سەرۆککۆمارێ ترکیێ، ل سەر زیندانکرنا هه‌ڤسه‌رۆكێ به‌رێ ئێ پارتا ده‌مۆكراتیك ئا گه‌لان هه‌ده‌پێ داخویانی دا و گۆت: “ئه‌مێ دۆزا سه‌لاهه‌ددین ده‌میرتاش تا داویێ بشۆپینن و وی نا به‌ردن”.
رەجەب ته‌یب ئەردۆگان، ئیرۆ د مه‌راسیما پێشانگه‌هه‌كه ته‌كنۆلۆژیێ ده، د ده‌ربارا دۆزا سه‌لاهه‌ددین ده‌میرتاش، هه‌ڤسه‌رۆكێ به‌رێ ئێ هه‌ده‌پێ ده، هنه‌ك داخویانیێن وی هه‌بوون و گۆت: “گەر ل ڤێ ده‌وله‌تێ لێگەرین ل قاتلا بێ کرن، نه‌پێویستە ل ناڤونیشانێن وان بگەرن، خوه گه‌ر پارله‌مه‌نته‌ر بن، گەل وان کەسێن بانگ ل هه‌موه‌لاتیێن ئامه‌دێ كری وه‌رن كۆلانان ناسدكه‌ن كو ل وێ ده‌مێ ئه‌و كار بوو سەدەما مرنا 53 کەسان”.
ئه‌ردۆگان دبێژه: “ئەمێ وی کاری ھەتا داویێ ب شۆپینن، ئەم وانا نا بەردن، ھەگەرئەم بەردن، شەھیدێن مە وێ ھەسابێ ژمه بپرسن كانێ چما ئه‌ڤ به‌ردان چێبوو”.
ئەردۆگان ل سەر سەرەدانا ئەمەریکا ژی وھا ئاخڤی: “ئه‌مێ د ده‌ربارا پێشهاتێن ل ده‌وله‌تا مه و ناڤچه‌یێ و جیهانێ، ب نوونه‌رێن وه‌لاتان ره ل نیۆیۆركێ بجڤن، هه‌لبه‌ت هنه‌ك گه‌ف هه‌نه و ئه‌مێ وان گه‌فان كو ب فكرا مه باندۆرێ دكه سه‌ر ژیانا گه‌لێ تركیێ، ب ئه‌شكه‌ره دگه‌ل ئه‌مه‌ریكا و نوونه‌رێن وه‌لاتان نیقاش بكن”.
سه‌رۆك كۆمارێ تركیێ، ئیرۆ ژبۆ ته‌ڤلیبوونا جڤینا 74ان ئا نه‌ته‌وێن یه‌كبوویی وێ سه‌ردانا ئه‌مه‌ریكایێ بكه، ئه‌ڤ سه‌ردان ژی وێ 4 رۆژان بدۆمه.
هكوومه‌تا تركیێ ل سه‌ر پرسه‌كه گرێدای پارتا كاركه‌رێن كوردستانێ ل سالا 2016ان ده‌سته‌سه‌ركر، داخوازا سزایێ 142 سالێن زیندانكرنێ ژبۆ دهات كرن، لێ هه‌ده‌په دبێژه: ئه‌ڤ ده‌سته‌سه‌ركرن سیاسی یه.
هه‌موه‌ختا ده‌سته‌سه‌ركرنا سه‌لاهه‌ددین ده‌میرتاش، هكوومه‌تا تركیێ ب سه‌رۆكتیا پارتا داد و گه‌شه‌پێدانێ ئاكه‌پێ، پێتری 82 شاره‌دار و به‌رپرسێن پارتا ده‌مۆكراتیك ئا گه‌لان هه‌ده‌پێ ده‌سته‌سه‌ركرنه، هه‌ر وها نێزی 5 هزار ئالیگرێن وێ پارتێ، سووچا په‌كه‌كێ ژی ژبۆ پرانیا وان داییه.
ده‌میرتاش د هلبژارتنێن داوی ئێن سه‌رۆكتیا تركیێ ده، ژ زیندانێ خوه نامزه‌د كربوو، ل وێ ده‌مێ راگهاند؛ نامزه‌دبوونا وی ژ زیندانێ ژبۆ سه‌رۆكتیا تركیێ، كاره‌كێ هه‌ر ب شه‌رمه‌زاریه ژبۆ هكوومه‌تا ئاكه‌پێ.
ل هه‌فتیا بووری ده ژی، دادگه‌ها مافێن مرۆڤان ل سترازبۆرگێ ل سه‌ر دۆزا ده‌میرتاش روونشتنه‌ك ل دارخست، هه‌ڤسه‌رۆكێ هه‌ده‌پێ سه‌زای ته‌مه‌لی به‌رهه‌ڤی روونشتنێ بوو، هه‌ژماره‌كه پارێزه‌ران ژی به‌رگری ژ ده‌میرتاش كرن.
سه‌لاهه‌ددین ده‌میرتاش ل 4 چریا یه‌كان ئا سالا 2016ان دگه‌ل فیگه‌ن یۆكسه‌داخێ هه‌ڤسه‌رۆكا وی ده‌می ئا هه‌ده‌پێ دگه‌ل 15 پارله‌مه‌نته‌رێن هه‌ده‌پێ هاتن زیندان كرن، هه‌یا نها ژی 9 پارله‌مه‌نته‌رێ د ناڤ زیندانێن تركیێ ده‌نه، سووچا وان ژی بانگه‌شه‌كرنه ژبۆ پارتا كاركه‌رێن كوردستانێ.
