پێشێلكرنا لهه‌ڤهاتنا دهۆكێ ژ ئالیێ په‌یه‌دێ ڤه سه‌متا ته‌كۆشینا رۆژئاڤا به‌ر ب ئاقاره‌كێ نه‌دیار بر
ئا رووهن و ئەشکەرە یە کو هەر دگەل تێکچوونا رەوشا سووریێ، مه‌سعوود بارزانی رێبه‌رێ ملله‌تێ كورد و سەرۆکێ پارتا دەمۆکرات ئا کوردستانێ کو د وی دەمی دە سەرۆکێ هەرێما باشووری کوردستانی بوو، هەموو هەول و تەکۆشینەکە خوە کر ژ بۆ کو کوردێن رۆژئاڤا، د بن یه‌ك سەیوان دە بەرهەڤ بکەت هه‌یا کو مفا ئا کوردان ژ وان گوهه‌رینێن وێ ل سووریێ وەرن ئه‌نجامدایین هەبە و جاردن کورد نه‌به سۆتەمەنیا شەر.
مه‌سعوود بارزانی، هەولین جددی دان کو کوردێن رۆژئاڤا ل هەڤ کۆم بکە و رێ نه‌ده وەکه باشوور کورد ل سەر چەندین ئالیێن جودا پارڤە ببن و ئەڤ یەک ببە جیێ دلخوەشی و مفا ژ بۆ دەولەتێن داگیرکار، ژ بۆ ڤێ مەبەستێ هەر د زوو دە پەیوەندی ب ئالیێن سیاسی ئێن کورد ل رۆژئاڤا کوردستانێ دکە، لێ بەلێ ب مخابنی ئەڤ هەولا مه‌سعوود بارزانی سەر نەگرت، ژبەرکو هنەک ئالیێن کورد ل رۆژئاڤا ئەو رەوشا هەیی ل ور ب ده‌رفه‌ت زانی و ل شوونا هەولدان ژ بۆ لێک نێزیک کرنا ئالیێن کوردی کو بارزانی هەولەکە هەری زیدە ژبوو د دا، هه‌یا كو جاردن وەکە ئێشەکە کەڤن کو د ناڤ کوردان دە هەیە هەولا دژاتی کرنا هەڤدو دا ب تایبەتی ئالییه‌كه سیاسی کو وەکە هەرجار ب باشتر د دیت ل شوونا نێزی تەڤگەر و بزاڤێن ئازادی خواز ئێن کورد بە، خوه نێزی رەژیما سووریێ كر و شەرێ ب وەکالەت ژ بۆ وێ رەژیمێ ل ناڤچەیێن کوردی ئەنجام دا و تو بەهایەک ب هەولێن بارزانی نەدا.
هه‌رده‌ما ره‌وش ل رۆژئاڤا ده‌رباسی خه‌ته‌رێ بووی بارزانی لێ خوه‌دی ده‌ركه‌تیه
پشتی کو رەوشا رۆژئاڤا کوردستانێ دەرباسی قۆناغەکە هەری خەتەر بووی و دائیشێ ب رەنگەکە هۆڤانە ئێرشی گەلی کورد ل رۆژئاڤا كر و رووبەرەکە مەزن ژ خاکا کوردستانا رۆژئاڤا داگیر كر، رەوش پر خەتەر كه‌ت ب تایبەتی ل ئالیێ کۆبانێ، بارزانی جارەکە دن دلسۆزی ئا خوه ئا ژ بۆ کوردان و هەرچار پارچەیێن کوردستانێ دیار کر و ب رێیا پەیوەندیێن خوه ئێن سیاسی مەزنترین دژمنێ گەلی کورد “ترکیا” رازی كر كو رێ ب باشوورێ کوردستانی بدە، ژ بۆ ئالیکاریا برایێن خوە ئێن کورد ل کۆبانێ هێزەکە پێشمەرگەهێن کوردستانی ل سەر خاكا ترکیێ دە دەرباسی رۆژئاڤایێ ولات و باژارێ کۆبانێ ببە، ئەڤ یەکەم جار بوو د دیرۆکێ دە، ب ئاوایه‌كی فەرمی پێشمەرگەهێن کوردستانێ وەکە هێزەکە نیزامی ئا کورد ب چەکێن سڤک و گران ڤە ل سەر ئاخا ترکیێ دە دەرباسی پارچەیەک دن ئا کوردستانێ ببن ژ بۆ ئالیکاریا برایێن خوە هەلبەت گەر ب هەولێن جددی ئێن بارزانی نه‌بایە ب تو ئاوایەکی ئەڤ یەک پێک نەدهات.
