تێ چاڤه‌رێ كرن، وه‌زیرێ ده‌رڤه ئێ كارێن رووسیا ئا فه‌ده‌رال، د دەستپێکا مەھا ئۆكتۆبه‌رێ ده، سەردانا ئیراقێ و ھەرێما کوردستانێ بكه و ل گه‌ل رایه‌دارێن هه‌ولێر و به‌خدایێ هه‌ڤدیتنان پێكبینه.
جیگرێ وەزیرێ كارێن دەرڤە ئێ رووسیایێ، میخایل بۆگدانۆف راگھاند، د دەستپێکا مه‌ها داهاتی ئۆكتۆبه‌رێ ئانكو جۆتمەھا ئیسال دە، سێرگی لاڤرۆڤ، وێ سەردانا بەخدا ئا پایته‌ختا ئیراقێ بكه و ل گه‌ل هه‌ڤتایێ خوه و مه‌زنه به‌رپرسێن هكوومه‌تا ئیراقێ بجڤه.
هه‌ر وەها دیار كر، پشترە ژی، وه‌زیرێ كارێن ده‌رڤه ئێ رووسیایێ وێ سەردانا ھەولێرا پایتەختا ھەرێما باشوورێ کوردستانێ بکە و ل گه‌ل مه‌زنه به‌رپرسێن هه‌رێمێ ژی چه‌ندین هه‌ڤدیتنان پێكبینه.
بۆگدانۆڤ ھەروھا دا خوه‌یا كرن، د سەردانا خوە ئا ژبۆ ھەولێرێ دە، لاڤرۆڤ وێ ل گەل سەرۆکێ ھەرێما کوردستانێ، نێچیرڤان بارزانی و سەرۆک وەزیر، مەسروور بارزانی ھەدڤیتنان پێكبینە.
ئەڤ سه‌ردانا لاڤرۆڤ دبه یا یه‌كه‌مین ژبۆ هه‌رێما كوردستانێ، ل ده‌ما دەستبکاربوونا نێچیرڤان بارزانی وەکە سەرۆکێ ھەرێما کوردستانێ، لاڤرۆڤ ب رێیا بالیۆزێ وەلاتێ خوه ئێ ل بەخدایێ، ماکسیم ماکسمۆڤ پیرۆزباھی ل وی کربوو.
هه‌رێما كوردستانێ و رووسیا فه‌ده‌رال، ل ڤان سالێن داویێ، تێكلیێن خوه هه‌ری خورت كرنه تایبه‌ت د وارێ ئه‌نه‌رژیێ ده، كو لهەڤهاتنه‌كه مه‌زن ل گه‌ل كۆمپانیا یا رۆسنه‌فتێ ئا هكوومه‌تا رووسیایێ ئیمزا كرییه و ل گۆری وێ، رووسیا وێ نه‌فتێ ل هه‌رێما كوردستانێ ده‌رخه.
سه‌رۆكێ هه‌رێما كوردستانێ نێچیرڤان بارزانی و سێرگی لاڤرۆڤ د دەما برێڤەچوونا کۆربەندا ئابووری ئا جیھانی دە، ل سانت پەتەرسبۆرگا رووسیایێ، ب ھەڤرە جڤیابوون و تەکەزی ل سەر پێشخستنا تێكلیێن دوئالی کربوون.
