مه‌سروور بارزانی سه‌ر وه‌زیرێ هه‌رێما باشوورێ كوردستانێ ژ بۆ كو ئالیكاریا په‌نابه‌رێن رۆژئاڤا كوردستانێ ل باشوور وه‌ره كرن، په‌یام ژ بۆ جڤاكا ناڤنه‌ته‌وه‌ئی شاند.
ئیرۆ رۆژا شه‌می 9/11/2019ان سه‌ر وه‌زیرێ هه‌رێما باشوورێ كوردستانێ مه‌سروور بارزانی سه‌ردانا كامپا ناڤچه‌یا به‌رده‌ره‌ش ئا ل سینۆرێ پارێزگه‌هیا دهۆكێ كر كو په‌نابه‌رێن رۆژئاڤا ئێن پشتی ئێریشا داگیركاریا تركیێ تێده بجی بوونه.
مه‌سروور بارزانی ل كامپێ په‌یام ژ بۆ جڤاكا ناڤنه‌ته‌وه‌ئی شاند و ها ئاخڤی: ئه‌م بانگ ل رێخستنێن ناڤه‌نه‌ته‌وه‌ئی دكن ژ بۆ دۆماندنا ئالیكاریێن خوه ژ بۆ په‌نابه‌رێن رۆژئاڤا كو ل هه‌رێما باشوور جی دگرن، هكوومه‌تا باشوور خه‌مساری د ئالیكاریا وان ده نه‌كریه، ئالیكاری ب گۆره‌ی كارینا هكوومه‌تێ وێ بدۆمه.
هه‌ر وها ده‌ست نیشان كر، 1.1 ملیۆن ئاواره ل هه‌رێما باشوورێ كوردستانێ هه‌نه، پێویستیا وان ئا سالانه ب 1.5 ملیار دۆلارێن ئه‌مه‌ریكی یه، ئه‌ڤ خه‌رجی ل سه‌ر ئه‌ركا هكوومه‌تا باشووره.
مه‌سروور بارزانی دبێژه: هكوومه‌تا باشوورێ كوردستانێ خه‌مساری د ئالیكاریا په‌نابه‌رێن رۆژئاڤا ده نه‌كریه، لێ به‌لێ پێویستیا وان ب ئالیكاریێن جڤاكا ناڤنه‌ته‌وه‌ئی یه.
ئێریشا داگیركاریا تركیێ ل سه‌ر رۆژئاڤا كوردستانێ ل 9 جۆتمه‌ها ئیسالێ ده‌ستپێكر، ژ وێ رۆژێ ڤه هه‌ژماره‌كا هه‌ری زۆر ئا گه‌لێ رۆژئاڤا ئاواره و په‌نابه‌ر بوون، هه‌یا نها 13 هزار ولاتیێن رۆژئاڤا ب رێیا ده‌ریێ سێمالكا هاتنه هه‌رێما باشوور و ل كامپا ناڤچه‌یا به‌رده‌ره‌ش هاتنه بجی كرن.
چاڤكانیێن داركا مازی ل هه‌فتیا رابووری و ژبۆ ته‌ئقیبا بابه‌تا هاتنا په‌نابه‌رێن رۆژئاڤا ژ بۆ باشوور ئه‌شكه‌ره كر كو هنه‌ك ئالیێن گرێدای ده‌ستهلاتا رۆژئاڤا رێناده په‌نابه‌ر ده‌رباسی باشوور ببن و ژ بۆ ده‌رباسبوونا هه‌ر په‌نابه‌ره‌كی كۆژمێ 300 دۆلارێن ئه‌مه‌ریكی تێ سته‌ندن، په‌نابه‌رێن كو ئه‌ڤ پاره پێره نه‌یی، ناچار د مان رێیێن خه‌ته‌ر ژ بۆ ده‌رباسبوونا باشوور بكاربینن، هه‌ژماره‌كه زۆر ده‌رباسی شه‌نگالێ بوون و ل ور ژ ئالیێ هێزێن گرێدای پارتیا كاركه‌رێن كوردستانێ په‌كه‌كێ هاتنه نه‌چاركرن كو ل شه‌نگالێ بمینن.