ل رۆژا 28/10/2014 ان ب فەرمانا بارزانی یەکەم گەرا پێشمەرگەهان ل باشوور بەرەڤ رۆژئاڤا ب رێ کەتن، و مل ب ملێ شەرڤانان شیان بالانسا هێزێ کو ل وی دەمی دە د بەرژەوەندا چەتەیێن دائیشێ دە بوو ب گوهەرن و کۆبانی ژ دەست ڤان چەتەیان رزگار بکن، پێشمەرگە ب چار گەران دەرباسی رۆژئاڤا بوون و ل داویێ کارین هەر هەموو كۆبانێ رزگار بکن، پشتی رزگارکرنا كۆبانێ هەر ل سەر فەرمانا بارزانی هێزا پێشمەرگەهێن کوردستانی بەرەڤ باشوور ڤەگەران و ب تو ئاوایەکی وەکە هێزێن دن نەگو ژبەرکو مە ئەڤ دەر پاراست و رزگار کر ئەمی ل ڤر بمینین!
په‌یه‌دێ پێشده‌ستیێن بارزانی ره‌تكرن و بریار ژ قه‌ندیلێ وه‌ردگرت
سەرەرایی هەموو ئالیکاریێن بارزانی ژ بۆ گەلێ رۆژئاڤا، لێ بەلێ پارتا یه‌كێتیا ده‌مۆكراتیك په‌یه‌دێ کو بریار ل قەندیلی وەردگرت، تو هێزەکە سیاسی و سەربازی ئا نێزی بارزانی ل رۆژئاڤا قه‌بوول نەکر و هەر هەموو ب رەنگەکە دوور ژ ئەخلاقی ل رۆژئاڤا دەرکرن، لێ دیسان بارزانی هەول دا ڤان هێزان ل هەڤ بجڤینە و پێکهاتنەکە سیاسی د ناڤبەرا ئالیێن سیاسی ئێن کورد د بەرژەوەندا گەلێ کورد دە ئیمزە بکە، پشتی کو لسەر داخوازا بارزانی ئالیێن سیاسی ئێن کورد ل رۆژئاڤا (تەڤدەم و ئەنجوومەنا نشتیمانی ئا کورد) ل دهۆکێ کۆم بوو پاش 9 رۆژان ب سەرپەرشتیا بارزانی و ل رۆژا 22/10/2014 كارین رێككه‌تنه‌كه سیاسی ئیمزە بکن، هەر وها بارزانی راگهاند کو ئەو وەکە سەرۆکێ هەرێما باشوورێ کوردستانی وێ هەر ئالیکاریەکە پێویست ژ رۆژئاڤا رە بشینە، هەرچەند د کۆنگرەیەکە رۆژنامەڤانی دە پشتی لهەڤهاتنا دهۆکی ئالدار خەلیل نوونەرێ ته‌ڤده‌مێ راگهاند ژبەر رەوشا ناڤچەیێ ب گشتی و هەرەشەیێن چەتەیێن دائیشێ ب تایبەتی مە ب فەر زانی ل سەر بانگەوازا سەرۆک بارزانی ڤێ لهەڤهاتنێ ئیمزه بکین، لی بەلی دیسان وەکە هەرجار تەڤدەم ل سۆزێن خوە خوەدی ده‌رنه‌كه‌ت و ب ئاوایه‌كه هەری خراب دەست ب دەرکرنا سەرکردێن ئەنەکەسێ ل رۆژئاڤا کر، هەروها رێ ب دەرباس بوونا پێشمەرگەهێن رۆژ ژبۆ رۆژئاڤا نەدا و تو خالەکە لهەڤهاتنا دهۆک بجی نەکر.
