ئیرۆ 25 ئیلۆنێ یه كو 2 سال ب سه‌ر بریارا دیرۆكی ئا گه‌لێ كوردستانێ ده ده‌رباس دبن، وه‌ختا كو ل 25 ئیلۆنا سالا 2017ان ده، گه‌لێ باشوورێ كوردستانێ، ب جوداتیێن خوه ئێن نه‌ته‌وه‌ئی، ئۆلی و سیاسی ده‌نگێ خوه كری، د وێ رۆژێ ده، وان سه‌رخوه‌بوون خوه‌ست، ته‌ڤ جیهانێ ئه‌ڤ گازیه بهیست.
ره‌فه‌رنداوما سه‌رخوه‌بوونا كوردستانێ كو ل 25 ئیلۆنا سالا 2017ان ده هات كرن، ئیرۆ 2 سال ب سه‌ر ده ده‌رباس دبن، 25 ئیلۆنێ نها وه‌كه وه‌ستگه‌هه‌كه گه‌ش و هه‌ری روهن د د یرۆكا رزگاریخوازی ئا گه‌لێ كوردستانێ ده تێ ناسكرن، سه‌ده‌ما وێ یه‌كێ ژبۆ هه‌لوه‌ستا یه‌كگرتی ئا گه‌لێ كورده، ب ته‌ڤی جوداتی و ئۆل و نه‌ته‌وه ئێن خوه ڤه.
“ره‌فه‌راندوما سه‌رخوه‌بوونا كوردستانی، ره‌فه‌راندوما دیاركرنا مافێ چاره‌نڤیسێ گه‌لێ كورد، ره‌فه‌راندوما جودابوونا ژ ئیراقێ”، وه‌كه ناڤ ل وێ بوویه‌را دیرۆكی هاتن كرن، مه‌سعوود بارزانی سه‌رۆكێ پارتا ده‌مۆكرات ئا كوردستانێ سه‌ركێشیا كاروانێ ره‌فه‌راندۆمی كر ل وێ ده‌مێ ئه‌و سه‌رۆكێ هه‌رێما باشوورێ كوردستانێ بوو.
بارزانی پشتی چه‌ندین جڤینێن ل گه‌ل ئالیێن سیاسی ئێن كوردستانی و پێكئانینا كۆمیته و ئه‌نجوومه‌نا ره‌فه‌راندومێ بریار دان، مافێ چاره‌نڤیسی ببه كریار و دڤێ گه‌ل گۆتنا خوه بكه.
سیاسه‌تا هكوومه‌تا فه‌ده‌رالا ئیراقێ ئا وێ ده‌مێ كو هه‌یده‌ر ئه‌بادی سه‌رۆكتیا وێ دكر، سه‌ده‌ما سه‌ره‌كه و هه‌ری دیار ئا ره‌فه‌راندومێ بوو، هه‌ر وه‌ك سه‌رۆكێ پارتا ده‌مۆكراتا كوردستانێ ئه‌شكه‌ره كری كو به‌خدا ناخوازیت كورد و ئه‌ره‌ب وه‌كه برا د یه‌ك ولاتی ده ژیانێ بكن، به‌خدا ته‌ڤی ماف و هقۆقێن گه‌لێ كورد بنپێكرنه، پارێ وان قۆت كرنه، سیاسه‌تا پشتگوهخستنێ په‌یره‌و دكه، ل همبه‌ری ڤێ كوردستان چ ژ به‌خدایێ دخوازه.
بارزانی وها ئاخڤی بوو: ئه‌مێ ب رایه‌دارێن هكوومه‌تا فه‌ده‌رال ره نیقاشێ دكن كو ده‌ستوورا ئیراقێ بنگه‌ها چاره‌سه‌ریا پرسگرێكێن هه‌رێما كوردستانێ و ئیراقێ به، لێ به‌لێ به‌خدا رازی نابه، هكوومه‌تا فه‌ده‌رال ب سیاسه‌تا خوه ئا ته‌كئالی، مافێن گه‌لێ كورد ئێن كو ب زه‌لالی د ده‌ستوورا ئیراقێ ده هاتنه رێزكرن، بنپێكرنه و وێ ئه‌ڤ سیاسه‌ت ل همبه‌ری هه‌رێمێ د دۆماند.
