وه‌زاره‌تا به‌ره‌ڤانیا رووسیا فه‌ده‌رال ئیرۆ ئه‌شكه‌ره كر، به‌را ب داوی بوونا وه‌ختا ئاگربه‌ستێ، هێزێن سووریایا ده‌مۆكراتیك ناڤچه‌یێن هه‌رێما ئه‌وله‌هیێ چوول كرنه، لێ تركیێ ئینكار دكه.
وەزیرێ بەرەڤانیێ یێ رووسیایێ سێرگی شویگۆ ئێڤارا ئیرۆ رۆژا سێشه‌می 29/10/2019ان ل ده‌ربارا ڤه‌كشاندنا هێزێن هه‌سه‌دێ ژ باكوورێ رۆژهلاتا سووریێ راگەھاند، ھێزێن کوردی خوە ب تەمامی ژ ناڤچه‌یێن هه‌رێما ئه‌وله‌هیێ ل باکوورێ رۆژھلاتێ سووریێ ژ بەرا ب داوی بوونا وه‌ختا ده‌ست نیشان كری كو 150 سائه‌تن، خوه ب تەمامی ڤەکشاندنە.
ژ ئالیێ خوه‌ڤه هولوسی ئاكار، وه‌زیرێ پاراستنا نه‌ته‌وه‌ئی ئا تركیێ ئه‌شكه‌ره كر، هێزێن سووریایا ده‌مۆكراتیك خوه ب ته‌مامی ژ هه‌رێما ئه‌وله‌هیێ نه‌ڤه‌كشاندنه.
ل گور لهه‌ڤهاتنا سۆچیێ كو ل نیڤبه‌را تركیێ و رووسیایی ده هاتبوو ئیمزه كر، پێویسته هه‌سه‌ده خوه ب كووراهییا 32 كیلۆمه‌تران ژ سینۆرێ تركیێ و رۆژئاڤا كوردستانێ ڤه‌كشه، واته ب درێژاهیا سینۆر.
ل ڤێ ده‌ربارێ ده تركیێ هشیاری دانه كو هه‌گه‌ر وه‌ختا ئاگربه‌ستێ ب داوی بوو و هه‌سه‌ده د جی ده ما، ئه‌وێ ئۆپه‌راسیۆنا خوه یا كانیا ئاشتیێ ب دۆمینن.
