راده‌ستكرنا رۆژئاڤا ب رژیما سووریێ یه‌ك ژ چاره‌سه‌ری ئێن هه‌سه‌دێ یه
پارتیا یه‌كیتیا ده‌مۆكراتیك په‌یه‌ده، ب ناڤگینی ئا ولاته‌كێ زلهێز ئاماده‌كاریا ده‌ستپێكرنا نیقاشێ ب رژیما به‌شار ئه‌سه‌دی دكه، ئه‌ڤ یه‌ك هه‌موه‌ختا پشتگوهـ خستن و دووركرنا ئالیێن سیاسی ئێن رۆژئاڤا كوردستانێ یه كو ب سه‌ده‌مه‌كه سه‌ره‌كه ئا ئالۆزیێن رۆژئاڤا تێ هه‌ژمارتن.
ل گۆری چاڤكانی ئێن تایبه‌ت ئێن داركا مازیێ، به‌رپرسیارێن هێزێن سووریایا ده‌مۆكراتیك هه‌سه‌دێ كو یه‌كینه‌یێن پاراستنا گه‌ل یه‌په‌گه بالێ له‌شكری ئێ په‌یه‌دێ هێزا سه‌ره‌كه‌یه تێده، ب ناڤگینی ئا ولاته‌كێ زلهێز ل شامێ دگه‌ل به‌رپرسیارێ بلند ئێن رژیما به‌شار ئه‌سه‌دی جڤیانه.
چاڤكانی ئه‌شكه‌ره دكن، هه‌ر یه‌ك ژ به‌رپرسیارێن سازی ئێن هه‌والگیری ئا سه‌ربازی و ئاساییشێ ئێن حه‌سه‌كێ، ب باله‌فره‌كا كۆپته‌ر ئا ولاته‌كێ زلهێز چوونه دیمه‌شقا پایته‌ختا سووریایێ و ل ور نیقاشا پاراستنا باكوورا رۆژهلاتا سووریێ و رۆژئاڤا كوردستانێ ب رایه‌دارێن رژیما سووریێ كرنه.
ئه‌ڤ جڤینا هه‌ڤپارا هه‌سه‌دێ و رژیما سووریێ دوهـ رۆژا شه‌می 12/10/2019ان هاتیه پێكئانین، هه‌سه‌دێ ژی ئه‌شكه‌ره كر، ئه‌نجاما نیقاشا وان ب رژیما سووریێ ره وێ پر باش بن.
ئه‌ڤ جڤینا هه‌سه‌دێ و رایه‌دارێن رژیما سووریێ هه‌موه‌ختا داخویانی ئێن به‌رده‌ڤكێ هه‌سه‌دێ نه ده‌ما په‌یام ژ ئه‌مه‌ریكایێ ره شاندی و تێده وها نڤیساندبوو: “گه‌ر هوون ناڤچه‌یا دژه فرینێ بریارێ پێ نه‌دن، هه‌ر وها باله‌فرێن وه ئێن جه‌نگی نكاربن ئاسیمانێ باكوورێ سووریێ بپارێزن، رێ بدن باله‌فرێن سووریێ و ئێن رووسیا فه‌ده‌رال ب وی ئه‌ركێ رابن”.
چاڤكانی د دن خوه‌یا كرن، هه‌سه‌ده و رێڤه‌به‌رییا خوه‌سه‌ر كو ل بن سه‌یوانا پارتیا یه‌كیتیا ده‌مۆكراتیك په‌یه‌دی ته‌كۆشینا خوه ل رۆژئاڤا د مه‌شینن، ب تو ئاوایه‌كی رازی نینه یه‌كگرتنا كوردان و ئالیێن سیاسی ئێن رۆژئاڤا پێكبینه و ل شوونا وێ په‌نایێ ژ بۆ رژیما سووریێ دبه، ئه‌ڤ یه‌ك ب رامانا راده‌ستكرنا ناڤچه‌یێن رۆژئاڤایه ب رژیما سووریێ.
به‌رده‌ڤكێ هه‌سه‌دێ ژ به‌را ده‌ستپێكرنا ئێریشا داگیركاری ژی گۆتبوو: یه‌ك ژ رێكێن ل به‌ر ده‌ستێ وان ئه‌وه، ناڤچه‌یێن رۆژئاڤا جاره‌كا دن ژبۆ رژیما سووریێ وه‌رن ڤه‌گه‌راندن، واته ڤه‌گه‌رین ژبۆ به‌ری سالا 2012ان.
ل ڤێ ده‌ربارێ ده، رژیما سووریێ ژ زارێ جهگرێ وه‌زیرێ ده‌رڤه فه‌یسه‌ل میقداد وها داخویانی دابوو: هه‌سه‌ده ئیخانه‌ت كریه، نیقاشێ پێره ناكن، ئه‌و كرێگرتی ئێن ئه‌مه‌ریكایێ نه.
تێ زانین هكوومه‌تا سووریایێ ب ته‌مامه‌تی ل دژی دانا مافێ ئۆتۆنۆمیێ یه ب رۆژئاڤا كوردستانێ، هه‌موه‌خت ب تو ئاوایه‌ك رێ ناده كیانه‌كێ خوه‌سه‌ر ل باكوورا سووریێ وه‌ره ئاڤاكرن، ل سالا ده‌رباسبووی ژی دیمه‌شقێ هۆشداریه‌كه توند ب هه‌سه‌دێ دابوو كو گه‌ر ناڤه‌چه‌یێن ل بن ده‌ستهه‌لاتا خوه نه‌ڤه‌گه‌رینه وێ ب هێزا له‌شكران ڤه‌گه‌رین.
