قایمقامێ شنگالێ و شێوه‌رمه‌ندێ پارله‌مه‌نا كوردستانێ ژبۆ كارێن ئێزدیان ئه‌شكه‌ره كر كو گوهه‌رینه‌كه دیمۆگرافی ل به‌ر چاڤێن ده‌ستهه‌لاتێ ل شنگالێ تێ كرن و تو ئالیه‌ك ژی ده‌نگ ناكه.
مه‌هما خه‌لیل، قایمقامێ شنگالێ د به‌یانه‌كه نڤیسكی ده ئه‌شكه‌ره كریه، ناڤچه‌یا شنگالێ ئا رۆژئاڤا پارێزگه‌ها نه‌ینه‌وایێ، ب هایداری و ل به‌ر چاڤێن ده‌ستهه‌لاتێ، ئا همبه‌ری كارێن تێكده‌رانه دبه، ئه‌و یه‌ك ژی ژ ئالیێ میلیشیا و چه‌كدارێن ده‌رڤه‌ی سینۆران (په‌كه‌كێ) ڤه تێ كرن.
هه‌روها دبێژه: ل گۆری یاسا و ده‌ستوورا ئیراقێ، ئه‌ركێ هكوومه‌تا ئیراقێ یه رێگریێ ل وان كارێن تێكده‌ر ئێن ل شنگالێ تێن كرن بكه، لێ ئه‌و گاڤه ژ ئالیێ هكوومه‌تێ ڤه، نایێ دیتن.
د مژارا ئاواره‌یان ژی ده، قایمقامێ شنگالێ دا خویاكرن، د ده‌ما 5 سالێن ده‌رباسبووی ده، وان چه‌ندین نڤیسارێن فه‌رمی ژبۆ ڤه‌گه‌رینا ئاواره‌یان بۆ جی و وارێن وان ل شنگالێ، شاندنه به‌خدایێ، لێ تو گیرنگی پێ نه‌هات دایین، له‌و تێ فام كرن كو هكوومه‌تا به‌خدایێ د پرسا ڤه‌گه‌رینا ئاواره‌یان ده، جددی نینه.
مه‌هما خه‌لیل د مژاره‌كه دن ده گۆت: هكوومه‌تا ئیراقێ دانپێدانی كریه كو شنگال ناڤچه‌یه‌كه كاره‌ساتباره، هه‌روه‌ها هنه‌ك بریارێن گرێدای سه‌قامگیری ئا وی ناڤچه‌یێ ده‌رخستنه، لێ به‌لێ هینا نها تو بریاره‌ك ژ وان نه‌هات بجیكرن.
ب گۆتنا قایمقامێ شنگالێ، ژ سه‌رجه‌ما 360 هزار ئاواره‌یان كو 85% ژ وان روونشتڤانێن شنگالێ نه، ته‌نێ هه‌ژماره‌كه هه‌ری كێم ڤه‌گه‌رینه، به‌لكو ته‌نێ ئه‌و ئاواره ڤه‌گه‌رینه كو ناڤچه‌یێن وان د ده‌ست هێزا پێشمه‌رگه ده نه.
