توولای ھاتیمۆگولاری ل دیاربەکرێ: ئەم ئامادە نە ترکیەیێ برێڤە ببن

توولای ھاتیمۆگولاری ل دیاربەکرێ: ئەم ئامادە نە ترکیەیێ برێڤە ببن

ھەڤسەرۆکا گشتی یا پارتیا وەکھەڤی و دەمۆکراسیێ یا گەلان (دەم پارتی) توولای ھاتیمۆگولاری، د فۆروما جوانان دە کو ل دیاربەکرێ ھات لدارخستن، راگھاند کو ئەو ب ھەموو پرۆژەیێن خوە ئامادە نە ترکیەیێ برێڤە ببن. ھاتیمۆگولاری د ئاخافتنا خوە دە بال کشاند سەر پرسگرێکێن ئابۆری، پۆلیتیکایێن شەرێ تایبەت و پێڤاژۆیا ئاشتیێ.

ھاتیمۆگولاری دیار کر کو پێڤاژۆیا ھەیی یا کو چەک تێ دە بێدەنگ بوونە، ژ بۆ جڤاکێ و جوانان دەرفەتەکە گرنگە داکو دەنگێ خوە بلند بکن. لێبەلێ، وێ بال کشاند سەر زێدەبوونا بکارئانینا مادەیێن ھشبەر و بابەتێن نەیاسایی یێن د ناڤا جوانان دە و ئەڤ یەک وەکی بەشەک ژ “پۆلیتیکایێن شەرێ تایبەت” ب ناڤ کر و گۆت کو ئەڤ سیاسەت ژ بۆ لاوازکرنا تێکۆشینا جڤاکی تێن مەشاندن.

کریزا ئابۆری و پێلا کۆچبەریێ

ھاتیمۆگولاری د ئاخافتنا خوە دە ل سەر رەوشا ئابۆری ژی راوەستیا، ھاتیمۆگولاری دەستنیشان کر کو ل ترکیەیێ 4.5 ملیۆن جوان بێکارن و ژ بەر هەلاوسان و بھابوونێ ژیان ل گەل بوویە بارەک گران. وێ دا زانین کو ژ بەر هەژاریێ د دیرۆکا ترکیەیێ دە پێلا ھەری مەزن یا کۆچبەریێ تێ ژیان کرن و گەلەک جوان دخوازن بچن ئەورۆپایێ. ھەر وھا بال کشاند سەر وێ یەکێ کو رێژەیا ژنێن کو دەست ژ خوەندنێ بەرددن ھەر کو دچە زێدە دبە.

ھەڤسەرۆکا دەم پارتیێ د داویا ئاخافتنا خوە دە بال کشاند سەر دۆزێن وەکی وندابوونا گولیستان دۆکو و رۆژهەلات کزماز، ھەر وھا بنپێکرنێن مافێن مرۆڤان یێن ل زانینگەھان و گۆت کو ل ھەمبەری ڤێ یەکێ پێویستە ھەموو جوان ب رێخستن ببن و تێکۆشینەکا ھەڤبەش بمەشینن.