پاش ئالۆزبوونا رەوشا رۆژئاڤا دیسان بارزانی دلسۆزیا خوە ژبو گەلێ کورد ئێ رۆژئاڤا دیار کر و ب فەرمانا بارزانی دەریێن سینۆر ئێن باشوور ل هەمبەر هەژمارەکە هەری زیدە ئا کوردێن رۆژئاڤا هات ڤەکرن، هەر دیسان بارزانی فەرمان ل دەزگەهێ خیرخوازی ئێ بارزانی کر کو ب زووترین دەم ئالیکاریان ژ گەلێ رۆژئاڤا رە بشینن، ژبەرکو ئەو د رەوشەکە هەری خراب دا نە، ئەڤ بوو کو ل سەر فەرمانا بارزانی ڤێ سازیێ چەندین جاران ئالیکاریا گەلێ رۆژئاڤا کر ب تایبەتی گەلێ كۆبانێ کو د رەوشەکە هەری نەباش دە بوون، ئەڤ ئالیکاریە پیک هاتبوون ژ هەزاران تونێن خارنی و هەزاران لەترێ گازا سپی و دەرمان و کۆن و پیداویستیێن دن، دیسان بارزانی چەندین جاران کۆمەلگەها ناڤدەولەتی رەخنە باران و شەرمەزار کر ژبەر گرنگی نه‌دان ب گەلی کورد ئێ رۆژئاڤا کوردستانێ.
بارزانی و هه‌ولێن ناڤده‌وله‌تی ژ بۆ پاراستنا رۆژئاڤا ژ نه‌هامه‌تیێ
د نها ده ژی پاش ئالۆزبوونا رەوشا رۆژئاڤا ژ ئەگەرا بریارا ئێریشا دەولەتا فاشیست ئا ترکیێ بو سەر گەلی رۆژئاڤا ب بەهانەیا ئاڤا کرنا هه‌رێما ئه‌وله‌هیێ ژ ئالیێ ترکیێ دە، بارزانی چەندین جاران ب رایەدارێن هەری بلند ئێن ناڤ دەولەتی رە جڤیایە و پەیوەندی ب وان رە کریە کو رێ نه‌دن ترکیا ئێرشی گەلی کورد بکە و ببە ئەگەرا کوشتنا کوردان بوو میناک ل رۆژا 7/10/2019 بارزانی د هەڤدیتنەکێ دە دگەل سه‌رگی لاڤرۆڤ ل هەولێرا پایتەختا کوردستانی، بارزانی داخواز ژ لاڤرۆڤ کر کو رووسیا فەدەرال کار ژبۆ پاراستنا مافێن کوردان ل رۆژئاڤا کوردستانێ دە د نها و پاشەرۆژێ دە بکەت هەروها ل رۆژا پاش ده واتە ل 8/10/2019 پەیامەک د هەسابا خوە ئا تویتەرێ دە سەبارەت رۆژئاڤا وەشاند و تێده دیار کر ئەمێ هەموو هەولەکێ بدین ژبۆ کو گەلێ مە ل رۆژئاڤا کوردستانێ جارەکە دن ستەم و نەهامەتیێ نەبینە، دیسان وەکە بەرسڤەکێ ژ بۆ دۆنالد ترامپ ئێ سەرۆکێ ئەمەریکا کو گوتبو کوردان بەرانبەری شەری چەک و دراڤ وەرگرتنە ترامپ ره‌خنه كر و پیره گۆ كو خوینا کوردان ژ چەک و دراڤان پر ب بهادارترە.
ئەڤ هەلوەستە و ب سەدان هەلوەستێن دن ئێن مینا ڤان دبن دلۆپەکە بچوک ژ دەریا یا دلسۆزی ئا رێبەرێ گەلێ کورد ژبۆ رۆژئاڤا ولاتی.
