ژناڤبرنا 2 ترومبێلێن په‌كه‌كێ ل گوندێن ئۆزمانا و دۆبانكێ

بالەفرێن جەنگی ئەرەبەیەکە پەکەکێ ل سینۆرێ ناڤچەیا مانگێشکێ ژناڤبر

ل دۆریانا گوندێ ئۆزمانا و ل سه‌ر رێكا گوندێ دۆبانكێ بۆمب باران هاته‌ كرن

فرۆكێن له‌شكه‌رێ توركیا، ئه‌ڤرۆ ئێڤاری هێرش كرینه‌ سه‌ر 2 ترومبێلێن پارتا كاركه‌رێن كوردستانێ و زیانێن گیانی گه‌هاندن چه‌كدارێن په‌كه‌كێ.

 ل دویڤ ئاگاھیێن تایبەت کو بدەست دارکا مازی كه‌فتینه‌، ئێڤارا ئه‌ڤرۆ رۆژا سێشەمبیێ، فرۆكێن له‌شكه‌رێ توركیا، 2 ترومبێلێن پارتا کارکەرێن کوردستانێ بۆمب باران كرن و زیانێن گیانی گه‌هشتنه‌ چه‌كدارێن په‌كه‌كێ.

ترومبێلا ئێكێ ل ده‌مژمێرێ 2:00 پشتی نیڤرۆ ل نێزیكی دۆریانا گوندێ ئۆزمانا یێ سنۆرێ ناحیا مانگێشکێ بوویه‌ ئامانجا فرۆكێن توركیا و 2 چه‌كدار تێدا هاتنه‌ كوشتن، ترومبێل هاته‌ ژناڤبرن.

دیسان ترومبێلا دوی فرۆكێن توركیا ل ده‌مژمێر 3:20 ئێڤارێ ل سه‌ر رێكا گوندێ هارینا و دۆبانكێ ل سنۆرێ ناحیا مانگێشكێ بۆمب باران كریه‌، لێ نه‌خویایه‌ چه‌ند چه‌كدارێن په‌كه‌كێ تێدابوون.

ل رۆژێن بووری فرۆكێن جه‌نگی یێن توركیا ترومبێله‌كا پەکەکێ ل گەلیێ کانی مازێ یێ سینۆرێ دھۆکێ کربوو ئامانج و زیانێن گیانی گه‌هشتنه‌ په‌كه‌كێ، ھەروھا ولاتیەکێ ده‌ڤه‌رێ شەھید بوو.

پارتا کارکەرێن کوردستانێ پەکەکێ ژ بۆ کو خوه‌ ژ هێرشێن فرۆكێن توركیا ب پارێزیت، هاتن و چوونا خوه‌ ب ئه‌نقه‌ست د ناڤ رێكێن گوندان را دكه‌ت، خه‌لكێ ده‌ڤه‌رێ ژ ڤان ره‌فتارێن په‌كه‌كێ نه‌رازیه‌ و ئه‌وان داخواز كریه‌، په‌كه‌كه‌ نه‌هێنه‌ ده‌ڤه‌رێن وان داكو دویری جه‌نگێ بمینن.

هه‌ژی ب بیرئینانێ یه‌، ل دویڤ داخویانیێن فەرمی یێن حکوومەتا هه‌رێما کوردستانێ، ژبه‌ر هێرشێن توركیا ل سەر پەکەکێ ل ناڤ سنۆرێ ھەرێما كوردستانێ، د ئیسال دا ب دەھان سڤیل بوونە قوربانی.