ئاگربه‌ستا رۆژئاڤا كوردستانێ كو ل نێڤبه‌را هێزێن سووریایا ده‌مۆكراتیك و ئارته‌شا تركیێ ل گۆر لهه‌ڤاتنا ئه‌نقه‌رێ هاتبوو ئیلان كرن، ئیرۆ ب داوی دبه.
ویلایه‌تێن یه‌كبووی ئێن ئه‌مه‌ریكایێ و تركیێ، ل رۆژا 17/10/2019ان ل ئه‌نقه‌رێ لهه‌ڤهاتنا هه‌رێما ئه‌وله‌هیێ ئیمزه كر و ل گۆر وێ ده‌رفه‌تا 120 سائه‌تان ب هێزێن سووریایا ده‌مۆكراتیك هاتبوو دایین كو خوه ژ ته‌ڤ ناڤچه‌یێن هه‌رێما ئه‌وله‌هیێ ڤه‌كشینه، ئێڤارا ئیرۆ رۆژا سێشه‌می 22/10/2019ان، ئه‌و ده‌رفه‌ت ب داوی دبه.
چاڤكانیێن داركا مازیێ ل رۆژئاڤا كوردستانێ ئه‌شكه‌ره كرنه كو هه‌سه‌دێ شه‌رڤانێن خوه ژ هه‌رێما ئه‌وله‌هیێ ئا ل نێڤبه‌را باژاركێن سه‌رێ كانیێ و گرێ سپیێ ڤه‌كشاندنه.
چاڤكانیان ده‌ست نیشان كرنه كو هه‌سه‌دێ ت شه‌رڤانێن خوه ل هه‌رێما ئه‌وله‌هیێ نه‌هشتنه، لێ هنه‌ك مه‌رجێن وان هه‌نه.
ته‌ڤی كو هه‌سه‌دێ هێز ڤه‌كشاندنه، ئارته‌شا نیزامی ئا سووریێ ژی هه‌ره‌كه‌تێن خوه ل باكوورا رۆژهلاتا ولات هه‌نه و ئیرۆ رۆژا دوشه‌می هێزه‌كه له‌شكری ئا سووریێ ل گوندێ باكوورا حه‌سه‌كێ هات بجی كرن.
لهه‌ڤهاتنا ئه‌نقه‌رێ كو ب یه‌ك ژ لهه‌ڤهاتنێن هه‌ری خراپ ژ بۆ گه‌لێ رۆژئاڤا تێ ناسكرن، وێ رووبه‌ره‌كه هه‌ری مه‌زن ئێ خاكا رۆژئاڤا كوردستانێ ب ده‌ست تركیێ ڤه به‌رده، رووبه‌را خاكا ژده‌ستچووی دگه‌هه 32كم كووراهی و 444كم پاناتی.
