ترسا سه‌ره‌كه یا گه‌لێ باكورێ كوردستانێ نه ژ تركان بوو، وه‌ختا ئۆجالان له‌شكركرنا ئیجباری سه‌پاندی ده‌ریێ «جاشاتیێ» ڤه‌بوو، گه‌ل نه‌چار دبه فكر ل پاراستنا خوه بكه، حه‌فزا خوه ژ زاتێ ئاپۆ و زه‌برا PKK بكه.
پارتیا کارکەرێن کوردستانێ ژ دەستپێکا دامەزراندنێ ب ئاوایه‌كه رادیکال ته‌سه‌رف کر، بەرا کو ب فەرمی ببە پارتیه‌كه سیاسی و چەکدار، ئه‌و ل دژی عورفێن جڤاکا کوردی ده‌ركه‌ت، ئەڤ رەفتار بوو سەدەم هەژمارەکە هەری زێده ئا كوردێن باکور، ب تایبەت یێن گرێدای عەشیرەتان ژ خوە دوور بکە، PKK ئه‌و نه‌چار كرن ببن «خۆرۆجی» و ئالیکاریا دەولەتا ترکیێ بکن.
له‌شكریا ئیجباری و عه‌شیره‌تێن بۆتانێ
ئۆجالان د کۆنگرەیا 3 مین دە یاسایا لەشکریا ئیجباری جێبەجێ دکە، ئه‌و دخوازە ژ عەشیرەتێن ناڤچەیا بۆتانێ لەشکرەکێ ژ خوە رە ئاڤا بکه، ژ عەشیرەتێن «ژیرکی» گەلەک جوان ژ بۆ چیا هاتن رەڤاندن، ئه‌وێ نەخوه‌ستی ل جەم PKK بمینه ب ئاوایه‌كی هۆڤ هات کوشتن، ده‌رئه‌نجام ڤێ رەفتارا PKK ئەڤ بوو كو عەشیران خوە نیزی دەولەتێ کرن ژ بۆ كو بكارن خوه ژ PKK بپارێزن، وان چەک وەرگرتن و بوونە چەتێن دەولەتێ، ئەڤ جار ژی گەلەک کەس ب سووچا سیخۆریکرنێ هاتن کوشتن.
PKK پاش کو هنەکی بهێز کەتی راستەراست خەباتا خوە ل دژی کەساتیێن کوردپەروەر و نە دگەل ئایدۆلۆژیا خوه مه‌شاند، ئەو وەکە خائینێن وەلات ناساندن، PKK وەکە به‌را نها مە به‌هس کری «یەکەم گوللەیا خوە ل دژی کوردان تەقاند»، ئەو کورد ژی «محەمەد جەلال بوجاک» سەرۆکێ عەشیرەتا «بوجاک» بوو، ئەڤ یەک بوو سەدەم کو هەژمارەکە هەری زێدە ژ زەلامێن ڤێ عەشیرێ په‌یوه‌ندیێ ب ده‌وله‌تا ترکیێ بکن و چەکان ژێ وەرگرن و ل دژی PKK وان چەکان هەلگرن، ئەڤ کەس ژی د ناڤا کوردان دە ب «خۆرۆجی» تێن ناس کرن، لێ بەلێ سەدەما سەرەکە یا خۆرۆجی بوونا گەل PKK ب خوە یه.
ل سالا 1988ان و پشتی مه‌شاندنا له‌شكریا ب ئیجباری، وه‌كه چاوا خۆرتێن عه‌شیره‌تا «ژیر‌كی» ب زۆری برن چیا، كوڕێ ئاغایێ عه‌شیره‌تا «ئالئانه» په‌یوه‌ندیێن باش دگه‌ل PKK ده هه‌بوون، لێ وه‌ختا ب مێهڤانی دچه چیا، ئه‌و ل به‌یتوشه‌بابێ ژ ئالیێ فه‌رماندارێ PKK «دێره‌ژ ئه‌لی» تێ كوشتن، ئه‌ڤێ بوویه‌رێ ئه‌و عه‌شیر ژی نه‌چاری خرۆجیێ كر.
ل باكور په‌كه‌كێ به‌رێ گه‌ل ددا چه‌تاتیێ و ل باشوور ده‌وله‌تێ
كوردێن كو ئالیكاریا ده‌وله‌تێن داگیركار كرین، نه ته‌نێ ل باكورا ولات بوون، ل باشوور، رۆژئاڤا و رۆژهلاتا كوردستانێ چه‌ته هه‌بوون لێ ب جوداهیه‌كه مه‌زن، ژ به‌ر كو ل باكور PKK گه‌ل نه‌چاری جاشاتیێ كر و چه‌ته‌یێن باكور شه‌ر ل دژی PKK كر، لێ ل باشوور و په‌رچه‌یێن دن ده‌وله‌تێن داگیركار گه‌ل نه‌چار كر ببه چه‌ته و ئه‌و چه‌تاتی وێنه‌یی بوو و بێ شه‌ر بوو، نه وه‌كه باكور كو عه‌شیرێن رێیا خۆرۆجیێ گرتین ل دژی PKK چه‌ك هه‌لگرتن.
په‌كه‌كێ ب سه‌دان خۆرتێن ئێزدی ووندا كرن
هه‌یا نها سیاسه‌تا رادیكالا PKK ل دژی گه‌ل د دۆمه، هێژ كه‌چ و خورتێن كوردان ب رێیا خاپاندنێ دبه‌ن چیایان، وه‌كه ڤێ داویێ كو هه‌ژماره‌كا خۆرتان ل ئامه‌دا باكور ره‌ڤاندنه و هێژ گره‌ڤا دایكێن وان ل به‌ر باره‌گه‌ها HDP د دۆمه، هه‌موه‌خت وه‌كه چاوا ب سه‌دان خورت و كه‌چێن ئێزدی ل شه‌نگالێ پشتی هاتنا دائیشێ خاپاندن و ئیسغلالا ره‌وشا وان كر كو ب سه‌دان شاندنه ناڤچه‌یێن ئاگرین ئێن سینۆر و ب ده‌ست جه‌ندرمان دان كوشتن و وونداكرن.
PKK وه‌كه چاوا ل سالێن هه‌شتێیان و نۆتان ژ سه‌ده‌یا رابووری زارۆ و جوانێن كوردان ب هێزێ د شاندن ئه‌كادیمیا «قۆرقۆماز» ل ناڤبه‌را سووریێ و لبنانێ ده كو ل ور بۆ وه‌خته‌كا درێژ ل سه‌ر مه‌ژیێ وان د خه‌بتی و ئه‌و زارۆ وه‌كه ئینسانێن ئاله‌ت دكرن، نها PKK هه‌مان سیاسه‌تێ ل شه‌نگالێ د راستا گه‌لێ ئێزدی ده د مه‌شینه.
