داستانا «خوه‌ نه‌چه‌مینن» پیلانێن ئه‌ره‌ب، ترك و فارسان ژناڤبرن

پاش شازدێ ئۆکتۆبەرا سالا 2017ان هێزێن داگیرکار کو ژ «هەشدا شەئبی، پۆلیسێن ئیراقی، ئارته‌شا ئیراقی، سپایێ پاسدارێن ئیرانێ و هنەک چه‌ته‌یێن سەر ب هزبوللا یا لبنانی» پێک هاتبوون ل سەر دو ئه‌نیان دابه‌شبوون، ئه‌نیه‌ك بەر ب باژارۆکێ پردێ دچه‌ هه‌یا كو ژ ور بەر ب هەولێرا پایتەختا هەرێما باشوور ڤه‌ بچن، ئه‌نیه‌كه‌ دن ب چەکێن گران و هێزەکە مەزن بەر ب سینۆرێ رەبیئە.

پلانا داگیركاریا سێگۆشه‌یا پێشابوورێ

ئارمانج ژ ئێریشا سەر رەبیئە داگیرکاریا سێگۆشەیا پێشابوورێ و كۆنترۆلكرنا رییا بۆریا پەترۆلا «کەرکووک – جەیهان» ئانکو بۆریا نەفتا ئیراقێ ئا کەڤن و هه‌موه‌خت بۆریا پەترۆلا «کوردستانێ» بوو، هه‌یا كو بکارن هه‌گه‌ر ل پلانا داگیركرنا هەولێرێ شكه‌ستن خوار، سەرۆکانیێن ئیکۆنۆمی یێن هەرێما باشوور بگرن و هەرێمێ ب هەر تشتێ كو ئه‌و دخوازن، ناچار بکن.

لهه‌ڤهاتنا د ناڤبەرا گرۆپا “کالفامان” دگەل هێزێن دەولەتێن داگیرکار ب تایبەتی دگەل «قاسمێ سولەیمانی» ئەڤ بوو کو بیرە پەترۆلێن «بای هەسەن و هاڤانا» بدن شركه‌تا «برێتش پترۆلیۆم» ئەڤ شرکەتە کو شرکەتەکە به‌ریتانی یە سۆز ژ هكوومه‌تا ئیراقێ رە دابوون کو رۆژانە نێزی 1000 بەرمیلێن پەترۆلێ ب رێیا ڤێ بۆریێ بشینە بەندەرا جەیهان ئا ترکیێ، ترکیێ ژی ب ڤێ یەکێ رازی ببوو، ژبەرکو مفایەکە ئیکۆنۆمیک ئێ هەری باش ژ بۆ ترکیێ تێدە بوو، هەروەها بریار ئەڤ بوو کو بەهرا گرۆپا کالفامن ژی ب ڤێ رێ یێ وەرە دایین.

پێشمه‌رگه‌هان جه‌نگا رومه‌تێ و مان و نه‌مانێ كر

ل ئه‌نیا سحێلا و مەهموودیێ ئەڤ هێزێن پێشمەرگە هەبوون کو شیان ڤێ داستانا مەزن تۆمار بکن و رێ ل بەر هێزێن داگیرکار بگرن، لیوا یەک ئا لەشکرێ رۆژ کو ب فەرمانداریا «بەدەل بەندی» ئەڤ لیوایە ئا تایبەتە ب پێشمەرگەهێن رۆژئاڤا کوردستانێ بوو و «لەشکری تایبەتی یەک و گولان» ب سەرکرداتیا «مەنسوور بارزانی» کورێ مەسعوود بارزانی سەرۆکێ پارتیا دەمۆکرات ئا کوردستانێ، د ڤێ داستانێ دە پێشمەرگەهان بریارا بەرخوەدانێ هه‌یا سەرکەتنێ دابوو، فەرماندە «مەنسوور بارزانی» پاش کو بریارا بەرخوەدانێ وەرگرتن، هێزێن پێشمەرگە ل سەر سێ ئه‌نیێن یەک ل په‌ی یەک پارڤەکرن و ژ پێشمەرگەهێن ل ور رە وەها ئاخڤی: «ئیرۆ رۆژا پاراستنا رومه‌تا هەموو کوردانە، ئیرۆ وێ ئێریشەکە هەری مەزن وەرە سەر ئه‌نیێن پێشمەگە، ئەز هێڤیخوازم هەر کەس کو د ترسە یانژی هەر کەس کو ناخوازە ب مەرا بە، هەر ژ نها ژ ئه‌نیان دەرکەڤە و بچە د ناڤا مالباتا خوە دا ژبەرکو مە ل ڤر بریارا شەرکرن تا داویێ دایە و ب چ رەنگەکێ ئەمێ ڤر بەرنەدن».

