ئارته‌شا تركیێ و چه‌كدارێن ئۆپۆزسیۆنا سووریێ ئێن ب ناڤێ ئارته‌شا ئازاد ئا سووریێ، ئیرۆ له‌شكركێشیه‌كه هه‌ری به‌رفره‌هـ برنه ده‌ردوورا سه‌رێ كانیێ و په‌ڤچوونێن هه‌ری دژوار هه‌نه.
د رۆژا چاره‌مین ئا ئێریشا داگیركاری ئا تركیێ ده ل سه‌ر رۆژئاڤا كوردستانێ، ئیرۆ رۆژا شه‌می 12/10/2019ان، ژ سێ به‌ره‌یان ڤه، ئارته‌شا تركیێ و چه‌كدارێن ئارته‌شا ئازاد ئا سووریێ ئێریش كرنه باژاركێ سه‌رێ كانیێ، هه‌موه‌ختا وێ ئێریشا په‌ژاهی، باله‌فرێن جه‌نگی و تۆپخانه‌یێن تركیێ ژ سه‌رێ سبێ هه‌ری دژوار سه‌رێ كانیێ و ده‌ردوورا وێ ئامانج كرنه.
ناڤه‌ندا مه‌دیایی ئا هێزێن سووریایا دیمۆكراتیك د وێ ده‌ربارێ ده ئه‌شكه‌ره كر، نێزی 3 هزار له‌شكرێن و ئه‌سكه‌رێن داگیركاری ئا تركیێ و هه‌ڤپه‌یمانێن وێ، ژ ئالێ گوندێ تل حلفێ، ناڤچه‌یا پیشه‌سازی و تاخا حوورانێ ئێن سه‌رێ كانیێ، هه‌ولا ئێریش كرنێ ددن و شه‌ر و په‌ڤچوون ل وان به‌ره‌یان دژوار بوونه.
هه‌موه‌ختا ئێریشا په‌ژاهیێ ئا ل سه‌رێ كانیێ نها د دۆمه، باله‌فرێن جه‌نگی هنه‌ك هه‌ده‌فێن ناڤه‌ندا باژار ئامانج كرنه، یه‌ك ژێ نه‌خوه‌شخانه‌كه كو بریندارێن ئێریشا تركیێ تێده تێن چاره‌سه‌ر كرن.