ره‌فه‌راندوم بریارا گه‌ل بوو، وه‌ختا ژ ب ده‌ستخستنا مافان ب دیالۆگا ل گه‌ل به‌خدایێ بێ هێڤی مای، گه‌ل ژی ل 25 ئیلۆنا 2017ان ده‌نگێ خوه كر، وان سه‌رخوه‌بوون ب چاره‌سه‌ریا هه‌ری گونجای دیت.
باندۆرا ره‌فه‌راندومێ ل سه‌ر پێگه‌ها هه‌رێما كوردستانێ د قادا هوندر و ئا ناڤده‌وله‌تی ده، پر مه‌زن بوو، وه‌كه سه‌رۆك بارزانی دبێژه: ره‌فه‌راندۆمێ یه‌قین چێكر كو گه‌لێ كورد هه‌ڤاله‌كێ وی ژبلی چیایی تونه‌یه، ته‌ڤی هه‌ڤپه‌یمان و دۆستێن كوردستانێ پاشده چوون، وان ترس ژ بریارا گه‌ل هه‌بوو، وان فام دكر گه‌لێ كورد وێ چ بخوازه، وان فام دكر كوردستان ل دووڤ بانگا سه‌ركردێ خوه وێ ب رح و جان بازده‌نه سه‌ر سندۆقێن هلبژارتنێ ژ بۆ كو گۆتنا خوه ببێژن.
ره‌فه‌راندۆم ل 25 ئیلۆنێ هات كرن، 92.7% یا گه‌لێ باشوورێ كوردستانێ ده‌نگێ خوه ب به‌لێ ژبۆ ده‌وله‌تا كوردستانێ و جودابوونا ژ ئیراقێ كر، ئه‌ڤ ئه‌نجام پرانیا هه‌ر مه‌زن ئا گه‌ل بوو.
ولاتێن دژبه‌رێ كوردستانێ و هه‌روها هنه‌ك ژ ولاتێن دۆست وهه‌ڤپه‌یمان، ده‌ست ب دانینا دۆرپێچان ل سه‌ر هه‌رێما باشوور كرن، هكوومه‌تا ناڤه‌ند ئا ئیراقێ هه‌ر په‌یوه‌ندی ب هه‌ولێرێ ره قوت كر و وان خوه‌ست ئه‌نجاما ره‌فه‌راندومی وه‌ره ره‌شكرن، وه‌ره ئیمها كرن، لێ به‌لێ سه‌ركرداتیا كوردستانێ ژ هه‌لوه‌ستا خوه پاش ده نه‌زڤری.
ئیرۆ 2 سال ب سه‌ر وێ بوویه‌را دیرۆكی ئا گه‌ل ده‌رباس دبه، هه‌ر چه‌ند كو ئه‌نجاما ره‌فه‌راندومی ل ڤێ قۆناخێ وه‌كه كاره‌ته‌كه هه‌ری بهێزه د ده‌ست كوردستانێ ده یه، لێ به‌لێ ئه‌و راستی سه‌لماند كو ئێدی گه‌لێ كورد زێده‌تر سته‌م و زۆرداریێ قه‌بوول ناكه.
ره‌فه‌راندۆمێ گه‌ل ل بن یه‌ك ئامانج و مه‌به‌ستێ ل هه‌ڤ كۆم كر، ئامانجا دیاركرنا مافێ چاره‌نڤیسی ئه‌و ئامانجه بوو، ئه‌وا كو ژ ئه‌زه‌ل گه‌لێ كورد ته‌كۆشینا خوه ژبۆ ده‌ستپێكرنه.
