80 نیڤیسکار و ئەکادەمیسیەن: سلێمانی نە ملکێ ت ھێزەکە سیاسییە

80 نیڤیسکار و ئەکادەمیسیەن: سلێمانی نە ملکێ ت ھێزەکە سیاسییە

کۆمەک ژ 80 رەوشەنبیر، ئەکادەمیسیەن، نڤیسکار، یاساناس و چالاکڤانێن سڤیل یێن کوردستانێ ب داخویانیەکێ ل دژی کامپانیایا بھەرێمکرنا سلێمانیێ دەرکەتن. وان د داخویانیا خوەیا ب ناڤێ “بانگاوازیەک ژ بۆ پاراستنا یەکیتیا ھەرێما کوردستانێ” دە تەکەز کرن کو چارەسەریا کێشەیێن خەلکێ ب چاکسازی و دادپەروەریێ پێک تێ، نە ب پارچەکرنا ھەرێما کوردستانێ.

د داخویانیێ دە ھات دەستنیشانکرن کو ھەرێما کوردستانێ بەرھەما دیرۆکەکا ھەڤبەش و تێکۆشینا چەندین نفشانە و جوداھیێن د ناڤبەرا باژاران دە دەولەمەندی نە، نە سەدەما قوتبوونێ. نڤیسکاران پرسین کو گەلۆ پرسگرێکا وەلاتیان د یەکگرتنیێ دەیە یان د شێوازا برێڤەبرن و نەدادپەروەریێ دەیە، و دەستنیشان کرن کو ئەگەر پرسگرێک د ئیدارەکرنێ دە بە، دڤێت چارەسەری د چاکسازیا سازیان و دابەشکرنا دادپەروەرا سامانان دە بێ دیتن.

“سلێمانی ملکێ چ پارتیەکێ نینە”

رەوشەنبیران ھەر وھا ھەلوەستا خوەیا ل ھەمبەری کۆمکرنا ئیمزایان ئانی زمان و گۆتن کو ئەڤ کامپانیایێن ب ڤی رەنگی نکارن ببن نوونەرتیا رایا گشتی. وان ھشیاری دان کو نابە چ باژار ببن قوربانیێ ناکۆکیێن پارتیان و گۆتن: “نە ھەرێم ملکێ چ پارتیەکێیە و نە ژی سلێمانی ملکێ چ ھێزەکا سیاسییە.”

د داویا داخویانیێ دە، ئیمزاکەران ب بیر خستن کو سەمبۆلێن وێژە و دیرۆکا کوردی یێن وەکی نالی، شێرکۆ بێکەس، مەستوورە و حەپسەخانێ ب ھەڤ ڤە گرێدایی نە و بانگ ل ھەموو ئالیێن رەوشەنبیر و سیاسی کرن کو بەرژەوەندیێن گشتی ل بەر چاڤان بگرن و ل دۆرا مێزا دانوستاندنێ بجڤن.