سه‌رۆكێ پارتیا ده‌مۆكرات ئا كوردستانێ و رێبه‌رێ ملله‌تێ كورد ئیرۆ رۆژا شه‌می 2ێ مژدارێ په‌یام ل ده‌ربارا ره‌وشا ئیراقێ وه‌شاند تیده گۆ كو نابه گوهه‌رینا ده‌ستوور بێ سه‌پاندن و ببه سه‌ده‌ما پاشڤه‌كێشیا بنه‌مایێ ده‌مۆكراسیێ، ئه‌ڤ ژی ته‌كستا وێ په‌یامێ یه:
ب ناڤێ خوەدایێ مەزن و دلۆڤان
د دەربارێ رەوشا سیاسی یا ئیراقێ و نەرازیبوون و خوەپێشاندانا ھەموەلاتیان ده، ئەم گەلەک دلگرانن ژ بۆ ڤێ رەوشا کو ھاتیە پێش و ب رایا مە ئەوا کو نھا ل ھۆلێ ده یە یا ئیرۆ نینە بەلکو ژ ئەنجام و کۆمکەرێن شاشیێن 15 سالانه. خەلکی ئێش و ژانەکە زێدە کشاندیە و ھەموەلاتی مافێ وانه داخوازا خوە ھەبێ و نەرازی بێ. ژ بۆ وێ یەکێ پێویستە گوھ بدن داخوازیێن خەلکێ و ب توندوتیژی و خوین رێشتنێ کێشە چارەسەر نابن.
د گەل ڤێ ده ژی یەک ژ گرفتێن مەزن ئێ ئیراقێ ب جی نەکرنا دەستوورە. ئەگەر دەستوور وەکی خوە ھاتبا ب جی کرن، گەلەک ژ وان کێشەیان نەدبوون کو بەرێ و نھا ژی ھەنە. ژ ئالیەکە دن ڤە سەدەما ھووریا رەوشا نھا یاسایا ھلبژارتنە و ژ بۆ نەمانا سەدەما گرفتان، دڤێ یاسایا ھلبژارتنێ ب ئاوایەکی بێ گوھەرتن کو ئەنجامێن وێ ده‌ربرینێ ژ داخوازا راستی و دادپەروەرانە یا ھەموو پێکھاتان بێ.
د دەربارێ داخوازیێن ل سەر گوھەرینا دەستوورێ، ب رایا مه نابه گوھەرینا دەستوورێ بێ سەپاندن یان ب زۆرێ بێ و ل ھەمان دەمی دە ژی نابێ گوھەرینا دەستوور ببێ سەدەما پاشڤەکێشیا پرەنسیپێن دەمۆکراسی و ھەر وھا پاشڤەکێشیا مافێن گەلێ کورد و پێکھاتێن دن. ب پشتراستیێ ڤە ژی سیستەما دەمۆکراسی زێدەتر ل بەرژەوەندیا خەلکێ ئیراقە نە کو دیکتاتۆری و ھەموو گوھەرتنەک ژی پێویستە د چارچووڤه‌یا یاسا و مەکانیزمێن دەستوورێ ده به.
مەسئوود بارزانی
2/11/2019
