مه‌سعوود بارزانی سه‌رۆكێ پارتا ده‌مۆكرات ئا كوردستانێ، ئیرۆ ل سه‌لاهه‌ددین ل گه‌ل به‌رپرسێن لق و ناڤچه‌یێن پارتا ده‌مۆكرات ئا كوردستانێ ل سینۆرێ پارێزگه‌هیێن دهۆك، مووسل و هه‌رسێ ئه‌نجوومه‌نێن سه‌ركرداتیا هه‌ولێر، كه‌ركووك گه‌رمیان و سلێمانی هه‌له‌بجه جڤییا.
ل ڤێ جڤینێ دە بارزانی رۆناهی خستە ل سەر رەوشا سیاسی ئا ھەرێما کوردستانێ و ئیراقێ و ناڤچەیێ و قۆناخا پشتی رەفەراندوومێ و ھەردو ھلبژارتنێن ئەنجوومەنا نوونەرێن ئیراقێ و پارلەمەنا کوردستانێ و هه‌روها پێئکانینا کابینەیا نوو ئا ھکوومەتا ھەرێما کوردستانێ.
بارزانی سپاس و پێزانینێن خوە ژ بۆ رۆلا ئەندام و کادیرێن پدک دەربری کو ژ بلی ھەموو گرفتان و وان ھەموو پلانگەریێن ل دژی پدک ل ھۆلێ ده بوو، لێ بەلێ ب ھیممەت و خوەراگری ئا ئەندام و ئالیگرێن پدک، پارتی ل سەر ئاستا ئیراقێ و کوردستانێ بوو ب پارتا ژمارە یەک.
ھەر وھا رۆلا کادیرێن پدک بلند نرخاند کو ب خوەراگری و باوەری ب خوە بوونێ ڤە، د دەمێن تەنگ ده ل سەنگەرێ پاراستنا کوردستانێ ده مان و ئەگەر پدک نەبا نھا نە ھەرێم دما و نە روومەتەک ژ بۆ گەلێ مە دما.
ھەر ل ڤێ جڤینێ دە بارزانی سپاسی خوەراگری ئا خەلکێ کوردستانێ و قەھرەمانتیا ھێزێن پێشمەرگەیێن کوردستانێ ل شەرێ تەرۆریستان و شەرێ بەرەڤانییا ل کەرامەت و ئاخا نشتمان کر و راگھاند، ئەم ھەموو قەرزدارێ پێشمەرگەنە، ژبەرکو پێشمەرگەی ھەموو ھەڤکێشە گوھەراندن و کوردستانێ پاراست.
بارزانی تەکەز کر کو پدک د دەمەکێ ده ژ دایک بوو کو گەلێ مە د بێھێڤییەکە مەزن ده بوو، پدک بوو ھێڤیا گەل و ژ وێ رۆژێ ڤە، په‌ده‌كه خوەدی ئارمانجەکی سێتراتیژیە، ھیچ پاشڤەکێشیەک ژی ژ وێ ئارمانجا ستراتیژیێ ناکین، ژ بۆ وێ یەکێ پدک ھەردەم ژبۆ پاراستن و بەختەوەری ئا گەلێ مە قوربانی دایە و تو دەمەکێ ژی ژ بەرپرسیاریێ نه‌ره‌ڤیایه.
ھەروھا بارزانی راگھاند کو ئەو دو سەرکەتنێن پدک ل ھلبژارتنێن دەرباسبوویی دە ل سەر ئاستا ئیراقێ و کوردستانێ ب دەست ڤە ئانین، پاداشتا گەلێ کوردستانێ ئا ژ بۆ ھەلوەستێن نەگوھەر و ستراتیژیێن پدک و بەرەڤانی ئا مە ل کوردستانێ بوو.
ھەر ل ڤێ جڤینێ دە بارزانی بالکشاند ل سەر رەوشا ژیانا کادیرێن پدک و وان دژواریێن کو روو ب روویێ وان دبێ و ب تێرو و تژە بەھسا وان ھەنگاڤان کر کو دبنە سەدەما بەرەڤ پێشده برنا کاروبارێن پدک و باشترکرنا ژیانا کادیران.
د دەربارێ تێكلیێن ھەولێر و بەخدایێ و رەوشا ناڤچەیێن کوردستانی ئێن دەرڤەی ئیدارەیا ھەرێما کوردستانێ، سەرۆک بارزانی بالکشاند ل سەر وێ یەکێ کو نھا گفتوگۆ و دانوستاندن ھەیە و ھەنگاڤێن باش چوونە پێش و ھێڤی دکین ھەموو کێشە ب دیالۆگێ وه‌رن چارەسەر کرن، ب تایبەتی کێشەیا ناڤچەیێن کوردستانی ئێن دەرڤەی ئیدارەیا ھەرێما کوردستانێ.
