ب بۆنەیا سالڤەگەرا دارڤەکرنا رێبەرێ سەرھلدانا دێرسمێ سەیید رزا و ھەڤالێن وی، ب بەشداریا نوونەرێن پارتیێن سیاسی، رەوشەنبیر و سیاسەتمەدارێن کورد ل باژارێ ستەنبۆلێ بەرنامەیەکا بیرئانینێ و شەرمەزارکرنێ ھاتە برێخستنکرن.
ل گۆری ئاگاھیێن کو ژ ئالیێ نڤێسینگەها راگھاندنێ یا پارتیا وەلاتپارێزێن کوردستانێ (PWK) ڤە ھاتنە بەلاڤکرن، ئەڤ چالاکیا بیرئانینێ د 15ێ مژدارا 2026ێ دە ل ناڤەندا وەقفا چاند و لێکۆلینێ یا کوردی (کورد-کاڤ) پێک ھات. بەرنامە ب دەقەیەکا رێزگرتنا ژ بۆ سەیید رزا، قوربانیێن سینەمایا عاموودێ و تەڤاھیا شەھیدێن کوردستانێ دەست پێ کر و رێڤەبەرییا وێ ژ ئالیێ ئەندامێ کۆمیتەیا رێڤەبەرا ناڤەندی یا پارتییا وەلاتپارێزێن کوردستانێ قاسم ئەرگون ڤە ب زاراڤەیێ کورمانجی ھاتە مەشاندن.
د پانەلێ دە نوونەرێن ئالیێن سیاسی و سازیان دیرۆکا کۆمکوژیا دێرسمێ و سیاسەتا ئینکارێ یا وێ سەردەمێ نرخاندن. محەمەد گول ل سەر ناڤێ پارتییا وەلاتپارێزێن کوردستانێ ب زاراڤەیێ کردکی-زازاکی، مەنسوور کارا ل سەر ناڤێ پارتیا سۆسیالیستا کوردستانێ (پەسەکێ) و فەرھاد کوردستانی ل سەر ناڤێ تەڤگەرا ڤەژینێ ب زاراڤەیێ کورمانجی ئاخڤین. ھەر وھا سەرۆکێ گشتی یێ کورد-کاڤێ محەمەد جەلال بایکارا ژی ب زمانێ ترکی گۆتارەک ل سەر گرینگیا بیرئانینێ پێشکێش کر.
بەرنامەیا بیرئانینێ ب نرخاندنێن نڤیسکار سەلمان یەشیلگۆزێن ل سەر روودانێن دیرۆکی یێن دێرسمێ و خوەندنا ھەلبەستەکێ ژ ئالیێ ئەندامێ مەجلسا پارتیێ یا پارتییا وەلاتپارێزێن کوردستانێ، ھەلبەستڤان عەبدولمەجید کاپازان ڤە ب داوی بوو.