بیرمه‌ندێ مه‌زنێ كورد عزه‌دین مسته‌فا كۆچا داویێ كر

بیرمه‌ندێ مه‌زنێ كورد عزه‌دین مسته‌فا كۆچا داویێ كر

پرۆفیسۆر، دیرۆك نڤیس و بیرمه‌ندێ مه‌زنێ كورد عزه‌دین مسته‌فا، ئیرۆ رۆژا پێنجشه‌مب ل باژارێ سلێمانی كۆچا داویێ كر.

ئیرۆ ل باژارێ سلێمانیێ، بیرمه‌ندێ مه‌زنێ گه‌لێ كورد، عزه‌دین مسته‌فا ره‌سوول د ته‌مه‌نا 85 سالان دا كۆچا داویێ كر.

بیرمند و رۆناكبیرێ كورد عزه‌دین مسته‌فا ره‌سوول، ل سالا 1934 ل سلێمانیێ هاتیه‌ دونیایێ، خوه‌ندنا ده‌ستپێكی ل جه‌م بابێ خوه‌ ب داوی كریه‌، ل سالا 1952 و ب سه‌ده‌ما به‌شداریا وی د شۆرشێ دا هات زیندان كرن، ل سالا 1956 چوویه‌ سووریێ و ل شامێ كۆلیژا ئادابێ خوه‌ند.

عزه‌دین مسته‌فا پشتی شۆرشا 14 تیرمه‌ها سالا 1958 ڤه‌گه‌ری ئیراقێ و خوه‌ندنا خوه‌ ل زانكۆیا به‌غدایێ ته‌مام كر، ل سالا 1960 دچه‌ یه‌كیتیا سۆڤیه‌ت ژبۆ خوه‌ندنا بلند و باوه‌رناما كاندیدا ژ په‌یمانگه‌ها باكۆ یا رۆناكبیری ب ده‌ستخست.

مژارا خوه‌ندنا وی یا دكتۆریێ (كه‌توار د ئه‌ده‌با كوردی دا) ، پشتی ڤێ و ل سالا 1965 ڤه‌گه‌ری كوردستانێ و ته‌ڤلی شۆرشا ئیلۆنێ بوو و دبه‌ پێشمه‌رگه‌ ژ پارتا شیۆعی.

عزه‌دین مسته‌فا، ل سالا 1947 ده‌ست ب خه‌باتا خوه‌ یا سیاسی ل ناڤ رێزێن پارتا ده‌مۆكرات یا كوردستانێ كر، لێ ل سالا 1949 ته‌ڤلی رێزێن پارتا شیۆعی دبه‌ كو تا نها ئه‌ندامێ وێ پارتێ یه‌.

عزه‌دین مسته‌فا، ده‌ما ساله‌كێ ل باره‌گه‌ها سه‌ره‌كی یا رێبه‌رێ كورد مه‌لا مسته‌فا بارزانی دمینه‌، ب سه‌ده‌ما داكۆكیا مه‌لا مسته‌فا بارزانی، به‌شا كوردی ل زانكۆیا به‌غدایێ دامه‌زراند، ل سالا 1979 جاره‌كا دن ڤه‌گه‌ری مۆسكۆیێ و ل وێرێ درێژی ب خوه‌ندنا خوه‌ یا ئه‌كادیمی كر.

ل سالا 1992 و د خۆلا یه‌كه‌مین دا، عزه‌دین مسته‌فا ره‌سوول دبه‌ ئه‌ندامێ پارله‌منێ كوردستانێ.

بیرمه‌ند عزه‌دین مسته‌فا ژیانا خوه‌ ب لێكۆلینێن مژارێن دیرۆك و ئه‌ده‌با كوردی دا و هه‌روه‌ها دیرۆك نڤیساندنێ ده‌رباز كر، وی پتری 80 كتێبان ژ چیرۆك، شیعر و لێكۆلینێن ئه‌ده‌بی هه‌نه‌، خزمه‌ته‌كا مه‌زن ل زانكۆیێن به‌غدا، سلێمانی و سه‌لاحه‌ددین كریه‌.

هه‌روه‌ها وه‌كه‌ وه‌رگێره‌كێ هه‌ری به‌رز دهات نرخاندن و كارێن وی د مه‌دیا كوردی و ئه‌ره‌بی و رووسیێ ده‌ پڕ بوون.