هه‌سه‌ده‌: میلیشیایێن تركیێ هه‌ڤرین خه‌له‌ف شه‌هید كریه‌

هه‌سه‌ده‌: میلیشیایێن تركیێ هه‌ڤرین خه‌له‌ف شه‌هید كریه‌

ئه‌میندارا گشتی ئا پارتا ئاینده‌ ئا سووریێ، هه‌ڤرین خه‌له‌ف پشتی كو نووچه‌یا ته‌رۆر كرنا وێ ژ ئالیێ دائیشێ ڤه‌ ل سه‌ر رێیا سه‌ره‌كه‌ ئا قامشلۆیێ به‌لاڤبووی، هێزێن سووریایا ده‌مۆكراتیك هۆرگلی دان.

ئێڤارا رۆژا ئه‌ینی 11/10/2019ان، هه‌ڤرین خه‌له‌ف ئه‌میندارا پارتا ئاینده‌ ئا سووریێ ل سه‌ر رێیا ناڤده‌وله‌تی ئا باژارێ قامشلۆیێ ل رۆژئاڤا كوردستانێ هات ته‌رۆر كرن، ل ده‌ستپێكێ هات راگهاندن كو هه‌ڤرین د بۆسه‌یه‌كه‌ دائیشێ ده‌ هاتیه‌ ته‌رۆر كرن، لێ به‌لێ ئه‌شكه‌ره‌ بوو كو چه‌كدارێن ئارته‌شا ئازاد ئا سووریێ هه‌ڤرین و كه‌سێن كو دگه‌ل وێ ده‌ بوون، شه‌هید كرنه‌.

هه‌سه‌دێ د به‌یانه‌كه‌ نڤیسكی ده‌ ئه‌شكه‌ر كر، هه‌ڤرین ل وه‌ختا كو نیازا وێ هه‌بوو وه‌ره‌ باژارێ قامشلۆیێ، ژ ئالێ هنه‌ك چه‌كدارێن ئارته‌شا ئازاد ئا سووریێ كو شه‌ری ژ بۆ به‌رژه‌وه‌ندا تركیێ دكن، هه‌ڤرین دگه‌ل 8 كه‌سێن دن ئێن سڤیل گوللـه‌ باران كرنه‌.

هه‌ڤرین ل سالا 1983ان ده‌ هاتیه‌ دنیایێ ل باژارێ دێركێ ئێ رۆژئاڤا كوردستانێ، دییا وێ سعاد خان پێگه‌هه‌كا هه‌ری دیار هه‌بوو و چه‌ندین جاران هه‌ڤدیتنێن وێ ب سه‌رۆكێ زیندانكری ئێ په‌كه‌كێ ئه‌بدوللا ئۆجالان ره‌ هه‌بوونه‌.

ژ ده‌ستپێبوونا شۆرشا گه‌لێ رۆژئاڤا ل 19 تیرمه‌ها سالا 2012ان، هه‌ڤرینێ به‌شداری ئا وێ د شۆرشێ ده‌ هه‌بوو، وه‌كه‌ چالاكڤانه‌ك‌ ژبۆ هۆشیاره‌كرنا گه‌نجێن رۆژئاڤا، پشتره‌ وه‌كه‌ چالاكڤانه‌كه‌ جڤاكا سڤیل ده‌ركه‌ت هۆلێ، هه‌موه‌خت و پشتی به‌رنیاسبوونا وێ، بوو برێڤه‌برا مه‌جلسا ئابووری ئا قامشلۆیێ.

پشتره‌ و ل 21 كانوونا دویه‌مین ئا سالا 2014ان و راگهاندنا رێڤه‌به‌ریا خوه‌سه‌ر، هه‌ڤرین خه‌له‌ف وه‌كه‌ جهگرا برێڤه‌برێ ده‌سته‌یا ئه‌نه‌رژیێ ل هه‌رێما جزیرێ ته‌كۆشینا خوه‌ به‌رده‌وام كر، پشتره‌ و ل سالا2018ان ده‌ست ب خه‌باتا سیاسی كر و دگه‌ل هه‌ژماره‌كا كه‌ساتیێن سووریێ ژ كورد، ئه‌ره‌ب سریانی پارتا ئاینه‌ده‌ ئاڤاكر و د یه‌كه‌مین كۆنگره‌ ده‌، وه‌كه‌ ئه‌میندارا وێ پارتێ هات ده‌ستنیشان كرن.