ھەموو ھەڤال و ئەندامێن ھەڤبەندیيا نەتەوەیی یا کوردستانێ (ھەڤبەندی) یێن کو د ئۆپەراسیۆنا 17ێ مژدارێ دە ھاتبوون گرتن، ژ ئالیێ دادگەھێ ڤە ھاتن بەردان.
سەرۆکێ گشتییێ پارتیا وەلاتپارێزێن کوردستانێ موستافا ئۆزچەلیک ئیرۆ 19ێ مژدارا 2026ان راگھاند، ھەموو ھەڤالێن وان یێن د ئۆپەراسیۆنا ل دژی ھەڤبەندییێ دە ھاتبوون گرتن، ژ ئالیێ دادگەھێ ڤە ھاتنە ئازادکرن.
سبەھا 17ێ مژدارا 2026ان، ل دژی ئەندامێن ھەڤبەندیا نەتەوەیییا کوردستانێ (ھەڤبەندی) کو نوو ھاتیە دامەزراندن، ئۆپەراسیۆنەکە بەرفرەھا پۆلیسان ھاتبوو لدارخستن.
ھەڤبەندییێ پێشتر د داخویانیەکێ دە بەلاڤ کربوو کو د ئەنجاما ئۆپەراسیۆنێ دە 14 ئەندامێن وان ھاتنە گرتن. ناڤێن وان کەسان ئەڤ بوون: بایرام بۆزیەل، مەھمەت جان ئازبای، فوات ئۆنەن، ئابدوڵاھ ئایدن، ئاھمەت گەچەر، ئال ئۆنجو، سەڤگ چەلک، رهمهزان تاشدەمیر، حهسهن داگتەکن، رۆژبن بوکون، ئال چەڤەن، ئارژن جەیلان، فوئات ئۆنهن و دیار ئۆزباکش.
ھەروھا د ھەمان ئۆپەراسیۆنێ دە، ساەت 06:00ێ سبەھێ ل ستەنبۆلێ لێگەرین ل مالا سەرۆکێ گشتییێ پارتییا وهلاتپارێزێن كوردستانێ موستافا ئۆزچەلیک ژی ھاتبوو کرن. د داخویانیێ دە ھاتبوو دەستنیشانکرن کو ئۆزچەلیک د وێ دەمێ دە ژ بەر کارێ خوەیێ تایبەت ل ھەولێرا باشوورێ کوردستانێ بوو و د مالێ دە تەنێ داییکا وی ھەبوو.
ھەڤبەندییێ بەرییا بەردانا ئەندامێن خوە د داخویانیێ دە دیار کربوو کو ئەڤ ئۆپەراسیۆن د دەمەکێ دە پێک ھاتیە کو پشتی راگھاندنا دامەزراندنا ھەڤبەندیێ د 9ێ مژدارا 2026ان دە ل دیاربەکرێ، گەفخوارن و کامپانیایێن دژمنانە ل دژی وێ دەست پێ کرنە.
ھەر وھا ھەڤبەندیێ، گرتن و رێبازێن ترساندنێ ب توندی شەرمەزار کر و گۆت: ئەڤ یەک جارەکە دن نیشانا بێتەحەمولیا دەستھلاتدارێن ترکیەیێ یا ل ھەمبەری دەربرینا داخوازێن نەتەوەیی یێن گەلێ کورد و مافێ وی یێ رێخستنکرنا خوە ب رێبازێن دەمۆکراتیکە.
ھەڤبەندییێ بانگ ل دەستھلاتدارێن ترکیەیێ کربوو کو ئۆپەراسیۆنێ یەکسەر راوەستینن، ھەموو کەسێن ھاتنە گرتن ئازاد بکن و رێزێ ل ئازادیێن بنگەھین — د ناڤ دە ئازادییا دەربرینێ، کۆمەلەبوونێ و رێخستنکرنا سیاسی — بگرن. داخویانی ب ڤێ تەکەزێ ب داوی بووبوو: پاراستنا مافێن سیاسی یێن گەلێ کورد نکارە وەکی سووج بێ حەسباندن.