یه‌كینه‌یێن پاراستنا گه‌ل یه‌په‌گێ، ئیرۆ رۆژا یه‌كشه‌می، ئالایێ خوه ل ناڤچه‌یا گرێ سپی ئا رۆژئاڤا كوردستانێ داخست و ئالایه‌كه دن كو ئێ ئه‌نجوومه‌نا له‌شكری یه، دالقاند.
ل گۆری هنه‌ك دیمه‌نان كو ل ناڤه‌ندا باژارێ گرێ سپی ئێ رۆژئاڤا كوردستانێ هاتنه بده‌ستخستن، شه‌رڤانێن یه‌كینه‌یێن پاراستنا گه‌ل یه‌په‌گێ، ئالایا خوه داخست و د شوونێ ده، ئالایا ئه‌نجوومه‌نا له‌شكری ئا گرێدای خوه گوهه‌رت.
د دیمەنان ده، تێ دیتن کو شه‌رڤانێن یه‌په‌گێ ل شوونا ئالایا مەزنا کو بەرێ ل ناڤەندا باژێر دالقاندبوو نھا ئالایا ئه‌نجوومه‌نا له‌شكری دالقاند.
ئه‌ڤ كارێ شه‌رڤانێن یه‌په‌گێ هه‌موه‌ختا برێڤه‌چوونا گه‌رێن هه‌ڤبه‌ش ئێن ئارته‌شێن ئه‌مه‌ریكایێ و تركیێ یه كو ل نێڤبه‌را ناڤچه‌یێن سه‌رێ كانیێ و گرێ سپیێ د دۆمن.
ویلایه‌تێن یه‌كگرتی ئێن ئه‌مه‌ریكایێ، ل 22 تیرمه‌ها سالا 2017ان ل سه‌ر زارێ فه‌رماندارێ هێزێن تایبه‌ت جه‌نه‌رال رایمۆند تۆماس، ئاڤاكرنا هێزێن سووریا ئا ده‌مۆكراتیك راگه‌هاند، ژ وێ ده‌مێ ژی ئالیكاریا له‌شكری ئێن ئه‌مه‌ریكایێ ژ بۆ وێ هێزێ د دۆمه.
تركیێ هه‌ر چ گاڤه و هه‌لوه‌سته‌كه نه‌رازیبوونێ ژ وێ ئالیكاریا ئه‌مه‌ریكایێ ژ بۆ هه‌سه‌دێ ئاڤێتیه، لێ هینا نها تو ئه‌نجامه‌ك ژ وێ نه‌رازیبوونا تركیێ نه ده‌ركه‌تیه هۆلێ.
د نها ده و دگه‌ل دۆماندنا هه‌ره‌كه‌ت و گه‌رێن هه‌ڤبه‌ش ئێن ئاڤاكرنا هه‌رێما ئه‌وله‌هیێ، ئه‌نقه‌ره دخوازه رۆژهه‌لاتا فراتێ ب یه‌ك جار ژ هه‌سه‌دێ وه‌ره ڤالا كرن.
