تركیێ چه‌كداران دشینه‌ سه‌رێ كانیێ

ئه‌نجوومه‌نا سووریایا ده‌مۆكراتیك دخوازه‌ چاڤدێرێن ناڤنه‌ته‌وه‌ئی وه‌رن رۆژهلاتا فراتێ، وه‌كه‌ گره‌نتی ژ بۆ بجیكرنا ئاگربه‌ستا ئه‌نقه‌رێ.

ئه‌نجوومه‌نا سووریایا ده‌مۆكراتیك مه‌سه‌ده‌، به‌هسا داوی پێشهاتێن مه‌یدانی ئێن رۆژهلاتا فراتێ دكه‌ و دبێژه‌: ئارته‌شا تركیێ و میلیشیایێن وێ، لهه‌ڤهاتنا ئاگربه‌ستێ و راوه‌ساتاندنا شه‌ر بن پێ كرنه‌، تایبه‌ت ل سه‌رێ كانیێ.

مه‌سه‌ده‌ ئه‌شكه‌ره‌ دكه‌ كو ئارته‌شا تركیێ ل سه‌ر شاندنا چه‌كداران ژ بۆ باژارێ سه‌رێ كانیێ به‌رده‌وامه‌، ئه‌ڤ یه‌ك دژی لهه‌ڤاتنا ئه‌نقه‌رێ یه‌.

ل ڤێ ده‌ربارێ ده‌، مه‌سه‌دێ بانگ ل ئه‌مه‌ریكا و جڤاكا ناڤنه‌ته‌وه‌ئی دكه‌ كو چاڤدێران ژ بۆ رۆژهلاتا فراتێ بشینن، ژ بۆكو گره‌نتیا بجی كرنا لهه‌ڤهاتنی هه‌به‌.

هه‌موه‌ختا ئه‌ڤی داخویانیا مه‌سه‌دێ، ئیرۆ سه‌رێ سبێ ژی، باله‌فرێن جه‌نگی ئێن تركیێ ل ئاسیمانێ سه‌رێ كانیێ فرین كرنه‌.

هێزێن سووریایا ده‌مۆكراتیك هه‌سه‌ده‌ ژی دبێژه‌: وان پێگریه‌كا ته‌مام ب لهه‌ڤهاتنا ئاگربه‌ستێ كریه‌، لێ به‌لێ تركیێ نه‌ پێگیره‌.

ویلایه‌تێن یه‌كبووی ئێن ئه‌مه‌ریكایێ و تركیێ ل رۆژا پێنجشه‌می 17/10/2019ان ل ئه‌نقه‌رێ لهه‌ڤهاتنا ئاگربه‌ستێ ئیمزه‌ كر، ل گور وێ لهه‌ڤهاتنێ تركیێ وێ ب كووراهیا 32 كم و پاناتیا 444 كم د رۆژهلاتا فراتێ ده‌ بمینه‌، هه‌سه‌ده‌ و یه‌په‌گه‌ ژی وێ ژ ور بهێن ڤه‌كشاندن.