گورزا یه‌كه‌مین و فرقه‌یا 9 ئا ئارته‌شا ئیراقێ

ئێریشا ل سەر پێشمەرگەهان ل سینۆرێ سحێلا و مەهموودیێ وەکە ئێریشا ل سەر باژارۆکێ پردێ ب تۆپباران کرنا پێشمەرگەهان ژ ئالیێ توپچێ یێن ئیرانێ ڤە دەست پێ کر، ئەڤ تۆپبارن کرنە هەیا سێ سائەتان دۆماند ب ئاوایه‌كی وەها کو ئارته‌شا داگیرکار وەها فكرین کو هه‌یا یەک پێشمەرگە ژی ل ور نەمایە و هەموو پیشمەرگە یان هاتنە کوشتن یان ژی رەڤیانە، ب ڤێ هێڤیێ فیرقەیا 9 ئا هێزێن زرخی دەست ب ئێریشا سەر پێشمەرگەهان کر دەما کو ئەڤ هێزە نێزی ئه‌نیێن پێشمەرگەهان بووی، پێشمەرگەهان ل وان خست و کارین 3 تانکەر و 4 هەمەر و 1 باجەرێن وان ب ته‌مامی ژناڤ ببن، هەر وها هەژمارا کوشتیێن هێزێن داگیرکار ب 250 کوشتی و 470 بریندار هاتن ته‌خمین كرن.

پێشمەرگە كارین ل هنەک ناڤچەیان دژمن ناچاری پاشڤەكشینێ بكه‌، ئەڤ یەک بۆ ئەگەر کو دژمن بۆ جارا ددویان ئێریشی سەر ئه‌نیێن پێشمەرگە بکن ب ئاوایه‌كه‌ بهێزتر و بەرفرەهتر، ئەڤ بوو کو ب 13 هەزار ئەسکەران ئێرشی سەر پێشمەرگەهان هات کرن، د ڤێ ئێریشێ ده‌ زیانەکە هەری مەزن ب پێشمەرگەهێن کوردستانێ کەت و چەندین پێشمەرگەهێن سەر ب هێزا «رۆژ و هێزا زێرەڤانی» دگەل فەرماندارەکە پێشمەرگە شەهید کەتن.

سەرکرداتیا هێزێن چەکدار ل هەرێما کوردستانێ بریار ستاند کو ژ بۆ کێم کرنا فشارا ل سەر پێشمەرگەهان ل ڤێ ئەنیا شەر ئێریشی سەر ئارته‌شا ئیراقێ ل مه‌خموور بكه‌ و كارین هەژمارکه‌ له‌شكرێن ئیراقێ ل ور بكوژن و هەژمارەکە هەری زێدە ژ وان ب دیل گرتن، پێشمەرگە كارین پێتر ژ نیڤا مەخموور رزگار بکن، ئەڤ یەک بۆ سەدەم کو مۆرالا ئارته‌شا ئیراقێ خراپ ببە و دەست ژ ئێریشکرنێ بەردە ژبەرکو راستی شکەستنەکە دیرۆکی هات.

خه‌ونێن حێشتران ب ئه‌بادی ره‌ دانه‌ دیتن

تێ زانین کو هەیدەر ئەبادی هیزەکە له‌شكری و هنەک کارمەند ل سینۆرێ دەریێ ئیبراهیم خەلیل ژ ئالیێ ترکیێ ڤە بجی كربوون، هه‌یا كو دگەل سەرکەتنا داگیرکاران راستە راست ل وی ده‌ریێ سینۆر دەست بکار ببن، ل ور و ئەبادی ژی بکارە وەکە سەرکەتنەکه‌ دیرۆکی ب ئه‌ره‌به‌یێ و ب رێیا دەریێ سینۆری یێ ئیبراهیم خەلیل بچه‌ ترکیێ، ژبەرکو بریار ئەڤ بوو کو پاش سەرکەتنا ل سەر پێشمەرگەهان ئەبادی هەڤدیتنەکێ ب رەجەب تەییب ئەردۆگان رە پیک بینە، لێ بەلی بەرخوەدانا پیشمەرگەهان ئەڤ خواستەکا وان کر خەونا حوشترێ.

ب داستانا سحێلا پێشمەرگەهێن کوردستانێ ئەڤ یەک ته‌سبیت کر کو گەر ئیخانەتا گرۆپا «کالفامان» نەبایە وێ ت جارەکێ داگیرکاران نەکاریبا کەرکووکا دلێ کوردستانێ داگیر بکن، ئەڤ داستانە کو ب داستا “خوە نەچەمینن” تێ ناڤکرن بو سەدەم کو پلانا ئیران، ئیراق، ترکیێ و بەریتانیایێ ب تەمامی ژناڤ بچە.