگراسیۆنێ یا ئۆجالان بۆ رۆژھلات، بوون سەدەما کارڤەدانێن گرینگ ل دژی پژاکێ.

پەکەکێ کامپانیایەک مەدیایی دا دەستپێکرن دا کو ڤێ ئیماژا خرابکری یا خوە و پێکھاتەیا رۆژھلات، پژاک، سەرەراست بکە. و نھا، ئەو تشتێ کو ب سالان ل باکور کرنە ل رۆژھلات دوبارە دکن: ھەول ددن کو ب گۆتنا “ئەم شەھیدان ددین، کەس نکارە مە رەخنە بکە، ھەر کەسێ کو مە رەخنە بکە دێ بێرێزییێ ب شەھیدان بکە” زەختێ ل ھەر کەسی بکن. بێ گومان، ئەو دخوازن مەراسیمێن جەنازەیێن جوانان ژی بکار بینن دا کو خوە وەکی بێگونەھ و قوربانی نیشانی رایا کورد بدن.

گەلۆ ئەڤ راگهاندنا شەھیدان نە یان ئەندازیاریا جڤاکییە؟

دەما کو مرۆڤ ل ناسنامەیێن جوانێن کو ناڤێن وان ھاتنە راگھاندن دنێرە، ئەشکەرەیە کو ھەر تشت ژ بۆ ئارمانجێن پرۆپاگاندایێ ھاتیە ئۆرگانیزەکرن. هەر یەک ژ وان ژ هەرێم و باژارەکێ رۆژهلاتێ کوردستانێ هاتیە راگهاندن.

میناک، ناڤێن 24 جوانان نە ھەمی ب جارەکێ، وەکە دو گرووپ تێنە راگھاندن.

ھەمی 9 ناڤێن دەستپێکێ یێن کو ھاتنە راگھاندن ژ وان باژارێن رۆژهلاتێ کوردستانێ نە یێن کو تێدا ب زاراڤەیێ سۆرانی دئاخڤن، پرانی جوانێن ژ باژارێ سنە نە.

راگھاندنا گرووپا دویەمین ژی ھەمی ژ ماکوویێ نە. ماکوو د راستیێ دە بەردەوامیا ھەرێما سەرحەدا باکورێ کوردستانێیە، و ئەو ب کورمانجی دئاخڤن. ئەڤ یەک ژ وان جھانە کو پەکەکێ ھەری زێدە تەڤلیبوون ژ ڤی باژاری وەرگرت بوون.

واتە، ئارمانجا پەکەکێ  ئەوە کو د ھەر ناڤبەرەکێ دە ھندەک ناڤان راگەھینە دا کو وان وەکە ئاموورەکی پرۆپاگاندەیێ پێک بینە.  ئارمانج نە ئاگاھدارکرنا مالباتانە؛ ئارمانج ئەوە کو ل سەر لاشێن جوانێن رۆژھلات شۆیا سیاسی بکە و کارتێکرنێ ل هەست و سۆزێن گەلێ رۆژهلات بکە.

وەکی مە ل ژۆر ژی گۆت، بازرگانێ ئیفلاسبوویی دەفتەرێن کەڤن تەڤلیھەڤ دکە؛ ئەم دێ پتر بینین کو پەکەکە دەفتەرێن کەڤن، ڤیدیۆ و  ئاخفتنێن ئۆجالان بێژینگ دکە و بەلاڤ دکە دا کو خوە بێگونەھ نیشان بدە و یاریا ھەست و سۆزێن گەلێ کورد بکە.